APOI BAK, RALHRANG NIH RUAK RAK LA UH CHUNGKHAR AN TI HNA

Mandalay thil cang cu alinsa taktak ko cang. Nihnih chung tukdohnak ah civil lei in minung pakhat a nunnak aliam. Lamzawhnak biatak tein alinhsatnak hmun Myingan ah minung pakhat a nunnak aliam. Mandalay region ah a ummi mipi hna cu ralhrang kawlralkap he tukdohnak a chuak tthan. Nizan Myingan buainak ah ralhrang hna nih minung pakhat an kah thah tiah an langhter cang.

Ralhrang kawlralkap hna nih zingka suimilam paruk hrawngah mipi an umnak ward pathumnak le palinak cun paruknak hna cu biatak tein an kah hna tiah khuami nih an chim. Hi konghe pehtlaiin mit hmu tu nih a chimmi cu Chindwin Lakphak dawr ah ralhrang kawlralkap hna nih an kah i a tlu. Mipi nih an vun zuanhnawh cuahmah lio ah ralhrang nih an kalpi diam tiah an chim.

Culawng siloin ralhrang kawlralkap hna nih an kahthah mi hi zeitik caan ah dah a thih timi theih asi lo. Ralhrang kawlralkap hna nih chungkhar sin ah thawngthanhnak an tuah mi cu a thi cang tiah an thanh hna ti asi. Cun a ruak zong tuzing ah nan rak lak lai tiah an chimh hna. A nunnak aliammi hi ward 11 nak ah a ummi a si tiah Myingan Public Movement Committee hna nih an chim.

Tutan Myingan Lanmadaw i, lamzawhtu hna an i runvennak hi ward 6nak ah a ummi asi i, i runvennak caah biatak tein an hmannak hmun zong asi. Hi hmun le hma cu zarhpini ah khan ralhrang kawlralkap hna nih an hrawhpiak hna. Asinain khua mipi hna nih nizan ah khan thatein an tuah tthan nain ralhrang nih an hrawhpiak tthan hna.

Ralhrang kawlralkap hna nih lamzawhtu an buai kah hna lio caan ah Ward 3nak hmun le palinak hmun ah a ummi mipi hna nih ralhrang kawlralkap an lung buainak dingah tiah lamzawhnak an rak tuah tthan ve. An mah lila zong ralhrang kawlralkap hna nih biatak thlak in an tukdoh tthan hna tiah an chim chih. Ralhrang kawlralkap hna nih cycle pali le bawmchantu motor zong an hrawhpiak dih hna.

Culawng siloin biatak tein lamzawhnak tuahnak ah rian a ttuanmi minung pakhat zong ralhrang kawlralkap hna nih a inn vialte an hrawh piak dih pin ah thilri tthenkhat zong an fir dih tiah Myingan ah a ummi hna nih an chim. Nihnih chung ralhrang kawlralkap le mipi buainak ruangah civil lei in minung pathum hliam an tuar rih tiah an langhter tthan. Cun minung paruk zong an tleih hna i, hi chungah kum 13 te lawng asi rihmi zong aa tel tiah an thanh.

Tutan buainak a chuahnak hmun Myingan khuachung ah hin a liamcia ralhrang kawlralkap hna nih uknak an lak February nikhat in thok in minung 24 an nunnak aliam cang. Ralhrang kawlralkap lei zong minung zeimawzat hliam hma an pu ve. Kawlram buainak a chuah hnu ah tuchun nitiang ah a nunnak aliammi hi minung 738 an si cang tiah Association for Political Prisoners nih an chim.

Be the first to comment

Leave a Reply

Your email address will not be published.


*