SAYA RUNG KAW DIRHMUN CHIN TLANG HOLH KONG AH

Chin Tlang Holh ah Saya Rung Kaw Dirhmun.Chin Tlangholh caah Mirang Holh siseh ka rak ti bal ve.Tithuk nak lei panh in; Ka thlam ka samh ve tik ahcun: Nunphung, Caholh, Ram he tiah Miphun sinak, tling khitkhet tein a ngeih ve mi, CHIN Miphun nih Ramdang le Miphun dang holh hmang cu; asi khawh lo kha Ka hmuh.

Damascus hauka ah Mithiang Paul cu; “CEUNAK” nih a kah phun in; Chinism nih a ka kah ve tikah, Ka Ramkhelh ningcang le ka Philosophy aa thleng dih ai.Mirang holh cu thiamding bak asi. Vawlei pi hmai ah Chin mi dotla mi kan si ve nak hnga, Mirang holh kan thiam dih a herh. Thiam ding zong ah cawn a herh fawn. Abiapi tuk hrinhran. Sihmansehlaw Tlang holh si theng mang, a herh nak ka hmuh lo. Zeicahtiah Mirang holh cu Chin mi kan holh asi lo caah ka cohlan kho lo; Tlangholh siding in.

Mah le Khap tawk tein Chin Tlangholh Kong ah; ram ka vai ve. Zopau, Laizo, Mizo, LAI HOLH (Hakha), tbk in ka hmuh hna.Cu vialte Chung in “Resources le Documentation” timi (a herh mi thilri, minung le caruk hna zohchun in) chirhchan in Tlangholh caah a ṭhabik mi le aatlak bik mi tiah ka hmuh mi cu: “Chin Jerusalem Khualipi Holh” tu asi. Aruang hna:

Pakhatnak. Miluzat le Miphun Ṭenge hna nih kan hmang tambik mi asi. Chin Jerusalem Khualipi holh cu; Hakha peng, Thangtlang peng, Matu peng, Kanpelet peng Cheukhat, Mindat peng Cheukhat, Kalay-Kabaw, Gangaw-Ṭhilin peng Cheukhat, Paletwa peng Bawmram le Bangaladesh Bawm ram tiang, India ram, Mizo ram LAI khua hna, Lawngtlai le Saiha district tiang in, tbk le Mission hna an tufa hna (Mirang, American, Europe um mi hna) tiang in kan hmang cuah I kan thiam mi Holh asi fawn.LAIZO le ZOPAU he tahchun ahcun a hmang cuah mah mi kan tam dueh tuk hrinhran caah CHIN Tlangholh si ding ah timhcia tein a si btk in asi zong asi cang ko tiah ka zumh bak.

Pahnihnak. LAI CA HOLH thiambak mi hna (Human Resources ah a tling dih cang): Linguisitic timi holh lei thiamhlei nak fimnak lei ah Dr. Keneth Van Bik, Dr. Stephen Hre Kio, Herbert Ceu Hlun, Richard Zatu, Stephen Ni Kio (Keimah theih tawk lawng), tbk LAIHOLH he pehtlai in cawn piak tu le ṭhihruai tu mifim tam pi kan ngeih hna. Zeitik caan poah hmang khawh an si fawn. Cozah hnatla pi lawng lawng aherh.

Pathumnak. LAICAHOLH le Nunphung Rian ṭuan tu bu (Organization Resoruces): CACC nih rianṭuan nak hi Falam peng, Tedim peng le Tonzang peng dah tilo cun LAITLANG vial te ah a huap dih ngawt (Kalay – Kabaw, Mandalay, Maymyo, Lashio, Rangoon, tbk tiang in). Cu caah LAIHOLH cu Tlangholh si ding ah cham bau nak pelte hmanh a ngeih ve ti lo. Cozah bawm nak um loin a ṭuan khawh ding mi phu / bu an si caah, Hmai lei CHINTLANG holh kilven, zohkhen, thiam ter in cawn nak ah Ṭuanvo a lak kho ding an si fawn. Cozah nih cu Ṭuan ding ah nawl pek lawng lawng a bau mi asi.

Palinak. Cawn nak sang ah LAIHOLH: Australia ah College level tiang an cawn I harnak pelte hmanh a um lo ti cu CHIN MI nih theih cia asi. CCU le Rangoon Bible siang Inn tampi ah an hmang cuah mah mi holh asi caah Chin Holh dang hna nak in TLANGHOLH siding in timhcia asi deuh ko ti kha, a fiang ter chin chin.

Panganak. Chin mi nih thiam bik mi asi. Khualipi holh asi caah, CHIN RAM peng kua in kan thiam I kan hmang cuah mah lio holh asi. Cozah rianṭuan mi, khuasa thai mi, khual tlawng langli an tam bik nak Khualipi asi. Chinram kulh peng kua chung minung tling tein khuasa in rianṭuan nak Hmun asi. Cu caah Chin Khualipi holh hi chin mi vialte nih (Peng kua in) kan thiam dih cang mi Holh asi ko tiah thawng kan Thanh hna.

Paruknak. LAIHOLH le LAICA chimhtu ah hmailei hmang rua hna: Hakha ah, Cozah rianṭuan mi hna an pension tikah; An mah lila kha an pengkulh cio le khuakip ah LAI CA le LAIHOLH chimtu ah hmang khawh an si. Cozah nih thlahlawh an pe kho lo zong ah CACC nih a pek kho tuk hna. Pension la hnu ah thadam tein pawcawm nak hmuh nak rian ṭha bik asi te lai. An ṭuan duh fawn lai.

Pasarihnak. Cawn nak caah a herh mi Ngunsawm le a dang a herh mi hna: Ramchung Ram leng a um mi CHIN MI tam deuh nih har nak pelte hmanh um loin an kan bawm khawh fawn. Kan ram cu sifah ram kan si caah, COZAH nih Tlangholh caah ngun sawm an kan bawm khawh lo ahcun; CHIN MI nih bawmh khawh tuk mi asi. Bawmh ding zong ah timhcia in aum mi an tam deuh ve.

Pariatnak. Tehte dang hna: Bible, Dictionary, Biazai, Nunphung, Tuanbia, Lenhoi, Pathian ThangṬhat nak hla le Zaihla dawh phun tling, Thawngpang, Tadinca, Lemcang le Zuk phun phun, Muitawn, tbk in Bia le hla, CAHOLH le Nunphung ah tlingkhit khet tein (Chambau nak um lo tein) a um fawn. Cung lei chirhchan le Tehte vialte hna hmang in CHIN TLANGHOLH caah cun CHIN MI PHUN hna Kan Jerusalem KHUALIPI, Hakha holh hi a si tiah,

Pakuanak. Hakha HOLH Tlangholh kha LAIZO holh ti khawh asi. LAIZO le Hakha cu Mirang holh (English) le American Mirang holh (American English) btk ansi. Cu caah Hakha holh tlang holh asi mi cu phundang in LAIZO holh asi ve ko tiah 100% ti khawh a si ve ṭhiam ṭhiam ko.Credit:Saya Rungkaw