YANGON AH RALHRANG NIH TUAH HRAM AN THOK THLUAHMAH CANG

Ralhrang kawlralkap nih thil tuah hram an thok cang. Ralhrang kawlralkap hna nih Yangon ah mei man a pelo mi hna cu an mei hri an hrawhpiak cang hna. Yangon khuachung Kamayut, Northern le Dagon Seihkan telh in Township tam deuh ah nizan chunhnu thok in ralhrang kawlralkap hna nih Cycle in an chawh hnawh hna i, mei man a pe lomi hna cu an mei hri an chahpiak hna tiah theih a si.

Northern Dagon ah mei man peknak zungin an mei hri hna cu an chahpiak hna i, Norther Dagon Pinlong lampi No. 37 ah hin tam ngai an meihri an chahpiak hna ti a si. Hi konghe pehtlaiin minung pakhat nih a chimmi cu kanmah inn pawng hrawng zongah ape lomi kan tam ngai. Mei man peknak zungah rianttuantu hna an rat hnu ah kan mei cu a rawk colh tiah a chim.

Hi bantuk thiamthiam in Dagon Seihkan Township chung No 58 zongah inn kip ah an kal hnawh hna i mei man a pelomi hna paoh cu ralhrang kawlralkap lei nih an mei hri an chahpiak thluahmah tiah an langhter chih. Mei man kan pek lo ruangah inn kip ti awk mei hri an chahpiak hna i, a tuhi sang dang an kal hnawh cuahmah hna i, meiman pe colh aa kan ti tiah khuami pakhat nih a chim ve.

Mei man konghe pehtlaiin tuan deuh ah NUG cozah nih meiman nan pe lai lo tiah thanhnak an rak tuah cang. Culawng siloin mei man a halmi hna cu leirawitu ah chiah an si lai tiah an rak langhter cang. Tutan ah ralhrang kawlralkap hna nih meiman a pelomi hna cu an mei hri an chahpiak cang hna.

Myanmar military gets billions from profitable business: Amnesty | Human  Rights News | Al Jazeera

Thawngpang dang: Myanmar Ah NUG Cozah Lawng A Um, NUG Lawng Hi Kan Bawmh Lai: Japan Hlutdaw Palai Hna. Myanmar ah 2020 thimnak kha vawleipi nih a cohlanmi a si bantukin Myanmar ram ah NUG cozah lawng a um, cozah dang an um lo tiah Japan Lower House (House of Representatives)palai, Myanmar-Japan Hlutdaw Palai Hna Hawikomhnak Bu Chairman le Myanmar Democracy tha a petu hlutdaw palai hna bu Vice Chairman a simi Mr. Ichiro Aisawa nih a chim.

July 6, 2021 i NUG Cozah Union Minister hna le Japan hlutdaw palai hna online tonnak ah a cunglei bantukin Mr. Ichiro Aisawa nih a chimmi a si. Cu lawng si loin 2020 thimnak ah a dik lomi a um tiin ralkap nih nawlngeihnak an lakmi cu cohlan khawh a si lo, November, 2020 thimnak cu a dik a hmaanmi i vawleipi nih a cohlanmi a si, thimnak i teinak a hmumi palai hna le tlangcungmi hruaitu hna fonh in dirhmi NUG cozah hi kan zumh i Myanmar ram ah cozah dang hrimhrim an um ti lo, tiah Mr. Ichiro Aisawa nih cun a chim chap.

Tutan tonnak ah Japan hlutdaw palai hna nih ralkap nih nawlngeihnak an lakmi cu an cohlan khawh hrimhrim lonak le Myanmar ram nih democracy tling a hmuh khawhnak dingah NUG cozah he naihniam tein riantuan an i timhnak kong an chim cio. Tonnak ah Lower House palai Mr. Ichiro Aisawa (Japan-Myanmar Hlutdaw palai hna bu Chairman),

Upper House palai Mr. Michihiro Ishibashi (Myanmar democracy thapetu hlutdaw palai hna bu chungtuan), Mr. Yutaka Nagasugi (Japan-Myanmar Friendship Association Vice Chairman, MYANMAR JAPON CO.,LTD CEO) le Mr. Toshio Tanabe (Journalist) hna an i tel. NUG lei in International Cooperation Vuanci Dr. Sasa le midang hna an i tel tiah theih a si. TCP

Be the first to comment

Leave a Reply

Your email address will not be published.


*