KHAH THATEIN TUAK CIO UH HAKHA LAWNG AH MAW ASI LAI? ASI LO

Hakha lawng ah ma, Pupa ram cu a um. A si lo, Chin State dih lak hi, Kan Pupa ram le ro cu a si ko. NLD nih a hrawh mi tete zawn pawl lawng khi Pupa ram theng lawng a si lo. A herh ah cun, In dot tha tha zong an hrawh cio ko, kan hawi ram dang zong ah. Si nain an hrawh mi le, Cozah nih an herh nak pawl cu Mipi sin ah a cawk in an cawk ve.

A lak in an hrawk ve lo, cun Mipi nih siang lo ngah ve lo. NLD lawng kha mawh puh ding an si lo. Chin State i NLD MP pawl zong hi tam pi cu nan i ralrin a hau.State dang le, Kawl rawn MP pawl he nan i dang tuk, nan Ley lo tuk.NLD cu Myanmar Ram pi ning caah a tha i, Chin State i NLD pawl bel te hi tam pi an zia an i rem a hau.Vote pe tu khua le Ram lawng, Dawt le (ဦးစား) pek ti ban tuk kha kan hmang piak ti hlah uh. Chin State dih lak caah rian kan tuan piak cang ko uh. By. Salai Lal Lian HC

Pu Zo Tum Hmung Cabia Relchih: Hawile hna, 21st Century Panglong Conference cu nihin Aug 19, ah an thok tthan cang. Feb. 20, 2018 – Avoi 70nak Chin National Day, Rangoon ah bia ka chimmi kan hrawm hna. Panglong Agreement, Federal le NCA kong tam deuh ka chim. Thinthang Mekazin nih September 2019 (cahmai 29) ah a chuah tthan. Atanglei hi a si.

Hi bantuk ni sunglawi Chin Miphun Ni ah Chinmi pakhat dirhmun in Pyidaungsu zeitindah kan dirh lai timi hi ruah cio dingah ka duh. Phundang in kan chim ahcun Federal Pyidaungsu zeitindah kan dirh lai timi ruah a hau. Kum 2018, February 13 ah New Mon State Party (NMSP) le Lahu Democratic Union (LDU) le acozah kahdaihnak (NCA) min an thut lio ah Ram pumpi ruahnak petu Daw Aung San Suu Kyi nih Federal kong he pehtlai in hi tihin a chim.

Nihin kan vawlei pi ah hin ramkip caah a thami le aa tlakmi Federal ukning pakhat lawng bak ti a um kho lo. An ram, an tuanbia, an mibu cungah aa hngat i aa tlak in sersiam a si ko” a ti. Hi a chimmi hi a `ha bakmi a si. Federal timi cu an tuanbia le an mibu cungah aa hngat awk hrimhrim a si. Kan tuanbia hi Panglong Agreement cungah aa hngatmi a si. Mirang acozah nih Chin Miphun pawl cu 1896 Chin Hills Regulations in, Kachin Miphun cu 1895 Kachin Hill-Tribes Regulations in, Shan Miphun cu 1922 Federated Shan States Act in, Burma Proper cu 1935 Burma Act in a dang tein a rak uk hna.

Hi hmunhma 4 cu Mirang uknak chan hlan ah a dang tein a rak ummi hmunhma pawl an si hna i miphun dang hrimhrim zong an rak si. Independence ngah hnu lawng in a dang tein a rak i ukmi hi hmunhma pawl cu hmunkhat tein Panglong Agreement an rak tuah ruangah Pyidaungsu timi a hung chuahnak cu a si.Panglong Agreement um hlah sehlaw Pyidaungsu timi a umnak ding a sullam a um lo. Panglong Agreement ning in dirh awk a si dingmi Federal uk ning ah cun Pyine acozah kha Baho acozah nih pekchinmi nawlngeihnak (aana) bantuk a si awk a si lo, cheuhbauhmi a si awk a si lo i tlawm deuh in pek ding zong a si lo.

Hi hmunhma pawl cu mah tein uknak nawl a rak ngei cangmi an si. Pyidaungsu nawlngeihnak zong cu hi hmunhma pali in a hung chuakmi nawlngeihnak a si awk a si.Panglong Agreement hlan ah U Aung San nih bia a rak kamh hna. Tahchunhnak pakhat chim ahcun, avoi hnihnak Panglong hlan ah U Aung San nih bia a rak chimmi cu “tlangcung mi nih nanmah vawlei ah nanmah tein nan i uk lai, mah tein i uknak hmun i uknak lei kongkau ah Kawl pawl nih rak rat hnawh in kan i thlak lai lo tiah a rak chim.

Hi U Aung San biachimmi bia cu Joseph Silverstein nih a tialmi The Political Legacy of Aung San timi ca-uk ah atu bantuk hin a tial. Federal timi a thawthnam taktak cu U Aung San nih a rak chimmi ah aa tel. Federal acozah asilole Pyidaungsu timi cu aa dang liangluangmi hmunhma i a ummi pawl hmunkhat ah fonhmi a si caah kan dihlak nih kan ngeihmi Pyidaungsu a si. Phundang in kan chim ahcun kan ikhahnak zawn ah hmunkhat in kan tuanti lai i kan idannak zawn ah a dang tein kan tuan lai tinak a si ko.

Pakhat le pakhat karlak ah kan i ceih kan thlak lai lo timi ruahnak cungah aa hngatmi a si. Mah hnu ah ruah awk a herhmi cu Federal acozah ah zeibantuk nawlngeihnak dah chiah a si lai timi a biapi tuk. Keimah ka hmuh ning ahcun Taungkyi Tonpumhnak lio i biachahnak nambar 6 nak kha nihin caah aa tlak bik rua lai tiah ka ruah. Biachahnak nambar 6 nak ah zeidah a um kan ti a si ahcun 1) Ramdang he pehtlaihnak 2) Humhimnak 3) Tangka le Tangka pia chuahnak 4) Cakuatnak le seh thilri in ipehtlaihnak 5) Tlanglawng le Vanlawng in ipehtlaihnak 6) Tilawng dinhnak hmun ca ngunkhuai peknak 7) Pyidaungsu Tangka lei kongkau 8) Pyidaungsu Biaceihnak kongkau tibantuk thanah pawl cu Pyidaungsu thanah tiin chiah ding tiah aa tial.

Taungkyi Tonpumhnak biachahnak nambar 7 zong hi aa tlak lai riah ka ruah fawn. Biachahnak nambar 7 ah Pyine vialte cu mah tein i uknak nawl tling khitkhet in (Complete Autonomy) a ngei lai ti a si. Pyine pakhat le pakhat, Pyidaungsu zong nih Pyine chung thilcangmi kong ah ithlaknak um lo ding, Pyine uknak lei hoatu kha Pyine President tiah auh ding tiin aa tial.

Hi biachahnak nambar 6 le 7 hi Federal i a muisam a si caah thuk piin ruah dingah thazaang pek nolh ka duh ko. Federal ukning a hmangmi Federal ram kong hlathlai in kan icawn lo ahcun a dikmi Federal ram kan ser kho lai ka zum lo. Anmah le an ram cio ah Pyine phunghrampi a phunphun an ngei cio hna. Anmah Pyine ah mizapi nih an thimmi hna Pyine acozah nih dairek in an uk hna. Bahu acozah asilole Federal acozah nih Pyine kongkau ah an ithlak lo.

American President Donald Trump nih zeidah a chim kan ti a si ahcun Chaklei Korea kong, Israel kong a chim. Hi pawl hi humhimnak le ramdang he aa pehtlaimi kongkau a si. Ngunkhuai kong zong a chim, hihi Federal Tangka lei kongkau a si. Pyine kong he aa pehtlaimi ah zeihmanh a chimmi kan thei lo. Mizapi nih thimmi Pyine uktu nih a uk ko hna. Federal ukning kan hman lai ka ti a si ahcun hi pawl hi icawn awk ah a thami tahchunnak tha a si.

Kum 2018 February 12, Pyidaungsu Neh ah Kawlram President nih Kum zabu 21 Panglong Tonpumhnak i avoi hnihnak tonhpumhnak lio i Federal he aa pehtlaimi phungphai 37 cu hnatlakpi a si cang tiah a rak chim. Cu tibantuk thiamthiam cun a thaizing NCA minthut ni 13 ah Rampumpi Ruahnak petu nih a phichuak a thami ah hi 37 kong hi a chim thiamthiam. Rampumpi buaibainak cu tonbiaruahnak hmang in a phi kawl kha a `habikmi ramrianlei nunphung pakhat a si.

Asinain hi 37 hi Federal acozah ah chiah dingmi nawlngeihnak kan hmu lo. Federal acozah ah zeibantuk nawlngeihnak dah chiah a si lai timi kha kum zabu 21 Panglong Tonpumhnak ah biachahnak tuah a herh. Hi bantuk biachahnak tuah tikah Taungkyi Tonpumhnak lio i biachahnak nambar 6 le 7 bantukin a fiangmi a si a herh.

Cucaah hi bantuk ni sunglawi a simi Chin Miphun Ni ah Panglong Agreement i biachahnak, Panglong Agreement he pehtlaihnak a ngeimi Taungkyi Tonpumhnak Biachahnak nambar 6 le 7 kha a thar in hngalh than dingah thuh pi in chim a hau. Hi hlawhtlinnak i aa tinhmi phaknak dingah Chin miphun kan dihlak tanrual in kan izuam a herh tiin fak piin thazaang kan pek hna.

Be the first to comment

Leave a Reply

Your email address will not be published.


*