CNF LE CNLD CU A CHUNG LE A LENG LAWNG AN SI KO

CNF le CNLD. CNF cu Hluttaw lengin national politics a khelmi an si. CNLD zong Hluttaw chungin National politics an khel ve.Cucaah cun CNF le CNLD hi aa khat in ka hmuh hna. CNF ka ttanh bantukin CNLD zong ka ttanh ve.Ka khuaruah a harmi tucu CNF a ttanh ngai i chawva lei zong in thazang tampi a chuah mi nih,

CNLD an phomh len i NLD an hei ttanh ngaimi,,, le,,, CNLD a ttanh ngai mi nih CNF ca thawhbur ah fangkhat te zong an thawh duh lomi khi, national politics timi hi keimah kaa fian lo maw a si, anmah an i fian lo dik a si? Keimah caah cun CNF le CNLD hi aa khat in ka ruah hna. A chung le a leng long an i dang.

Cheukhat nih an policy zoh loin pumpak in kan zoh ruang tu ah ruahnak aa dang si kho men. Nain policy ah hram bunh loin pumpak ah kan bunh sual ahcun hram kan bunhnak pumpak minung (eg. ASSK) a thih tik ah kan thi dih ve sual kho men.Cucaah cun keinih cun CNF le CNLD ka ttanh ning hna aa khat bak. Note: Keimah pumpak dirhmun. Credit: Salai Biak Tum Lian

Relchih ding:Halkha CNLD le CNLD CEC rianttuanning hi lungfim tein khua a cuanmi nih cohlan awk a ttha maw? CNLD CEC nih Thantlang CNLD chairman le secretary cu “Candidate thimnak kongah ningcang loin nan cawlcang” tiah an rian lawng hmanh si loin party chungtel sinak tiangin an phuah hna. Thimnak cu political party caah a biapi tuk hringhranmi thil (process) a si caah ningcang loin a tawlreltu hruaitu poah cu dantatnak pek hi caansau hmailei partly lamthluan caah thiltha a si ko lai tiah ka zumh.

Sihmanhsehlaw, Halkha CNLD hruaitu pawlnih MP candidate thimnak kongah ningcang lo tukin an cawlcanghnak tu cu CNLD a dirkamhtu mizapi nih soisel le dohkalh a um lo hlei ah CNLD CEC zongnih an lungtlin pi ko rua.Halkha CNLD nih MP candidate thimnak an tuahmi ah Saya Robin Zaathang nih Pu Ngun Maung cu Pyituh Hluatdaw caah a tei. Asinain, caan zeimawzat a kal hnu ah Pu Ngun Maung nihcun a sungh cangnak meehmun cu independent in cuh aa tim tthan.

Phundang in chim ahcun Pu Ngun Maung cu CNLD chuahtak in an ral ah aa ser.CNLD party in Halkha Amyota Hluatdaw ah MP cuh aa timmi Pu San Tin Mang cu Election Commission nih cuhnak nawl a ngeilo (disqualified) an ti tikah CNLD nih Pu Ngun Maung cu Pyituh Hluatdaw ah an party min in an cuhter t’han i Saya Robin tu cu amah lungtling tein Amyota Hluatdaw ah aa tthial.Saya Robin lungput cu uar a um tuk nain Halkha CNLD hi lungrawk an si.

Party nih candidate ah an thim lo caah independent in MP cuh aa timmi minung cu mizei an si zongah party chungtel sinak in an phuah hrimhrim ding hna a si. Atu cu MP cuhnak hmunhma lehlam an pek t’han. CNLD CEC zongnih atutiang ah t’uanvo ngeitu dantatnak tuah cu chim loin thil sining fianternak an tuahmi hmanh a um lo tikah zoh a chia tuk hringhran. A ngaingai ti ahcun Thantlang CNLD hruaitu an phuah hna bantukin atu thil kongah t’uanvo ngeitu Halkha CNLD hruaitu hi an phuah ve hna ding a si.

CNLD cu anmah hrimhrim nih “phungphai reprai te he Chin Miphun aiawh in a dirmi party, hruaitu minung pumpak cung menmen ah aa hngat lomi party kan si” an ti lengmang fawn tikah atu bantuk thil sining hi lungfim tein khua a cuanmi Laimi (Chin) poah nih cohlan awk a t’ha lomi thil a si ka ti. A bikin candidate thimnak kongah ningcang nan buar tiin hruaitu rianphuah a tongmi Thantlang CNLD party le Thantlang peng mizapi nih cohlan awk a t’ha bak lomi thil a si.

Note: Hiti ka chim tikah pumpak in Pu Ngun Maung ka hua lo i CNLD party ka dohkalh hrimhrim lo (CNLD in Thantlang peng ah MP aa cuh dingmi, Salai Van Bawi Lian le ChinChin Pekthang hna cu ka lung an tling tuk). Laimi le Thantlang peng minung pakhat dirhmun in thil sining ka cuanh tikah ka lungtlin lomi ka chim bia a si. Credit: Biak Hnin Sang