AHO NIH DAH MAH BIA HI AN CHIMH HNA? AHO SIN AHDAH AN LAK HNGA?

Party komh Cozah timi Tactics.2015 thimnak lioah cozah a tlaihmi cu USDP a si. Ramkhel bia an chim lioah USDP MP cheukhat nih caan khatnak (term) ah kan ram caah thil tha tampi kan tuah. Tukum zong kanmah USDP nih cozah a tlaih than ding a fiang ko caah Me kan pek than ko u an ti. Cheukhat nih cun NLD cu cozah a kai lai lo, teinak a hmuh zongah kanmah nih Nawlngeihnak kan chuh than ko lai, kannih cu Rulpi pei kan si cu, kan duh lo le a dolh khawhmi pei kan si cu an ti i mipi zong nih a si khawhmi thil a si.

USDP nih cozah a kai than ko lai an ti i, USDP a pekmi tampi an um ve.NLD MP a cuhmi pawl nih kan ram hi a rawk tuk cang. Kan ram sersiam than dingah NLD hi Me pek cang u tiah an chim ve. Kawlram mipi vialte nih tukum hi USDP maw teinak a hmuh hnga, NLD nih dah tiah Result hngak cio a si. Redult a vun chuak taktak tikah cun NLD nih teinak a hmuh i kum (5) chung a kan kalpi cang.

NLD nih kum (5) chung a kan kalpinak ah cawlcang kho lomi le covo ngei lomi hruaitu tampi nih anmah cawlcang khawhnak le covo hmuh khawhnak caah party an dirh cio. Ralkap ruangah tem-innak le tuarnak kan ton lio ah cun NLD cu tanh cio a si i atu cu zalawng deuh a si cang caah NLD cu doh than in NLD thatlonak le NLD thadernak lam an kawl cang. Ralkap nih zungzal uknak lak a timhmi zong a poi an ti ti lo.

Hlanlio ah an tih bikmi le an huat bikmi ralkap cu anmah caah bochan bikmi unau a si than cang. NLD tanh ti loin a dohmi party vialte kan ram thatnak a duh lomi ralkap uknak tangah zungzal um a duhmi lawng an si timi a fiang tuk cang.NLD nih cozah a peh ding a duh lomi party hruaitu tampi le cheukhat pawl nih 2020 thimnak ah NLD nih cozah kai khawhnak lam a um ti lo. Tukum cu Party-komh cozah (coalition government) a si cang lai tiah Tactics an chuakmi cu theih cio a si.

Ralbawizik Min Aung Hlaing zong NLD nih cozah a peh ding a phang tuk caah a rian a si lomi party hruaitu pawl a sawm hna i ruahnak phunphun a ceihti hna.Tukum thimnak ah NLD nih teinak a hmuh khawh lo dingah zeitin kan tuah lai timi agenda tehna a ceihti hna. August thla chungah USDP party le Party dang (29) nih Kawi an ser. Party (34) zong nih Ralbawizik he NLD kai khawh lonak ding caah a phunphun khua an ruat.

An mipi hngalh loin anmah party hruaitu pawl le ralbawizik he a tongmi party (74) an si. Cu party vialte ralkap he hmunkhat tein a dirtimi lawng an si. An mipi belte zeihmanh an theih lo. Kan hruaitu pawl hi kan ram thatnak caah khua tampi a ruatmi an si tiah an zumh rih ko. 2020 thimnak ah NLD nih cozah a peh kho ti lai lo caah Party-komh Cozah a si lai timi bia hi khuaika hmun ah an char, aho nih an chimh, aho sinah an lak hnga?

2015 lioah party 91 lawng nih thimnak ah a lut caah NLD nih teinak a hmuh. Tukum cu party tampi thimnak an lut caah teinak a hmuh ti lai lo tinak a si maw? NLD cozah nih 2008 phunghrampi ka remh lai a ti i a remh kho lo caah
NLD cu a sung cang lai tinak a si maw? NLD nih Pohmah 261 a remh duh lo caah tukum cu a sung cang lai tinak a si maw?

NLD cozah chungah eihmuar tampi a um caah a sung lai tinak maw a si? Eihmuar cu ram sifak kan si chung cu tam le tlawm a um rih lai. Party dang chinchin a si ahcun a let in a tam deuh lai.2015 lioah miphun party nih ramkulh cozah a tlaih kho lo timi upadi an hngalh hlanah miphun party nih an ram ah cozah tlaih khawh dingah hechet tiah an cawlcang i Rakhine ramkulh le Shan ramkulh ah tamdeuh an tei nain pohmah 261 ruangah cozah an tlaih kho lo.

Tukum zong zei miphun le zei party nih teinak a hmuh zongah ramkulh cozah cu Baho (Central cozah) nih a tlaih ding a fiang ko caah hruatu pawl nih cozah kan tlaih khawh lai tiah an mipi an hlen zongah lungfimmi mipi nih an zumh ti lai lo, me pektu mipi nih cun Baho ah cozah a kai dingmi party MP lawng an pek cang lai ti a fiang ko.

USDP nih cozah a peh than te lai ti lio hmanh ah NLD nih MP seat 390 a hmuh i party dang dihlak nih MP 101 lawng an hmuh ko ahcun 2020 chinchin cu teinak hmuh ding a fiang tuk ko.Teinak hmuhnak caah “Tactics” cu hman phung si ko nain ramkomh cozah timi biafang hi cu Thluak Tuaktannak menmen si ko.NLD kai ding duh lo ruangah Party-komh Cozah a si lai timi thluak hmannak tehna, Covod-19 ruangah thimnak nithla thawnh ding timi bia tehna hi NLD teinak hrawktu ding caah Tactics” an chuakmi a si ve. Na khua le ram ‘na khuaram’ thanhcho ding na duh taktak ahcun cozah a kai dingmi party cu NLD hi a si ko. Credit: Laiki Cozah

Be the first to comment

Leave a Reply

Your email address will not be published.


*