DR. RUAL UK: TUTAN ZONGAH TIAL LIAN THANG HI A PALH CIKCEK KO

Pathian Dah Ti Lo Minung Cu Apalh Kho. Țial Lian Thang zong Pathian si loin minung a si caah a palh kho i tutan zongah a palh cikcek ko. Kawl ralkap nih țhatlonâk an tuahmi ka thei lo tiah a timi hi a lettalam in a chim sualmi a si. Kawl ralkap nih (kum 60 an kan uk chungah khan mipi caah) țhatnâk an tuahmi ka thei lo tiah ti seh law thil sining le a dik tak takmi a si.

Zeicatiah ‘Tlangcung cawnpiaknâk’ tiah theihhngalhmi le mirâng nih ‘Golden Rule’ tiah min an rak bunh i Lai holh ah ‘Sui Phung’ tiah kan theihhngalh mi ah Jesuh nih ‘MI NIH KA CUNGAH TUAH HNA SEH TIAH NA DUHMI KHA MI CUNG ZONGAH VA TUAH VE’ tiah Mt 7:12 ah a rak timi hi kawl ralkap nih cun a lettalam in an hman i mi nih an cungah tuah hna seh tiah an duh hrim hrim lomi kha midang cungah an tuah lengmang i sualpalhnâk a ngei lomi mi tampi nunnâk an lâk hlei ah ngakchia nunnâk tiang in tam nawn an lâk cang.

Mi nupi le fa dawt an thah hna bangin an nupi le an fa dawt kha mi nih that ve hna seh law an duh hrim hrim lai lo. mi nih an cungah tuah hna seh tiah an duh lomi cu mi dang cung zongah tuah ve lo ding kha Jesuh cawnpiaknâk a si. Cucaah ralkap uknâk nih mipi caah thilțha a chuahpi bal lo ti hi bia sawh sawh si loin a tatak in mithmuh kut tongh in kum 60 chungah mipi hmuhtonmi a si caah mipi caah țhatlonâk a simi cu nunnâk pek tiangin an dohmi hi a si.

Jesuh nih vailamtahnâk ah a sunglawimi a nunnâk tiang pe in a dohmi cu țhatlonâk or sualnâk nih a chuahpimi zungzal thihnâk kha hloh i minung nunnâk ah țhatnâk kha tharchuah in zungzal nunnâk kha pek an kan duh caah a si. Biadangin kan chim ah cun țhatlonak kha lohter dingin nunnâk peng tiangin dawtnâk lungput he Jesih nih a rak doh tinâk a si.

Ralkap hi thi dih hna seh tiah thlacamtu bel an rak um sual ah cun thlacamtu hna kha Pathian si loin minung an si caah an palh kho ve ko. An taksa si loin a țha lomi an lungput tu a thih i a țha mi lungput an ngeih khawh nâkhnga thlacam cu Baibal nih akan fialmi kan rian a si. Pathian dah ti lo minung cu a palh khawh bangin Țial Lian Thang zong a palh kho i Rualuk zong a palh kho. Cucaah kan palhnâk hi kan i hngalh le cângkâ i remh u sih law i ngaithiam hna u sih. Credit: Dr. Rual Uk.

Be the first to comment

Leave a Reply

Your email address will not be published.


*