KAN MAH LE KAN MAH PEI AA KAN SEHTER TAWN KO CU

Chin Unity cu kan herh ngai. Khuachhak Khuathlang tiang a huapmi lungput tiang khi kan herh ngai. Cun Chin Unity sernak ah donkhantu zong hi kan cozah an si pah ve. CBC program (Mindat) an khammi hna kha tette asi. Chin National Dialogue a voi 2nk tuah an kan onh ti lomi hna hi tette asi. Hihi NLD cozah chanah a cangmi kan mithmuh an si. Democracy timi cu Majority Rule kha asi.

Tyranny of the Majority hi fawi tein a cang kho tawn i minority miphun caah dictatorship tluk dengin tih a nung vemi kha asi. Cucaah miphun tampi cawhnak ram ahcun democracy lawng nih a kan humhim kho lo i, Federal system kan herhnak zong cu asi tawn. Amyotha Hluttaw zong cu kan ihumhim kan kilvennak caah sermi kha asi. Cu lawng siloin ram tampi ahcun Affirmative Action le Reservation System bantuk zong kha minority pawl covo humhak kilvennak caah a phunphun an tuah rih tawn.

Cucu phung upadi in humhim kilvennak kha asi. Cun Parliament chungah kan nunphung, kan caholh, kan biaknak kan identity le kan miphun kong vialte he aa pehtlaimi thilah arfang venin a kan venpiak khomi le a chimrel a dirpitu MP phun hi kan herh ngai. Thil poimi cu: Chinmi an si ko zongah Rawn Party chungmi MP cu an chim khawhmi ramri “limitation” a ngei tawn. Temtawntu an ngei tawn.

Peace process kong te hna, security issue te hna, kan miphun kan identity kong te hna kha an nih ca ahcun “sensitive matters” hnaah an cang tawn. Cunglei an party upa hnatlak loin an zalong tein an chimrel kho tawn theo lo. Tikah Chin national interests taktak kha “truly represent” an tuah kho tawn theo lo. Miphun Party MP tu cu zalong tein an duhmi kha ralttha tein an chimphuan khawh. Temtawntu an ngei ve ti lo.

Cucu Rawn Party le Miphun Party MP an idannak pakhat cu asi. Cun Rawn Party in a kalmi MP hi cu Chinmi le Kachinmi an si zongah “ethnic representative” taktak ah relmi an si tawn hna lo. Tlangcungmi party vialte ikomhnak le riantuantinak phun zongah an itel kho ti hna lo. Tikah kan miphun le tlangcung miphun lei kapin an dir thiam tawn ti lo. Thil poimi cu chel ahcun rawn lei upa hna nih anmah lila hi hmangin kanmah tlangcungmi lila kha dohnak hreitlung bantukah a hman tthan tawn hna.

Kanmah le kanmah kha an kan sehter tawn. 1962 Tawngyi conference lioah Chin Phasabala Party hruaitu kha cuticun Tlangcungmi hruaitu hna dohtu ah a rak canmi kha tette cu asi. Cucaah Rawn Party le Miphun Party in MP hi Chinmi ciocio an si zongah an ithlaunak tete hi a um len. Hi ruangah Pyidaungsu Hluttaw ah a tthu dingmi Chin State in MP hmun 21 kan ngeihmi te hi cu a zapi tein Miphun Party chungin an chuah dih hi kan miphun kilven humhaknak caah a biapi ngaimi kha asi.

Hihi a bikin atulio bantuk Political Dialogue caan ahhin a biapi khunmi zong kha asi. Cun party pakhat lawnglawng tamtuk a hleihluat in a tthawn tuk tikah “Elected Dictatorship” ah chuahter hi a fawite tawn. Mithiam zeimaw nih cun tulio zong hi “Elected Dictatorship” nan si, an kan ti. Cucaah Rawn Party pakhat kha tamtuk in mee pek i tthawnter tuk khi tlangcung minority miphun hna kan caah a herh bak lomi khi asi.

Phundang cun Chin ramkulh in MP hmun 21 kan ngeih chunhmite anmah Rawn Party hruainak norms le rules tangah kun dingin pek dih kha a herh bak lomi khi asi. Zeicatiah, Elected Dictatorship a chuahnak hnga a bawmtu menmen ah kan canter khawhmi khi asi. Tlangcung minority miphun caah thil ttha deuhmi cu Rawn Party pakhat nih tamtuk in a tei i olzang tein cozah a ser khawhmi nakin tei kho lo le cozah ser kho lo lakin kan tuah tu kha kan caah a biapi deuhmi cu asi.

Phundang cun kanmah kha amah nih “a herhmi” si lakin kanmah le kanmah kan iser thiam tu kha political game pakhat cu asi. Cu bantuk in electoral democracy hi sullam ngei tein kan hmanthiam ahcun kan caah san a tlaimi asi ko lai ti hi ka zumh mi asi. By Salai Van Lian Thang. Note: Mahhi comment atuahmi chungin theih tthatuk asi caah kan vun lakchinmi asi.

Be the first to comment

Leave a Reply

Your email address will not be published.


*