HRAMHRAM RALKAP UKNAK CU KAN PUPA NIH AN RAK TEI

Ro Cotu Cinrung Gen-Z. Ka pupa hna ro na sin i kan pek hnga cu BAWIPA nih ka kham ko seh. Siangpahrang Ahab nih Naboth cu a thawh i, Na mitsur dum cu ka inn pawngah a um caah an hringso dum ah ka hman nakhnga, ka pe tuah; cun a can ah mitsur dum ttha deuh kan pek lai; cucu a si lo le, nangmah nih a ttha na ti ahcun, a man cu tangka in kan pek ko lai, tiah a ti.

MAL le a ral bawi hna nih kum khat/kum hnih hnu ah ningcang tein thimnak cu kan in tuah piak ko hna lai; chikhat nawlngeihnak kan lak chungmi lawng a si tibantukin biachim le holhrelnak an ngeih tik ah a si kho ding ngai mi thil khi a va lo. Cucu Ahab nih Naboth a lemnak bia kalning bantuk te kha a si ve. Sihmanhsehlaw Naboth nih, Ka pupa hna ro cu kan pe lai lo, tiah a leh.

Cu a dirhmun ruang ah Naboth nih a nunnak tiang a pek. February 1, 2021 thawk in MAL le a ralbawi hna nih zapi dirhmi cozah sin in uknak an fir tik ah thil dik lo an tuahmi huhphenhnak caah lemsoinak a phunphun hmang in mi zapi nun an kan zuar. Tahchunhnak ah 2020 Election cu a dik lo; mi zapi nih an duhmi cozah an thimnak ah a telding an i tello i a tello ding an i tel.

Cu bantuk ruangah ralkap bu nih Kawlram nawlngeihnak kan tleih chungmi a si, tiin vawlei an thanhmi cu lih le hrokhrawl an si kha ni (73) tiang uk firnak chung an tuah sernak mithah, lainawn, tukvelh, midawi le tleihkhih” hna nih fiangkhun in a langhter. Nihin Dohthlennak cu Naboth nih a pupa hna ro a kilven bantukin mi zapi nih kan nuhrin covo kan kilven lawng si loin mah tein zauk pennak a rak ngeimi pupa ro thil kan hlam than a si.

Hramhram ralkap uknak cu pupa hna nih an rak doh, an rak tei! Cu ve bantukin nihin ah kan dohmi uknak thalo hriam bochan in uknak latu ralkap hna dohnak ah mi tampi nih an nun an thap cang, kan thap cio a herh rih ko lai. Cucu a phumi le a hmanmi ro thil caah nun thap a si. Cu hna cu a ra laimi chan caan ah tuanbia roling rel dingmi le hngalh camcin dingmi ro an si te lai. Naboth thi nih profet Elijah a auh” bantukin “nihin nun petu hna an thi aw cu Dingthlu Lairel nih a theih!

Thah a si cangmi Naboth ro a kilven piaktu cu dinnak in bia a ceihtu BAWIPA Pathian a si. BAWIPA nih hi bangin: Uico nih Naboth thi an liahnak hmun ah khan uico nih nangmah na thi an liah lai, tiah na chimh lai tiin Elijah cu a ti.Cu caah kan mah pumpak pakhat cio hi dinnak hriamnam caah BAWIPA nih Elijah a hman bantukin hman a kan duh ve.

Pupa ro a vengtu Naboth bantuk mi raltha Gen-Z hna nih an mah he ro co hawi si ve ding in an kan sawm! Miphun kilvennak caah zapi ttanrual tinak a herh ko.Nihin ah kan mitthli he thlaici kan tuhmi cu Dingthlu Lairel BAWIPA nih lunglawmh aunak he a kan zun ter lai. Thawng ngai le raltha ngai in kan pupa ro vengtu sining in ro cotu dirhmun sinak langhter hna u si. Credit: HCJ

Be the first to comment

Leave a Reply

Your email address will not be published.


*