CHUNGKHAR NIH KHOIKA HMUN PAOH AH KAN KALPI LAI AN TI CANG

Ralhrang hna nih ngeihthiamnak an halmi cu chungkhar hna nih an cohlan lopin ah biadik a chuah khawhnak dingah hmunkip kan kal lai an ti. Ralhrang kawlralkap or palek hna nih sualnak ngeilo an tlaih i, an thah hnu ah chungkhar hna cu ting 30 in ngeihthiam an hal hna. Thilsining cu hitihin a si. Ayeyarday ramtthen Mya Aung Myone Tha Pye Gone khua ah mino pathum hna cu August ni 7 zingah an tlaih hna.

Atlaitu hna hi palek pakhat le uniform zong aa hrut lomi minung pakhat an si. Biahal ding kan in ngei hna tiah an tlaih hna. An tlaihmi hna mino pathum lakah kum 21 a simi San Win a nunnak aliam. A tlaitu palek nih a chimmi cu keimah bak nih nungdam tein inn ah ka rak chiah tthan lai tiah a nu le a unu sin ah bia a kamh hna. Asinain San Win cu a nunnak a liam.

August ni 9 ah San Win a tlaitu palek le a hawipa cu chungkhar hna inn ah an rak ra i, San Win a thihnak kong an chimh hna i, tangka ting 30 in ngeihthiam an hal hna. Rak kan ngaithiam hram ko uh tiah tangka tin 30 in nawlnak an tuah hna. Hi konghe pehtlaiin San Win a u Nu nih a chimmi cu zingka ah ka naupa cu an tlaih i, myone zohkhanhtu kan si tiah an chim.

Asinain zeiruangah dah an tlaih timi tucu an chim lo. Kan rak chiah tthan ko lai tiah bia an i kam. A thaizing ah kanu cu palek sakhan ah a vakal. Asinain kanu cu an rak hro i a rak ttin tthan. A zan lila ah ka nau a thihnak kong cu sang mipi hna aw-an in kan theih. Ka nau cu zeibantuk buainak hmanh ah aa tel lomi daitein a ummi a si tiah a chim. San Win thihnak kongah biadik a chuah khawhnak dingah hmunkip ah kan kal lai tiah an chim.

Thawngpang dang: Nizan Falam peng ah ralhrang hna nih thihlohnak an chuahtermi kongah tlamtling tein an langhtermi a si. Falam khua in mengruk hrawng a hlatnak Lungrang ah minung pakhat cu ralhrang kawlralkap hna nih nizan zingka meithal an puahkah ruangah a nunnak a liam. A nunnak a liammi hi AG khrihfabu Pastor nupi Pi Ngeih Tling a si tiah an langhter. Pi Ngeih Tling hi kum 60 minung a si. Lungpi or Lungrang khua ah hin ralhrang kawlralkap hna nih zaan in zing tiang, zankhuadei ti awk in meithal an kah puah, Khuami hna cu zing ah Zalai khua lei panh in kal an i tim hna.

Cu an i timh cuahmah lio ahcun Pastor nupi kum 60 a si cangmi Pi Ngeih Tling cu meithal kuanfang nih a khennak hi a si. Hi konghe pehtlaiin Falam khuami pakhat nih a chimmi cu Thilri an thir cuahmah lio ah ralhrang kawlralkap kuanfang nih hin a khen. Falam sizung ah rianrang in kalpi colh a si ko nain sizung an phak hnu caan raulo te ah a hliamtuar loin a nunnak a liam tiah a chim. Tutan thil a cangmi kong he pehtlaiin CNO/CNDF nih a tanglei bantuk in an langhter.

Ralhrang kawlralkap hna nih zingka zongah Falam in Tatlangrawn khua lei ah aa thlopbul mi an tlun lei ah naupaw pakhat le cycle a mongtu hna zong an kah hna i, nau a pawimi hi a el ah an kah i, cycle a mongtu cu ralhrang kawlralkap hna nih an tlaih tiah theih a si. Cun Zalai khua zongah kum upa a si cangmi nu pakhat zong tihphannak ruangah aa thup.Cu aa thupmi cu an kah i, a dirhmun zong thinphang ngaingai a si ko tiah an chim. Falam khua pawng ah a ummi khua hna ah zeisualnak pakhat hmanh a ngei lomi hna an tlaih ruangah Falam in Rih lei ah siseh, Falam in Hakha lei ah siseh a hohmanh kal rih lo dingin CNO nih thanhnak an tuah.

Be the first to comment

Leave a Reply

Your email address will not be published.


*