LAIMI NLD ATTANHTU CAAH THINPHAN DAI LO NAN SI CANG HIH

Laimi NLD a ttanhtu caah cun thinphan dai lo nan si ko hih.Chin State NLD Chairman Pu Zo Bawi hmanh Cabawm tein cunglei Kawl nan nu/pa le nih an duhnak paoh an vun tthut ter colh ko hih mu.Zei tluk in dah an in nek hna ti ahcun Chairman pakhat a si ko mi hmanh nih a mah duhnak teah MPs cuhnak nawl a ngeih khawh lo mi hi cu Pu Zo Bawi zaangfak taktak a si ko.

Tulio thih deng in nan ttanh,nan dirh kamh mi le nan caan le nan thazang vialte nan pek mi NLD nih hin Ni nikhat cu nanmah pawl Mee pek kan fih,kan in herh hna lo tiah an in ?hawl ve te hna lai.Cucaah cun thuk deuh le kau deuh in khua ruat hna usihlaw Miphun linghang tu ngeihter in thawnter ko hna usih. By Kiocinthang Salai

Relchih:Ram Le Miphun Maw Kan Dawt, Party Dah? Kawlram ramkhel dirhmun le nihin kan sining cuanh lengmang tikah Ramle miphun maw kan dawt party dah? tihi ruah lo awk a tha lo mi a si cang. Kawlram cu Kawl bawi uktu tha lomi hna nih kum tamtuk hranhram uknak in an kan uk cang tikah politics timi (Neinganzi) biafang hmanh chim ngam lo ding tiang in kan thinlung ah rian a rak tuan.

Mino deuh lebang nih cun a sullam taktak hmanh kan hngal huaha ti lo. Tlangcungmi kip le Khrihfa hna kan thlacamnak Bawipa nih an kan leh kan ti hnga maw, kan teminnnak a kan theih piak kan ti hnga dek? Ralbawi in President dir hmun ah a hung i thlengmi U Thein Sein hruainak in 2010 ah Election timi rampi thimnak cu mino hna nih kan theih bal tilomi a thar in ka vun theih than i a thawtnam hngalh kaa vun timh cang.

2010 cu a phungmen in vote pek si ko rih. 2015 cun zalong tein kan vun au ve cang hna. 2020 cu party zong duhthim ding an tam ngai cang. Pathian thluachuah ah ruah ko hna u sih.1990 kum rampi thimnak ah party tampi a rak dirmi hna zong nih Kawlram politics thil sining an zumh lo caah a si men lai party tampi an i tel duh lo i Kawlram nih kan ibochan bikmi NLD party zong a rak lut duh lo.

1990 kumah teinak a rak hmutu party NLD zong nawlngeihnak an rak pek duh hna lo caah daidup in an um ko. Kan pa le hna cheukhat party le politics kong a theihngal deuhmi le ramle miphun a dawtu hna tampi an nunak nih a phak zawh ve tilo caah an mit in an hmu kho ti lo i thimnak ah an i tel kho ti lo. Ramle miphun a dawtu hna nih miphun sersiamnak ding caah a lam tampi kawl cio a si tikah kan u le cheukhat hna cu an runinn lum le dawtmi chungkhar nule pa ule nau kaltak in ram tang ah fikfa le cangvot lak ah hriam i taih in an nunnak tiang an rak pek.

Miphun an dawtnak kha hriamtlaihnak in a langhtertu hna cu CNF/A kan ti hna.Party maw kan dawt lai Ramle miphun? Miphun sersiamnak caah thil cu phunhnih in a kal kan ti lai cu hriamnam aa tlaihmi phu le politicians hna an si. Hriamnam aa tlaihmi hna nih hin an dawtmi cu CNF/A a si lo. CNF ka dawt tiphung a si lo. Miphun an dawtnak tu kha CNF riantuannak in an langhter bia a si. CNF an dawt cu CNF nih miphun a dawt caah a si ko.

Cu bantuk thiamthiam in party tampi kan hung dir than tikah micheu nih NLD party kan dawt ding si. CLND party kan dawt ding a si kan ti lengmang mi hi, ruah ding a um. NLD le CNLD cu dawt ding a um lo. NLD nih ramle miphun a dawt ning kha zei bantuk lam in dah kan dawt lai i kan sersiam lai timi kha NLD phunglam in an kawl bia a si. CNLD nih ramle miphun an dawt ning le sersiam an i timh ning kha anmah phung le tinh ning in kalpi an timh bia a si.

A party siloin party nih sersiam a timhmi ramle miphun kha kan dawt deuh ding a si. Party tanh tuk i dawttuk bu hin ram le miphun hna dawt lo khawh a si.Party cu kan tanh ne lai maw? Ramle miphun kha zeibantuk in dah kan sersiam lai i kan dawt ning a si lai timi a tak in tuanchuahnak ding caah party cu sermi le dirhmi asi caah kan umnak party nih nih aa tinhmi cu tha tein kan hngalh hnu ah kan duhbik mi party ah kan um ding a si.

Cu kan umnak party cu kan chungkhar pawcawmnak ca le kan tappi le lungthu caah a si loh i kan ram le miphun sersiamnak caah asi ti kha kan philh lo ding a si. NLD nih ram sersiam a timh ning kha a thabik tiah kan ruah ahcun NLD ah um bak ding. CNLD nih ram le miphun caaah tuan aa timh ning kha a tha bak kan ti ahcun CNLD ah um bak ding a si. Cu kan umnak cu midang party nakin aa timh ning a tha deuh tiah kan ruah caah kan ummi a si i kan tanh bak ding a si. Sihmanhsehlaw, a tanh lawng tanh loin kan dawt ding a si chih.

A tanh lawng kan tanh ahcun a palh zong ah tanh chih si ko. Kan dawt ahcun a palh ahcun kan chimhhrin lai i lamding kan hmuh sak lai. MP le CM thutden k ahmuh khawhnak a silai timenin party ah kan luh ding a si lo. A. Party dawtcu zeidah a sI? Dawt timi hi phun tampi le lam tampi in hrilhfiah lengmang zongah a donghnak ahcun pek ah a dong. Pathian nih vawlei hi a dawt hringhran caah a fapa ngeihchun te kha a pek ti si ko.

Party cu ramle miphun kan sersiam khawh nak hnga ding caah kan dirh mi a si bantuk in party nih a dawt bik ding mi cu ramle miphun a si. A siahcun party dawt kan timi cu ramle miphun dawt a si ko caah kan party caah kanmah tu nih kan caan siseh, kan fimnak siseh, kan thazaang siseh kan pek ding a si ko. Party nih thil kan tuahpiak hna seh, kan bawm hna seh tiah ruah phung a si lo. Nawlbia nganbik cu “Na Pathian cu na thinlung dihlak, na thazaang dihlak le na ruahnak dihnak in na dawt lai” ti a si. A chim duhmi cu na sining dihlak kha na Pathian an pek lai ti a si.

Pakhatnak. Dawtnak taktak cu hmuhlei lawng siloin pek lei ahhin a si. Party kan dawt taktak ahcun kan party caah kan rak pekmi kan caan kan chawva vialte kha kan hmuh than lo zongah ramle miphun caah ka pek asi tiah kan ruah khawh a hau. Party a rak dirhtu le hruaitu hna nih nihin ah candidate hmunhma vun tinco lo poah ah party chuaktak kan timhmi hi party dawt lo pakhat a si. Party dirhnak ah ka rak dihmi chawnva ka pe than u tibantuk, chawva tampi dih in kan rak thawkmi asi caah keimah hrimhrim CM, MP ka si lai tibantuk lungput cu kan party min i “D” democracy timi sullam kan i fian lo bia a si lai. cupinah party kan rak dirh kha ramle miphun dat caah siloin mah thuhden hmuhnak caah a si ti a fian caah ram dawt lo a si.

Pahnihnak. Dawtmi taktak cungah cun zumh an tlak tawn. Zumhtlak le tlak lo tahnak fung cu nule va karlak ah cun padang a duh tak maw? Nungak dang a ngeih tak maw? Achungkhar a kal tak maw? ti kha si ko. Kan dawt kan timi hna nih kan duhning le an sinin kan i ruahchanmi kan hmuh lo le cangka in midang sinah kan thinlung dihlak kan pek ahcun mah cucu zumh awk tlak lo timi cu a si ko. Kan party center lei ah candidate caah an kan thim lo ruang ah party dang ah kan chuah ahcun zumhawl tlak lo taktak kan si tinak a si. Kan duhmi savo tin lo ruangah kan nuar ahcun MP le CM tuan ding lungput kan ngei rih lo ngakchia lungput a si.

Pathumnak. Dawtmi taktak cungah cun lung a sau: kan dawtmi hna taktak cungah cun kan lung a sau hrmrhim ding a si. Kan fale kan dawt hna ahcun kan cungah sualnak le palhnak an tuah zongah lungsau tein kan in khawh hna. Party le miphun kan dawt ahcun kan i ruahchan ning in maw, kan party nih kan cungah tuah hna seh ti kan duhmi an tuah lo caan ah maw kan lung a sua hrimhrim ding si. Party le miphun cungah kan lung a sau lo ahcun patling kan si lo tinak asi i lungsau lomi nih ramle miphun caah rian an tuan kho bal lo. (Daw Suh hi vawlei pi nih lungsau ah cun an nuar bak mi si)

Palinak. Party chuaktak cu sual a si maw? Tulio kan thlihran cuanh tikah party kipah duhmi savo tin lo ahcun party chuaktak i timh lio pi a si. Kan chim cang bang party chungah kan umnak cu ramle miphun kan dawt timh ning kha hi party chung ah kan um ahhin ka dawt khawh bik lai tiah ruah caah rak um a si. Na umnak party cu ram le miphun na dawt khawh nak ding caah dawn khantu a si ahcun chuak tak cu a sual hrimhrim lo. Asinain CM le MP thutden kan co lo ruangah na chuah ahcun na va umnak party dang zongah na co than lo tik cu na chuahthan ni a si te ko lai. CM le MP tuan theng lo zong hin ramle miphun dawt khawh a si ko ti cu patling nihcun hngalh dih a si ko. Party kan chuak tak i kan miphun vote aa thenhdarh dih caah ramle miphun caah ramtuannak dawntu asi ahcun a poi taktak dingmi thil a si.

Panganak. Independent in i cuh teh a tha maw? Kan chim cang bang ramle miphun kan dawt khawh nak ding lam ah hin party vialte hi kan zoh lengmang i party nih an i tinhmi vialte le an policy nak in keimah pumpak tinhning hin ramle miphun caah rian ka tuan khawh deuh lai, a tha deuh bak tiah patling nih a ruah ahcun independent in aa cuh bak ding si. Party pakhat cungah lungfak men in kan i cuh sual belte ahcun party caah siseh, mah pumpak caah siseh sungh le zatalknak lawng hmanh siloin minchiatnak tuanbia dawh lo tial zong a fawi te mi si. Independent in kan dir hmanhah zulhphung tha tein angeimi party he kut tlaih in tuanti bak ding a si.

Paruknak. Party le politics cu kan pawcawmnak ding a si maw? Hikong hi tawi tein chim fian khawh ding asi lo. A cauk hmanh in tial phu a si caah nihin ah cozah rian rak tuan i pension lak hnuah tuah ding ngeih lo ruang men ah pawcawmnak ah politics ah luh phung a si lo. Dingfel tein kan tuan seh tiah cun MP le CM nih kumkhat chungah hmuhmi phaisa khi ting 100 hualham men a si. Chungkhar pawcawmnak caah a tlak ngaingaimi a si lo. Chungkhar pacawmnak ding ahcun lam dang tampi aum ko. Eihmur i timh belte ahcun phun dang si hnga?Kan taun hnuah kan pawcawmnak aha can belte phun dang rih. Pawcawmnak bak ah ruah ahcun tlin lo lebang ahcun tlakchiatnakhrampi a si.

Pasarihnak. Politics hi nawlngeihnak men ah ruah ding a si lo. Mitha le miding cu zei bantuk dirhmun ah an dir zongah midang nih an tihzah hna i an nawl anngeih ko hna caah nawlngeitu an si zungzal ko. MP le CM kan si lo zongah miding le mifel le mitha kan si poah ahcun kan bia le kan hla cu kan miphun le mipi nih an ngaih ko lai. Miding fel kan si tung lo ahcun cozah thawngin nawlngeihnak ka ngeih lio ah kan hmaiah mi an kun lai nain an lungchung in kutchu an kan tuh lai i nawlngeihnak kan ngeih tilo tik ah zoh hmanh kan tong lai lo. Cozah riantuantu tha le tha lo cu pension lak hnuah aa fiang bik.

B. A tling bakmi Party a um maw? Atling bakmi party a um ne maw? timi biahalnak lehnak cu um hlah ti si ko. Tlin le tlin lo cu zeitindah kan tah tawn? Palhnak tuah le tuah lo. Dinfel dihle dih lo. Kan chim cawk lai lo. Asiahcun MP le CM candidate hna nih cunglei biachahnak cu nawlngai tein kan cohlang ding si maw? Cungeli kan hruaitu han hi an tha ko. An tlamtling ko tiah kan cohlang ding si maw?

Pakhatnak. NLD cu kan chim cia bang 1990 kum in a rak tling cangmi le party hlun ngai a si kan ti lai cu, 2020 caah candidate an thim hna tikah an zohmi cu party caah zumhawk a tlak maw? Hmuhtonmi zeidah a rak ngeih cang. A qualification zeidah a si? Zeibantuk rian dah a rak tuan bal cang? Ti bantuk tampi an zoh hnu ah an thimnak ding hmun nih an upat maw? teinak a hmu lai maw ti bantuk tiang in an zoh.

Sihmanhsehlaw, khuate lei kong vialte kha an theih dih ve lo caah centre lei ah information a petu nih dik lo deuh zong in pek khawh, tanhbul ngei zong in pek khawh a si caah an thimmi hna kha a thabik a si lo kho men ko. An palh khawh ve. Mahcucu Daw Suh zong nih a chim lengmang ko. Sihmanhsehlaw, party chung ah zumhawktlak tein an um ko ahcun voi nolh zongah thimthan khawh an si ko rih. NLD cu party thawng le party ngan an si caah 1990 in an tuan bia zoh buin mi thim ding tampi an ngei. Duhmi savo co lo zongah party caah fel tele dai tein riantuan hi zumhtalkmi nunzia cu a si.

Pahnihnak. CNLD cu nai teah Party pathum kha pakhat ah fonhmi an si rih caah NLD bantuk in ithithruai ning phun le lam zong an ngei thlu kho rih lai lo. Kawlholh vun i hlan ahcun sizungzi kalak an si rih. NLD bantuk in kan party ah zumhawk a tlak maw tlak lo tiah 1990 kum hrawng in zoh ding zong a um rih lo. Pumpak kong zong an I thei thlu tuk rih lai lo. Sihamnhsehlaw, miphun party pakhat an vun dirh khawhmi hi kan lawmhpi ngaimi hna a si. Party le politics timi cu 2020 ca longah a zoh ding asi lo bantuk in hmailei kum 100 tiang caah tha tein tinhmi a ngeimi a si a herh. Nihin ah 2020 thimnak ah an cawlcangh ning le lungput a that lo ahcun hmai ah a kal kho ding a si te lai lo.

Party minung nih tangdor nak lungthin le ram le miphun caah sacrifice tuah caan a si. Asiahcun cunglei centre nih candidate caah hmunhma an pek lomi hna nih hin party chuahtak in maw, independent in maw an kal colh viar ahcun mahcu party dawt lo taktak a si. Cunglei ah kan chim cang bang. Savo tin rih lo zongah hngah khawh khi lungsau zong a si i zumhawltkalmi sinak ziaza pakhat zong a si. Kum saupi a kal cang mi le party nganbik a simi hna LND le USDP hmanh ah cu bantuk thil aum ahcun CNLD nihin lawng ah a dirmi chung ah cun aum hrimhrim ding si tihi candidate luh aa tim mi hna zong nih kan hngalh bak a herh.

Rev.Dr. Tuan Peng Thang: Party maw kan zoh lai minung? Cozah serkhotu le 2008 phunghram remh khotu ding lawng kan thim hna ding a si kan ti chun ahcun zeitik hmanh ah miphun nih luatnak taktak kan hmu lai lo. Sihmanhsehlaw, ram le miphun dawt timi cu a lam kip in sersiam kha si ko caah Dr. Hmuh Thang (Lianlian pa) cu 2010 thimnak lio ah an innah rawnhrawn a rak kan kawh i a chimmi cu USDP party ah ka um nak thawng hin Laimi le Lairam caah rian ka tuan khawh bik lai tiah ka ruah a rak ka ti. (Zero nak cun 1 a tha deuh a ti. Lai party in um i Lairam sersiam khawh tung lo nak cun Kawl Party ah um buin sersiam khawh khi a chim duhnak si)

A tlin zongah tlinlo zongah nihin ni tiang party dangah aa thial lo. Mah cucu patling lungput a si. Asiahcun, USDP in candidate aa cuhmi hna khi ram na daw maw tiah hal han usihlaw, daw an ti dih lai. Ziah party le politics ah na luh ti usihlaw, ram le miphun sersiam ka duh an ti dih ko lai. Asiahcun party kip nih Liaram le Laimi sersiam le thancho ter an duh tak ko ahcun Thlantlang peng ah Amyota Hluatdaw in Pu Henry Van Thio nih ramle miphun a sersiam khawh bik lai ti kan ruah ahcun vote kan pek ding si ko.

Kan party a si loh le tiding ah ka raut lo. State Hluatdaw caah maw CM caah maw, Hluatdaw Speaker caah maw Dr. Hmuh Thang a thabik lai tiah kan ruah ahcun USDP a si zong ah a mah aa cuhnak zon ahcun vote kan pek ve ding si ko tiah ka ruah. Kan duhbikmi kan umnak party cu kan tanh bak ding si ko nain kan party a sin ai pah tiah rian a tuan kho lo ding hna vote cu ka uar lo. (Mizoram ka hawipa nih kan party asi poah ahcun vokpi an candidate zong ah ka vote lai tiah a chim bal)

2020 thimnak nih ramle miphun sersiam khotu hruaitu tampi chuakpi hram seh ti saduhthahnak he tialmi a si. Party Candidate dihlak nih hin kan Party hi Ramle miphun dawt le sersiam khawhnak caah dirhmi asi hi philh lo ah a tha. Miphun kan dawt ahcun miphun adaw vet u poah cu midang party zong kan dawt khawh ko hna lai. Credit: Joel Pengthang (Rev. Dr. Tuan Peng Thang )