KAWLRAM KONG AH TULUK A LUNG AA THLENG

UN thutnak kongah NUG le Kawl ralkap raldohnak Tuluk dirhmun, teinak le sunghnak kong. Tuluk le US karlak ah Kawlram UN thutnak kong he pehtlai in hnatlaknak an ngeicia tiah US hrambunh Foreign Policy nih nizah tih ni September 13, 2021 ah a tial. Zapi cu kan hun lau cio. A zum huaha lomi zong an um. Nain nai hrawnghrang ah Tuluk hi Kawlram a pehtlaih ning a hun thlen ngai tikah thil si kho ngaimi a si ko. Tuluk le US karlak ah zei set dah hnatlaknak a um, ti kan zoh lai.

A luancia zarh khat hrawng in khan US le a hawitha ram cheukhat nih Kawlram le Afghanistan kong ah Tuluk lemsoi hi a rak i thawk cang ti, a si. A bik in UN ah Kawlram kong ceih a si lai caah a zapi caah a thahnem mi hnatlaknak a um khawh nakding khi an i tinh mi a si. US le Tuluk cu ceilak te an i ruah hnu ah hnatlaknak zeimawzah an ngei kho, tiah Foreign Policy nih cun a tial. Tuluk nih thim ding ah a chiah mi pathum. Irrawaddy nih a tial ning ah US le Tuluk karlak biaruahnak ah Tuluk nih Kawlram kong ah biachah khawh mi thim ding pathum a chuahpi, a ti:

U Kyaw Moe Tun nih a rian hi peh ko seh. Nain biachimnak nawl ngei hlah seh. Kawl ralkap aiawhtu Col. Aung Thurein he U Kyaw Moe Tu he an pahnih ning in palai si veve hna seh.Aho hmanh thim veve loin an thutnak hi lawnter i, a hnu ah ceih piak than te ding. Hi pathum lak ahhin a pakhatnak khi US-Tuluk karlak ah hnatlaknak an ngei tiah Foreign Policy nih cun a tial. Russia zong a hnatla ve, ti a si. U Kyaw Moe Tun UN General Assembly ah kai ding in an sawm i, nizan ah khan a kai.

Biachimtu cazin belte ahcun an telh lo. Cucu Tuluk le US kar hnatlaknak ruang ah a si lai, tiah ruah a si. US le Tuluk hnatlaknak timi khi informal sawhsawh a si i, Credentials Committee biachahnak a si rih lo. Credential Committee zong tharchuah a si hlan ah a hlankan in rak i ceih chung mi khi a si. Nain Committee biachahnak a um hlan ah U Kyaw Moe Tun biachimnak an pek lomi khi phunglam lei hoih in khuaruahhar ngai a si tiah Australia in upadi thiamsang Rebecca Baraba nih a chim.

Credentials Committee cu zeidah a si? UN chungtel hi ram 193 an um. Cu ram dihlak nih palai an hun thlah cio mi kha ‘ai tlak maw tlak lo’ tiah a rak zohfeltu Committee an si. Hi Committee hi kum chiarte tuah mi UN General Assembly lai paoh ah tharchuah a si tawn. Nizan September 14, 2021 ah khan tukum ca in tharchuahmi Committee cu an hun thanh cang; Sweden nih Chair in a hruai lai i, Bhutan, Bahamas, Chile, China (Tuluk), Russia, Sierra Leone, South Africa le, US hi chungtel an si lai.Tuluk, Russia le US hi kumchiarte ai tel pengmi an si i, a taang mi thutnak pa (6) hi ram 193 nih an duhmi cio an hun thimmi in a chuakmi an si.

Committee tuanvo: Credentials Committee a rian hi ‘zohfel’ kan ti nain phungning (formality) in hei tuah khi a si i, buainak a um lem lo ahcun an palai sinak cu fawi tein hei lanhter a si. Nain atu Kawlram bantuk buainak a ummi ahcun Committee chungtel ram pawl nih zapi hnatlaknak (consensus) in an tawlrel tawn. Committee nih zapi hnatlaknak an ngeih mi cu UN General Assembly ah an chuahpi lai i, fehternak a tuah piak lai.

Buainak tawlrel ning: Credentials Committee thar cu nizan September 14, 2021 kha a voi khatnak bik an i tong. Kawlram kong lawng ceih ding a si lo caah November thla dih tiang a rau kho. Nain caan karlak chung ah U Kyaw Moe Tun meeting an kaiter mi ah UN chungtel ram pakhatkhat nih complain a tuah ahcun Credentials Committee nih rianrang tein biachahnak a tuah lai. Ram pakhat aiawhtu palai si nakding ah buainak a hun um tik in Credentials Committee an tawlrel ning cu atu lio Kawlram kong tahchunhnak in ka langhter lai. Biachahnak tuah khawh mi phun (6) hna cu:

U Kyaw Moe Tun hi Kawlram palai si seh. Asiloah, Kawl ralkap aiawhtu U Aung Thurein hi Kawlram palai si seh. Asiloah, U Kyaw Moe Tun le U Aung Thurein hi an pahnih ning in UN ah Kawlram palai si veve hna seh. Asiloah, An pahnih in aho hmanh si veve rih hna hlah seh. Thutnak lawnter. Asiloah, U Kyaw Moe Tun nih ‘a rian ning tein’ pehchap chung sehlaw kan ceih piak than te hna lai. Asiloah, U Kyaw Moe Tun nih pehchap seh. Nain biachimnak nawl ngei hlah seh.

Zeidah a cang kho. UN Credentials Committee nih zapi lungtlinnak (consensus) in biachahnak an tuah tawn ti kha ka langhter cang. Cucaah, a cunglei langhtermi thim awk (option) pa (6) lak ah khin pakhatkhat paoh zapi hnatlaknak an hun ser lai. UN kalning kel ahcun pa (5) tiang lawng khi thimding option ah chiah a si tawn. Pa (6)nak khi cu Tuluk nih an saduhthah an hun betchap mi a si. A tlangpi in pa (4)nak tiang khi pianghlang tein biachahnak tuah ding a si.

Nain, khoika lei hmanh pek ding asiloah tlukceo tein pek ding tiah Committee chuntel nih zapi hnatlaknak an ngeih khawh lo ahcun pa (5)nak a simi ‘ceih than te ding’ in an chiah tawn. Khikhi atu lio ah a si kho bik ah ruahmi a si. Tuluk nih an hun betchap mi pa (6)nak zong khi a si kho ngami cu a lo. Nain ‘hihi cu UN kal ningkel a si lo’ a timi zong an um. Palai a simi paoh nih cun zalong tein biachimnak covo ngeih dih ding a si, tiah Rebecca Baraba nih a ti.

Pa (1)nak khi cu Tuluk le Russia nih an duh lai lo caah thil si kho lo tluk a si. Cu bantuk in, NUG lei tang US le Sweden te hna an um ve caah pa (2)nak khi a si kho lomi a si ve. Khi hna pahnih nakin, pa (3)nak le pa (4)nak tu khi thil si kho deuhmi an si. Atu Kawlram dirhmun ahcun NUG le Kawl ralkap nih thutnak i cuh a si. Kaphnih in tanhtu an ngeih veve caah za ah za (100%) teinak hmuh cu a har kho. Amahbelte, atu lio a thu cuahmah U Kyaw Moe Tun hi NUG lei tang a si.

Mah cu, NUG lei caah caantha a tam deuh (အခွင့်အရေးပိုသာ) kan ti lai. Cu pin ah, Tuluk le Russia zong an lung zeimawzat a hun i thlen tik ah ruahchannak cu a hun karhter chin. Cucaah zei biachahnak khi dah chuak selaw NUG sungh a si lai, timi biafunnak cu a tanglei bantuk in a si hnga. Sungh le tei, A cunglei langhtermi thim ding pa (6) chung ah khin: Pa (1)nak asiloah pa (5)nak ning in biachahnak an tuah ahcun NUG nih 100% a tei tinak a si hnga.

Pa (2)nak ning in an chah sual ahcun Kawl ralkap nih 100% tei bantuk a si ve hnga. Hi lawng hi NUG caah 100% sunghnak lam a si. Pa (3)nak ning in an chah ahcun 50-50% veve in teinak an co a si lai. 100% sungh nak cun a tha deuh suaomau hnga. Pa (4)nak ning in an chah ahcun 100% sungh veve a si lai. A tha lo bik mi result a si hnga. Pa (6)nak ning in a si thai sual ahcun 90-99% NUG tei bantuk a si hnga. Credit: June Nilian Sang

References: ABC News. (2021, September 14). UN faces dilemma over which Myanmar Government representative to accept. BBC News Burmese. (2021, September 14). ဦးကျော်မိုးထွန်းပါ စကားပြောခွင့် မရဘူးဆိုရင် အထွေထွေ ညီလာခံ လုပ်ထုံးတွေနဲ့ ကိုက်ညီရဲ့လား. BBC News Burmese. (2021, September 14). ကုလသမဂ္ဂအထွေထွေ ညီလာခံကို သံအမတ်ကြီး ဦးကျော်မိုးထွန်း တက်ရောက်ဖို့ရှိ. Irrawaddy. (2021, September 14). ဦးကျော်မိုးထွန်းကို ယာယီဆက်ခန့်ထားရေး တရုတ်ဘာကြောင့် သဘောတူသလဲ. Lynch, C., Gramer, R., & Detsch, J. (2021, September 13). U.S. and China Reach Deal to Block Myanmar’s Junta From U.N. Foreign Policy. https://foreignpolicy.com/2021/09/13/myanmar-united-nations-china-biden-general-assembly

Be the first to comment

Leave a Reply

Your email address will not be published.


*