KHUALEI CHUNGKHAT CHIMCIO HNA USIH ABIAPI BAK, KUM 3 TIANG THONGTHLAK KHAWH ASI

Chin Cozah nih Nawl a Chuahmi Kong. A tanglei nawl a buartu cu nawl an buarmi pakhat cio hrambunh in Kokek Harnak Lairel Ningcang Upadi relnak 25 ning in taza cuai a si lai. Pakhatnak. Peng huap in nawl chuahmi a zul lomi, zan chuah lo ding nawl chuahmi a zul lo mi, Pahnihnak. Mibu in biakinn ah I pumh, thlacamnak neih le tonpumhnak neih.

Pathumnak. Phung ning in sermi ramri luhchuahnak in a lut lo mi a rak cohlangtu, t’uanvo ngeitu sin ah thawng thanh a tlolhtu. Palinak. Quarantine Center in a tlimi pawl, phung ning in t’uanvo pekmi cozah riant’uan/bu pawl a t’hihphaihtu, hnahnawhnak a petu. Panganak. Khoi ka khuapi ah dah ka kal timi a chim duh lo mi, umnak hmun lih in a chim mi, va kalnak hmun kha lih in a chim mi, Gate sernak ah nawl a ngai lo mi, lamhla khual tlawnnak in a rak tlung i lampi ah t’um in khua ah a thli in a lut mi le a rak cohlang mi.

Kokek Harnak Lairel Ningcang Upadi relnak 25 hi kum 3 tiang thawngthlak leng ah tangka zong liamter khawhmi a si. A tanglei nawl a buartu cu Kokek Harnak Lairel Ningcang Upadi relnak 29, 30 (a) ning in taza cuai a si lai. Pakhatnak. Mask I hup lo in khuachung ah aa chawklet mi. Pahnihnak. Ngandamnak zoh piak ding a al mi.

Pahnihnak. T’uanvo ruangah, chiat ni ruangah si loin khualtlawnnak siannak tel loin khual a tlawng mi cozah riant’uan pawl le thawngthanhnak pe duh loin a um mi pawl. Kokek harnak lairel ningcang upadi relnak 29 le 30(a) hi kum 1 tiang thawngthlak maw, tangka liamter maw, a pahnih fonh zong in maw sualphawt khawh a si. Credit: Salai Thawngpi/Ramthlo.

Chin Ramkulh Biacei Luzik Le Biaceihtu Thim Ningcang. Tulio hi US Supreme Court ah baiceih lutlai thimnak a linsa ngai i Chin ramkulh baiceih luzik thim ningcang rak thai ve tuah ning. Chin ramkulh ah lutlai luzik pali kan ngeih hna i cu chung ah Biaceih luzik zong aa tel ve. Biaceih luzik thim ningcang cu 2008 phunghrampi le 2010 ramkomh biaceihnak upadi chung ah a um. Ramkulh biaceih zung ah biaceihtu a tlawm bik 3 in a tam bik 7 tiang chiah khawh a si.

Tu dirhmun ahcun pathum a kan chiah piak. Biaceihtu Luzik pakhat le biaceihtu pahnih an si. Myanmar ram chung ramkulh biaceihnak hi nawl ngeihnak a ngeihmi a um pah nain biapi taktak dirhmun khi a ngeih ve lo ca ah ka t’ial theng ti lai lo. President, Ramkomh biaceih luzik le Chin ramkulh Chief Minister he an i ron lai i Ramkulh biaceihtu luzik t’uan ding ca min an laak lai. Cun Chief Minister nih Ramkomh biaceih luzik he an i ron lai i ramkulh biaceihtu t’uan ding ca min an laak lai.

Cuti min an laakmi biaceih luzik le biaceihtu pawl min cu Ramkulh Hlutdaw sin ah an pek lai. Baiceih luzik le biaceihtu pawl nih ngeih a herhmi sinak pawl cu pakhatnak. kum 45-65 kar a si lai. Pahnihnak. phunghrampi 120-nak i Pyituh Hlutdaw palai nih ngeih a herhmi sinak a ngeih lai. Pathumnak. Ramkulh/ramt’hen biaceihtu asiloah Upadi Ayasih (Law Officer) a tlawm bik kum 5 a t’uan mi asiloah Pengkomh ah beiceihtu asiloah Upadi Ayasih a tlawm bik kum 10 a t’uan mi. Palinak. Sih-ni (advocate) a tlawm bik kum 15 a t’uan cang mi.

Panganak. President nih upadi thiamsang a si tiah a ruahmi. Paruknak. Rampi le rammi cung ah zumhtlak a si lai. Pasarihnak, ramkhel party ah chungtel a si lo mi, Pariatnak. Hlutdaw palai a si lo mi. Chin Hlutdaw nih a cunglei sinak a tlinh lo timi a chuahpi khawh lo a si ahcun President nih ramkomh biaceih luzik le ramkomh Chief Minister he i ron in biaceih luzik ca min an pekmi le Chief Minister nih ramkomh biaceih luzik he i ron in biaceihtu pawl min an pekmi kha President nih biaceihtu luzik le biaceihtu pawl ca ah a fehter lai.

Chinram biaceihtu luzik cu President nih ramkomh biaceih luzik le ramkulh Chief Minister hnatlakpinak in a chuahpi lai. Cun Chinram biaceihtu dang pawl cu Chief Minister nih ramkomh biaceih luzik he an i ron lai i an chuahpi ve lai. Cu an chuahpi mi kha an sinak nih a tlinh ahcun hlutdaw hnatlaknak in President nih a fehter lai tikhi a kal ning cu a si.

Chin ramkulh biaceihtu luzik le biaceihtu pawl hi a tanglei kong a chuah lo ahcun kum 65 tiang an t’uan khawh. Kum 65 an tlin cun Pension pek an si. (a) Amah nawl in rian aa din/chuahtak, (b) 2008 phunghrampi ning in sualphawt i dinhter, (c) Upadi ning in fehtermi Sii lei riant’uan pawl zoh ning in a ngandamnak nih a tlinh ti lomi, (d) A thih ruangah. Credit: Salai Thawngpi

Be the first to comment

Leave a Reply

Your email address will not be published.


*