VIDEO: KAN MP PAWL ZONG AN LUAT TILO, ATTHUAT CHIH HNA

Tuchun Hakha ralkap duhlonak langhternak ah kan U asimi, kanpa asimi biachim cu lung ahmuituk hringhran. Achimmi hlonh awk pakhat hmanh a um lo adih lak in ahman dih. Ralttha taktak in MP kan thimmi pawl hna siseh, cozah rianttuan CDM ah aa tellomi le, CNF zong siseh, cun mipi CDM ah a rak i langh lomi vialte hna cu faktuk in a tthuat hna.

Pakhatnak ah a kan MP pawl a tthuat hna. Kan MP pawl khoizei ahdah nan um dih? Naypyidaw ah maw nan um? Zeiruangah dah atu tiang nan rak i langh ballo. Miphun le ram caah kan ttuan lai nan ti lo maw? Thimnak tuah lai ah khan cun ram le miphun caah cun cakei hmanh kan ttih lai lo nan rak ti asi lo maw? tuchun nitiang zeiruang ah dah nan rak chuah ballo. Rak chuak cang uh.

Pahnihnak ah cozah rianttuantu pawl a tthuat tthan hna. Cozah rianttuantu CDM ah arak chuak lomi zung akaimi vialte hna zeiruangah dah nan rak chuah ballo. Ralkap uknak kan duh loh nan ti asi lo maw? tulio caan hna ah CDM i tello in zung nan kaimi kha ralkap uknak nan duh ruangah asi timi kha rak thei uh. Atu kan dohmi kan tei lo ahcun nangmah lila zong nan luat hlei lai lo, kan dih lak in kan thi dih ko lai. Rak chuak cang uh.

Pathumnak ah mipi pawl atthuat tthan hna. Hawidang hitluk in ralkap uknak lakmi kan doh cuahmah lio ah zeiruangah dah nan innchung ah nan um sawhsawh ko? kanmah ca lawngah maw tutan thil a cangmi asi? kan dihlak in kan rian asi hih. Hakha khuachung ah hi vial lawng maw minung a ummi kan si. Khoika dah nan um dih rak chuak uh. Lung aphurmi vialte hna zong nan rian ngol cang uh.

Nanmah ruangah tangka lei abuaiter khawh timi hna hi nan hngal lo maw? Achinchap ah CDM atuahmi hmanh lam tthatthi in kian duh lo in, hnahnok in nan um. CDM ah rak ra ve uh, tiah duh fak ngaiin bia a chim. Kan theihcio bangin ralkap nih uknak an lak hnu ah biatak tein lamzawhnak cu hmunkip kaakip ah an tuah hna. Culio caan ah cozah rianttuan tthenkhat hna cu zungah an kai hna ti asi.

Culawng siloin tuchun nitiang ah Mipi nih kan thimmi hna, Miphun ram caah raltthatein rian an ttuan kho lai tiah thimtlinmi kan MP pawl hna cu CDM ah an muisam pakhat zong hmuh awk an um rih lo ti asi. Cucaah acunglei kan upa nih fak ngaiin a vun au hnawhnak hna hi asi. Lungrual tein a dih hlan lo CDM ah hin i tel ko hna usih.

Note: Acunglei kan langhtermi hi bia a chimmi kha cabia in kan vun langhter chinmi asi i, palhnak le hrelhmi atampi lai caah zareltu mipi nih aruahzia rak kan thiam hram uh. Amah nih a chimmi fiangtein ngeih a duhmi kan um sual ah a video in kan vun thil chih. Video zoh le ngeih a duhmi nih hika hi voikhat tein hmehpiak law video tlingtein na ngeih khawh lai

Be the first to comment

Leave a Reply

Your email address will not be published.


*