UN BIACHAHNAK AH LUNGRETHEIH AWK PAKHAT HMANH A UM LO

Thaizing September 14 UN meeting an tuahnak ah Kawlram aiawhtu palai kong an iruah le biachahnak ah lungrethei le vansensang in umding a si lo. Kan duhmi palai Pu Kyaw Moe Tun an feh ter ahcun a tha tuk. An feh ter lo zongah zeihmanh a poi lo. UN cu haa ngei lo cakei bantuk a si.Kanmah kong ah kanmah ten kan ibiatak kha a biapi deuh.

CDF, PDF le huham ngeimi Tlangcung Hriamtlai pawl nih kan ibiataknak kha tuahsernak in an langhter cang. Ram pumpi nih fekthup in an cohlan an bawmh fawn hna.Hi Kawl ralhrang nih uk hrimhrim a si kho ti lo timi anmah Kawl hrimhrim an ifiang tuk. An tuahsernak in an langhter fawn cang. Kan tei hrimhrim hna lai! Credit: Duh Peng Lian

Thawngpang Dang: Ramkip cu bochan awk a that lo caah, lungrualnak lawngin ralhrang phu hi teikhawh an si lai tiah NUG nih cathanh a chuah.Nawlngeihnak la tu ralhrang phu hna dohnak in,Kawlram um mipi hna cu bawmhchanh runvennak ding ah, ramkip cu bochan awk an tha lo, ramchung ummi hna lungrualnak lawngin ralhrang uknak cu donghter khawh a si lai tiah, NUG nih September 13 ah cathanh a chuah.

Zapi funtomnak, riantuannak lawng in, ralhrang phu nih nawlngeihnak lak mi le, ram deihnak um lo mi hi, donghter khawh a si lai, a luancia thla 7 chung zohthan tik ah fiangten theih khawh a si ko tiah NUG nih a langhter.Ram cheukhat hna nih phungning sawmnak in ralhrang phu cu, cheukhat ramkip ton pumh biaruah nak ah kal nak nawl a ngei, cheukhat ram hna he raldohnak kong, business lei zong ah lungtlinnak an ngeih caah NUG cozah mipi thimmi phungning cozah sinak cu hnahnawh nak a pek khawh tiah NUG nih a chim.

Mipi hna nih ralhrang uk duh lo langhter nak an tuah mi cu, nawlngeihnak la tu ralhrang phu hna nih hramhram in le fak deuh in cawlcanghnak an tuah khawh mi a si, dai te in duhlonak langhter mi hna zong nunnak tiang liam kho ding hriam hmang in le thazaang hleihluat tuk in mino hna cungah an kut an thlaknak cu, Mino hna zong nih hmankhawh mi thazaang he i runven ding in forhfial nak cu NUG nih a langhter.

Ralhrang phu hna zong nih an rian kal tak in, mipi vengtu phu le, hriamtlai phu sin fonh ding ah caan a um rih ko tiah cathanh chung ah theihternak an langhter.Ralhrang phu uknak an hram phongh tiang doh ding in le,mipi lungrualnak, zalonnak he democracy cu kilven in, a dai mi ram faderal democracy dirh khawh nak ding ah mipi dihlak lungrualnak he tel cio ding in NUG nih a langhter. TCP

Be the first to comment

Leave a Reply

Your email address will not be published.


*