MAH TUANBIA HI CHINMI VIALTE NIH KAN THEIH CIO AH A TTHA

Miphun Caah A Nung Lan Dingmi Political Party Min ( Chin Political Party Min Caah Sullam A Ngei Bikmi Min). CNLD timi Chin National League for Democracy cu Oct 18,1988 ah Chin Nationalist MINO SALAI Lawngte Pathum , tleicia SALAI RAM LING HMUNG ( B.A Philosophy) ,SALAI LIAN HMUNG SAKHONG ( M.A History) le SALAI DAVID NGAI SAK ( LLB) hna nih RANGOON ah an rak dirh.

Kum 26 ( March 1992-2018) chung cawl kho loin ṭemṭawnnak a tuar hnu September 29, 2018 ah Chin Nationalist PATLING UPA pathum ,Salai David Ngai Sak(CLD),Pu.Zo Zam ( CNDP)le Pu.No Than Kap ( CPP) hna nih an i ruat an i ruat i CNLD Min pi cu YANGON ṭhiamṭhiam ah an hun nunter ṭhan ( Rangon min zong Yangon tiah aa rak thleng cang).Tutan tu ah hin cun SALAI Pakhat lawng aa tel kho cang.

SALAI Pakhat cu mual a kan liam taak cang.SALAI Pakhat cu CNF Vice President dirhmun a phaan cang.( 2008 Phunghram hi Federal State hrambunh in sermi cu rak si sehlaw Dr.Lian Hmung Sakhong nih hin amah hrimhrim nih CNLD hi a ruh lang in a hruai ṭhan ko hnga, Ziahtiah CNLD a rak dirh hmasa biktu MINO pathum lakah pakhat a rak si. Atu cu lang hngaan in ttanh awk a ṭha lomi dirhmun ah a um tikah a chelchel ah cun ka zaang a faak ngai tawn.Asinain CNLD founder pa 3 lakah pakhat a simi SALAI DAVID NGAI SAK lutlai ah aa tel ko i, zan ah aa hngilh kho ko lai ka ti.)

NOTE: Mah hi CNLD tuanbia hi hngalh cio ah a ṭha. A cheu nih nizan naite dirhmi MIN ah an ruah sual tawn.Atu Kawl NLD he khin an dirh kum aa khatmi an si. Kan Chin Miphun Party Min caah kum khua in nung lan hraam seh. Kha hlan, Parliamentary Democracy chan HRANG NAWL, Capt MANG TUNG NUNG te dirhmi CNO ( Chin National Organization) NEWIN nih a thah ban tuk cu si ve ti hraam hlah seh.Cun kanmah CHIN MIPHUN lila zong nih thah i zuam hna hlah usih.Kan Miphun nih kan ngeihchunmi PARTY a si ti hi kan philh cio lo a herh,( Ramchung he ramleeng he) PPP. CANADA.

Relchih:CNLD Kan Dirkamh Hrimhrim Aharhnak Aruang? British uknak in Burma nih zalonnak a hmuh lai ah khan tlangcungmi zong kan lungtho thanuam tein kan i tel ve khawhnak caah Aung San nih biakam a rak ngei.Nehgingpoa Kipgen nih a tialmi Democratisation of Myanmar ah kan hmuh khawhmi cu, Panglong Conference ah tlangmi zong kawh ve an rak si, cutikah British tadinca pakhat ah “If Burma received one kyat, you will receive on kyat” (Burma nig kyat khah a hmuh zongah nan hmuh ve lai) tiah tlangcungmi hna General Aung San nih a chimhmi hna bia langhter a si.

Aung San belte Independence kan hmuh hnuah a thi, ralkap uknak toitangah caan saupi chung kan ram cu a um than, sihmanhselaw, democracy thimnak bantukin kum 2015 (?) ah khan kan ramah thimnak kan ngei kho than.Mikip nih ralkap uknak in luatnak kan duh tuk ruangah Suu Kyi le a perty NLD cu kan vote dih. Teinak an hmuh in zeibantuk thanchonak dah kan ram nih a hmuh timi hi ruahawk a tam ngaingai.

Kan ruahning bantukin zeibantuk thanchonal hmanh kan ram nih a hmuh loning cu nan i fian cio ka zumh. Kan pale CNA nih federal state kan si khawhnak caah caan saupi chung an nunnak an pek cang, sihmanhselaw, nihinni tiangin kan duhmi kan hmu kho lo, kan ram Chin State cu kawl pawl nih an duhning poah in an colcanghpi, thilsining hi lungfim tein ruah tikah lung a fak, hnabei a dong tuk hringhran, hibantukin caan saupi chung kan kal a si ahcun kawl pawl nih kan miphun sinak vialte hi an dolh dih te lai.

Gen. Aung San nih kan ram aiawh in Panglong Conference i a kalmi hna sinah a biakam cu a fanu Suu Kyi nih hindi tlamtlinhter khawh dawh a si ti lo, cucaah, kan miphun nih luatnak a hmuh khawhnak caah kan mahtein kan au ve a herh caan a phan cang.Mi tampi nih CNLD caah cozahnak ser a ngah hlei lai lo tiah nan chim, sihmanhselaw hihi philh hrimhrim hlah.Duh le cozahnak cu ser kho lo ko hna seh, sihmanhselaw, kan miphun nih luatnak (federal) kan duh tuk ruangah mah tein uknak kan duh i, lungkhat tein kan miphun party kan dirkamh timi hi Kawl pawl nih an theih ve hrimhrim a herh cang. CNA nih thazaang he hriamnam he an colcaang, cubantuk colcanghnak cu politics zongin dirkamh an herh.

Cucaah, lungkhat tein kan dir khawhnak caah CNLD rak dirkamh cio u.Kan ram Chin State hi kawl pawl nih an uk dih cang, an ramchung i a ummi kan si caah uknak nawl cu nei ko hna hmanhselaw kan miphun sinak vialte kan humhak khawhnak caah federal uknak kan ngeih hi a herh tuk hringhran timi philh hrimhrim hna hlah u sih, na miphun na dawt ahcun CNLD rak vote hrimhrim u.Atu hi politics leikapin Chin miphun lungkhat tein kan dir timi langhtetnak caah CNLD nih teinak a hmuh hrimhrim a herh, kawl pawl nih an miphun hmanh nih an ramah teinak an hmu kho lo tuah a kan nehsawh lonak hnga rak dirkamh cio u. Na miphun a miapho lonak caah CNLD rak dirkamh hrimhrim dingin mikip kan sawm cio hna. Credit: Khoki Duhkimi

Be the first to comment

Leave a Reply

Your email address will not be published.


*