CNLD KAN DIRKAMH HRIMHRIM A HARH NAK ARUANG, A FIANG BAK HIH

CNLD Kan Dirkamh Hrimhrim A Harhnak Aruang.British uknak in Burma nih zalonnak a hmuh lai ah khan tlangcungmi zong lungtho thanuam tein kan i tel ve khawhnak caah General Aung San nih biakam a rak ngei. Nehgingpoa Kipgen nih a tialmi Democratisation of Myanmar ah kan hmuh khawhmi cu, Myanmar (formerly Burma) zalonnak caah timhtuahbak ngei dingin Panglong Conference an rak kawhmi ah tlangmi zong kawh ve an rak si.

Cutikah British tadinca pakhat ah “If Burma received one kyat, you will receive on kyat” (Burma nih kyat khah a hmuh zongah nan hmuh ve lai) tiah tlangcungmi hna General Aung San nih a chimhmi hna bia langhter a si. Aung San belte Independence kan hmuh hnuah a thi, ralkap uknak toitangah caan saupi chung kan ram cu a um than, sihmanhselaw, democracy thimnak bantukin kum 2010 (?) ah khan kan ramah thimnak kan ngei kho than.

Mikip nih ralkap uknak in luatnak kan duh tuk ruangah Suu Kyi le a party NLD cu kan vote dih.Teinak an hmuh in zeibantuk thanchonak dah kan ram nih a hmuh timi hi ruahawk a tam ngaingai. Kan ruahning bantukin zeibantuk thanchonak hmanh kan ram nih a hmuh loning cu nan i fian cio ka zumh. Kan pale CNA nih federal state kan si khawhnak caah caan saupi chung an nunnak an pek cang.

Sihmanhselaw, nihinni tiangin kan duhmi kan hmu kho lo, kan ram Chin State cu kawl pawl nih an duhning poah in an colcanghpi, thilsining hi lungfim tein ruah tikah lung a fak, hnabei a dong tuk hringhran, hibantukin caan saupi chung kan kal a si ahcun kawl pawl nih kan miphun sinak vialte hi an dolh dih te lai. Gen. Aung San nih kan ram aiawh in Panglong Conference i a kalmi hna sinah a biakam cu a fanu Suu Kyi nih nihinni tiangin tlamtlinter khawh dawh a si ti lo.

Cucaah, kan miphun nih luatnak a hmuh khawhnak caah kan mahtein kan au ve a herh caan a phan cang. Mi tampi nih CNLD caah cozahnak ser a ngah hlei lai lo tiah nan chim, sihmanhselaw hihi philh hrimhrim hlah, duh le cozahnak cu ser kho lo ko hna seh, sihmanhselaw, kan miphun nih luatnak (federal) kan duh tuk ruangah mah tein uknak kan duh i, lungkhat tein kan miphun party kan dirkamh timi hi Kawl pawl nih an theih ve hrimhrim a herh cang.

CNA nih thazaang he hriamnam he an colcang, cubantuk colcanghnak cu politics zongin dirkamh an herh, cucaah, lungkhat tein kan dir khawhnak caah CNLD rak dirkamh cio u. Kan ram Chin State hi kawl pawl nih an uk dih cang, an ramchung i a ummi kan si caah uknak nawl cu nei ko hna hmanhselaw kan miphun sinak vialte kan humhak khawhnak caah federal uknak kan ngeih hi a herh tuk hringhran timi philh hrimhrim hna hlah u sih, na miphun na dawt ahcun CNLD rak vote hrimhrim u.

Atu hi politics leikapin Chin miphun lungkhat tein kan dir timi langhternak caah CNLD nih teinak a hmuh hrimhrim a herh, kawl pawl nih an miphun party hmanh nih an ramah teinak an hmu kho lo tuah a kan nehsawh lonak hnga rak dirkamh cio u. Na miphun a mualpho lonak caah CNLD rak dirkamh hrimhrim dingin mikip kan sawm cio hna. By, Ventea Hlawnching

Be the first to comment

Leave a Reply

Your email address will not be published.


*