KAPA MISSION RIAN ATTUANNAK AH I HLIAMNAK KAN TONMI

Kapa Mission Rian A Ttuannak Ah I Hliamnak Kan Tonmi: 1. KA PA MOTOR ACCIDENT A RAK TONG. Ka pa (Rev. No Iap) cu Matupi ah Evangeliscal Free Church nih an dirhmi Bible siangin ah cachimtu si ding in an rak timhlamh caah 1978 ah kan inchungkhar in kan rak zulh. Asinain 1977 kum ahkhan amah lawng a rak kal hmasa cang. Gangaw – Mindat – Matupi lei lam in motor in a rak kal. Mindat le Matupi karlak in an rak kal lio ah a mongtu pa kha a mit a ku i a motor cu lam thlang ah a tlaak ter.

Lam in pe 150 asimi lamtlang korkuang ah an va tla. Ahmun ah pakhat a thi. RTC motor cu panga ai zulmi an si i a let lomi motor dang i minung nih khan an rak bawmh hna i Matupi sizung an phanhpi hna. Matupi sizung ah adang minung paruk cu an thi tthan. Ka pa he pastor pathum lawnglawng an rak nung. 2. KA U PA NIH KA LU KUAI LAK IN LUNG IN A RAK KA CHEH, Lungler in Matupi cu kan von phan. Kum hnih chung ka pa cu Matupi Bible siangin ah ca a chim. Cu hnu ah Rung ahcun pastor ttuan dingin an rak kan tthial.

Matupi in kan i thawh i khua kan lonh bak ah, lam tlang (ahla nawnmi) ahkhin thingkung sangpi pakhat a um. Cu thingkung ahcun thiahlei a kai liomi khi kan hei hmuh. Lung in ka hei cheh. Ka u pa, Zauk, cu ka hnu lei ah a dir i a cheh ve. Thiahlei ka chep a ti nakah ka lubik bak ah a rak ka cheh sual. Ka lu cu zung hnih kau in a tleek. Ka thi cu tamtuk a rak chuah. Hmatuamnaak kan rak i ken lo. Angki pakhat in ka lu cu an rak ka tuam i lu tuambu, lu fah buin ni hnih chung Ruang tiang kan rak kal,

Pathumnak. PALARO KHUA NIH METHAL IN AN RAK KAN BAWH: Matupi in kan i thawh i Palaro Khua ah riah kan rak i tim. Asinain Palaro khua kan phanh ahhin zan 7:00 hrawng asi. Lam hmah kha a lang tthittha ti lo. Cu lio cu Arakan tapung an rak tthawn lio te asi. Palaro nih cun an khua pawng kan rat thawng cu an rak theih i Arakan tapung ah an rak kan rel i an meithal in an rak kan bawh. Kah an kan timh ah hnakchia le tar he kan si kha an kan hmuh tthan i khual kan si kha an theih tthan i meithal kahnaak in kan rak luat tthan.

Palinak. KAN HOTUPA A KE LUNG NIH FAAKNGAI IN A RAK AH: Rung khua i EFC hotupa (Church chairman) pa nih Matupi tiang a rak kan don ve. Kan thil zong rit ngai in a rak phurh ve. Asinain Lingtui khua le Thotui khua larlak i a ummi tivate kan tan lio ah lunglarmi ai lamh sual i a kezaafaktukin lung harmi nih a rak ah. A thil purhmi a phur kho ti lo. Amah hmanh tthiangtthunh he a kal cang. Kan rak buai ngai. RUANG KHUA AH VAM AWNG IN AN KAN BIH. Rung khua cu kan phan i inn an rak kan sak piakmi ah an kan tthumh ter.

Fangfaak ttin khat an rak chiah cia, voksa thul khat an rak chiah chih. Inchung ahcun kan von lut hna. Asinain aho hmanh nih nan phan cang maw tiah kuttlaih a rak um lo. An khuapi tein an rak chuah i kan inn cu an kulh dih. Kan umnaak inn cu pharh inn asi caah vam-awng tampi a um. An khuapi tein vam-awng in an rak kan bih dih. Upa deuh mit kha cung deuh ah a um, hngakchia deuh mit kha tang deuh ah a rak um. Inchung cun mit lawngte cu kan rak hmuh. Rak lut uh kan ti hna le an zaam dih. Chawnh awk le biaruah awk an rak ttha lo. Ni hnih hnu lawng ah an rak kan ngamh. Credit: Aung Myint Thang

Be the first to comment

Leave a Reply

Your email address will not be published.


*