YANGON INSEIN THONGAH KHUARUAHHAR THIL A CHUAK

Nizan Yangon thonginn ah khuaruahhar thil a chuak. Vawleipi theih tiangin langhter asi. Yangon insein thonginn chungah duhlonak au thawng fakpi in a chuak. Dothlennak ah teinak kan hmuh hrimhrim lai tiah an au hna. Faktuk in authawng a chuah ruangah ralhrang tampi hna nih hriamnam he an kal hnawh hna i, thongchung ahcun an luh hnawh hna.

Duh lonak a langhtermi hna cu ralhrang kawlralkap hna nih an hrem an vuak hna i, a nunnak aliammi zong an um tiah thawngpang langhter asi. Hi konghe pehtlaiin kawlram thongtla pawl abuapitu buu chungah lutlai pakhat nih a chimmi cu Insein thonginn chungah thongtla tthenkhat hna cu duhlonak an langhter i, cu an au mi hna cu a tanglei bantukin a si.

Kan thisen a dai lai lo tiah an au, ram buainak ruangah thongtla pawl chuah dih hna uh, thongchung ah a dam lomi thatein zohkhanh hna uh tiah an au hna, Thonginn chungah covid zawtnak akarhtuk cang i, thatein zohkhanh an si lo timi hi thil acanning in theih khawhtuk a si. NLD chungtel U Nyan Win cu covid zawtnak in a nunnak aliam, Cun a sihni Kyaw Hu, Han Thar Myint le Min Twin Thit hna zong an ngei.

Thatein zohkhanhnak an tuah hna lo caah halnak tuah asi, cun thonginn tuanvo ngeitu hna zong thongtla pawl duhning in tuahpiak dingah kan hal rih i, kan tawlrel lai tiah a chim. Sihmanhsehlaw zanlei suimilam panga hrawngah ralhrang kawlralkap pawl motor 7 in an hriamnam he thongchung ah an lut i, duhlonak angeimi hna cu an hrem hna. Hliam faktuk in a tuarmi tamtuk an um i, a thi dingmi zong minung 8 an um, fiangtein thilsining theih dingin kan i zuam lio asi tiah RFA ah a chim.

Inside Insein | Frontier Myanmar

Thawngpang dang:Mindat CDF le ralhrang kawlralkap karlak ah i kahnak a chuak tthan. Nizan zanlei suimilam pali le minute pakul ah ralhrang kawlralkap le Mindat CDF hna cu Mindat Nitlak lei ah an i kap tiah an langhter. Matupi in a rak rami ralhrang kawlralkap hna cu Mindat nitlaknak lam, meng 60 hrawng a hlatnak hmun ah nizan ah khan Mindat CDF he an i kap tiah theih a si.

Culawng siloin Mindat nichuahlei zongah ralhrang kawlralkap le Mindat CDF hna cu chun suimilam pahnih le cheu hrawngah an i kap tthan. Hi i kahdohnak ah kaphnih lei in a nunnak a liammi le hliam a tuarmi zeizatdah an si timi theih asi lo. Ralhrang kawlralkap le Mindat CDF hna cu July ni 20 in 23 tiangah voithum an i kap cang. July 22 ah CDF lei in minung pakhat a nunnak liam. Atu tiang ah CDF Mindat lei in a thimi hi minung 24 an si cang tiah an langhter.

Be the first to comment

Leave a Reply

Your email address will not be published.


*