Victor Biak Lian , KawlRam DaihNak LamThluan Part( lll )Hi Rel Cang Maw?Rak Rel Ve Hrim Hrim

Ka diary: 16 August, 2020
Kawlram daihnak lamthluan kong Part III

August 13 ni ah chak-um unau hna (Northern Alliance unau AA, MNDAA, TNLA) pin ah Wah pawl UWSA, Mongla NDAA le Kachin KIO fonh in an rak sermi FPNCC (Federal Political Negotiation and Consultative Committee) nih biachuah an thanh mi cu a ra laimi UPC-21 PL ah kan kai lai lo ti a si. Covid cu an hei puh ve na in, a bik in AA zong an sawm ve hna lo ca ah kan kai lai lo ti kha an langhter. Daw Suh zong kha an hei chalh pah. Mi an tling lai lo cu a fiang cang. Voidang ah cun Tuluk vanlawng nih Kunming in a hun thir hna i, an nih ca ah visa zong a hau lo. Passport hna zong ramkhat le khat kalnak ah hau lemlo in an rak zuang top ko. Wah an hotu pa hna cu a hnubik Naypyidaw a rak kai ah cun a chung nih tlik sual kaw, sizung a phan. Kan ralkap bawizik nih a nupi cu ma ma a chuanter i a mah nih sizung ah cuna va chanh. Tutan tu cu an ra kho lai lo.

A ngai ngai tiah cun, August 19-21 an tuah ding mi hi ceih ding vialte an rak ceih dih cang. Hnatlaknak catlap cung in minthut ding zong khi tathipthep in tuah cia a si i, minsen va thut lawng aa duh. Sihmanhsehlaw, ka chim cia bantuk in NCA nih a sak in p3 lak ah UPDJC (Political dialogue) a hruaitu in chung ah zeihmanh ceihmi ngeih lo in, cu inleng ah biaruahnak hi kum 1 renglo a rau cang. A bik in hriamtlai EAO bu 10 hna le, cozah (ralkap tel in) lawng an i chawn. Cu zong cu zeitindah aa thawk tiah cun:

KNU nih UPDJC nih an kalpi ning process kong an an nuar i an chuahtak hna hnu in voi 11 renglo informal meeting (biasawng an tlorh heiti ko uh sih) an ngei. Hi ti kan biasawngtlorhnak in kan lung aa hmuh thiam a si le kan rak lut than te lai ti kha a si ko. Cuticun nikum September thla chung ah UPDJC chungtuan hna cu Norway le Switzerland an va tlawng. Cutik ah zingkar zankar ah hin bia va i ruah pah leng mang hna kaw, an lung a va i hmu pah rua hna i a si lai dah, thatho ngai in an rak tlun tik ah cun, a bik in KNU chung ah khuakhan lairelnak an ngei than. An ruahnak petu vialte le ramdang ruahnak petu tiang in khua an ruah tik ah, federal ram ah sernak lamthluan a dot dot hna kha an chuahpi. Cun, NCA zong cu tuanchuahnak lamthluan an hun chuahpi fawn. Hriamnam zapi telkhawhnak (minthu le thulo) lam zong kawl uh sih ti kha a hung si. Atawinak in chim ah cun, cu an ruahnak te te cu NCA kum 4 a tlinnak puai kha October 15 ah tuah i cu adih in JICM (Deadlock breaking Machanism) kan ti mi a zik hna biaruahnak zong serchih riangmang in pum hrapcheu lawng a kalmi an kan NCA cu nunter than an timh. Cutik ah tulio minsenthu vialte hruaitu Gen Yawserk cu an khua in a hung i thawh i, ramri a phak ah Kawl ralkap nih na kal kho lo tang lei lam cun. Tachileik lei tu khin vanlawng in na rat lawng ah kan in sianh lai anti tik ah a thin a hung i akiar than. Cun, hi lio can hi Gambia ram nih kawlram cu ICJ ah taza an cuai hna hrawnghrang hi si kaw, December tiang Kawl cozah cu hi kong ah an thinlung a um deuh. An thih nunnak zong a si ve tik ah. Cuticun, January 8 ceu ah JICM meeting cu an tuah khawh i biachahnak te te an neih mi cung ah KNU he RCSS he an thinlung an thumh i kan ti lai maw, an ruahnak an i thleng kan ti lai dek! Peace Process ah an hung i tel than.

Cutik ah, EAO lei nih riantuantu bu (negotiator an si ko) an ser hna i, cozah lei zong nih ralkap he cozah he fonh in kap hnih EAO biachuahpi (KNU biahramdirh mi cu EAO zapi nih an lung a tlinve ca ah EAO btungdirh mi in ruah a si mi cu thla 8 renglo an i ceih hnu ah lungtlinnak an ngeih mi cu a tu ni 2/3 ah minsen thut ding cu an si.

Kachim cang bantuk in hikong tha te in a zul mi nih cun zeidah a bau ti kha a halawk nan hngalh ko lai. Zeidah a si tiah cun, NCA nih a sak mi UPDJC kha hmangti lo in JICM hnatlaknak tu khan EAO le cozah karlak ah biaruahnak, hnatlaknak hna an ngeih i, UPDJC ah aa tel mi hna Political Parties le CSOs hna cu telh an si ti lo. Cutik ah aa tel lo mi hna a bik in Political Party (2015 ah teinak a hmu i Parliament ah a thu mi hna party 24) an ruahnak, an khuakhannak aa tel ve lo tik ah biahalnak fakpi an tuah hna. Phundang in chim ah cun EAO le cozah hna nih an pheu hna. Hi lamthluan hi Framework for Political Dialogue ti mi zong ah a um lo mi a si. Phuahcop lam hei ti ko uh sih!

Kum 17 chung hriamtlai le hriamtlai (Military to Military Talk) Khin Nyunt le Hriamtlai pawl gentlement agreement ti phun khua an rak khan bantuk khaka lawhter pah. A si ka ti lo hih! An i dawt lio ah cun an tha ngai na in, kahdaihnak a rawh tik ah cun a let 10 in kan ram niha tuar. Cu ca ah cun, Tein Sein nih kahdaihnak a rak sawm hna lio ah, M2M si ti lo in, CSOs le Political Parties hna zong i tel ding kha rak ceih a si ruang ah “National Dialogue” ti i a min rak pek zong a si phah. Cuticun Framework for Political Dialogue zong cu ser a rak si. Mah le state cio chung ah biaruahnak (sub-national dialogue), cun issue base dialogue an ti i, ceih hnga ding biatlang hoih in Working groups buu 5 zong then a si na in, cu zong cu a um kho ti lo.

A buaimi hi a tam ngai. A biapi deuh mi lawng ka vun langhter. Acheu a buai ngai ngai mi te te cu ka langhter ti lem lo. Federal pek hi cu an i harh ko. Federal pek ti mi cu mah te in uknak pek kha a si i, cu pin ah mah ram chuak resource (vawlei tang he cung thilchuak) mah te in tawlrelnak, ram pumpi hmuhmi phaisa i cheuhbohnak kong hna hi an ruah tik ah Kawl pawl (ralkap an si ah cozah an si ah) hi anmah ngeihmi thilcia vapek phun ah an ruah ko rua. An siang ruamlo. Sihmanhsehlaw, a lam a um ko. Next ah kan peh te lai.

Note: 1988 August 15 ah Hakha ah sianghngakchia hruaitu ah ruahmi 10 thong an kan thlak. Zantim khuamang ah an kan tlaih i August 16 ni ah Hakha pumpi, khuachung, khuathar, cawbuk, dawrhlun, dawrthar, Phyidawtha mipi 10,000 leng nih bongbong le chengcheng he thong in ah an ra i an kan chuah. “People’s Power-mipi thazang) a nganzia an langhter.

Upatnak he,

Victor Biak Lian

Be the first to comment

Leave a Reply

Your email address will not be published.


*