TUTHIMNAK OFFICIAL RESULT LE KAWLRAM PARLIAMENT TTHUTDEN UMTU NING

Kawlram Parliament Tthutdan Umtuning le Tutan Thimnak Official Result. Tukum thimnak result kong kan ttial hlan ah kawlram cozah umtuning le tutan kawlram thimnak ah tthutdan umtuning kan van zoh hmasa hna lai. Cu hnu lawng ah nan fiang kho lai tiah ka ruah. Tutan kawlrampi thimnak ah kawlram minung 60million chungin vote thlatu (cohlanmi vote lawng) hi 37 million an si.

Parties 87 chungin candidates 5,639 bakte an i cuh kho. An tam bak.Tutan Kawlram thimnak ah thutdan 1322 a um. Hi thutdan 1322 chungah Pyidaungsu (Union of Parliament) at 664 a um i, State le Region 660 a um. Hi pahnih chung ah kawlram uknak pi a tlaitu cozah a sertu taktak cu Pyidaungsu (Union of Parliament) tthutdan 664 hi a si. Hi thutdan 664 zong hi phun thum in an tthen rih.

Cu hna cu; Pyituh Hluttaw (Lower House), Amyotha Hluttaw (Upper House) le Ralkap (25%) tiin an i tthen tthan. Cu hna nih an ngeih ciomi tthutdan cu; Pyituh Hluttaw (Lower House)=330 seat, Amyotha Hluttaw (Upper House) =168 seat, Ralkap (25%) =166 tiin an i ttthen i cozah pi cu an dirh. Cun State/Region ahhin tthutdan 660 a um ve. Cu hna nih tthutdan an ngeih ning hi kan fiannak dingah Myone (District) pakhat nih tthutdan pahnih cio an ngei.

Cu tikah State/Region pakhat le pakhat kha an tthutdan ngeihmi an i tluk lo. A ruang cu a cheu state/region ah Myone (District) tampi a um a cheu ah a tlawm i an ngeihmi an izat hna lo. Cu Myone (District) pakhat i palai pahnih cio fonh nihcun anmah le State/Region cio ah Ramkulh (Pyine) cozah cu an dirh. Nan fian lo sual ah a tanglei ah State le Region cio nih an ngeihmi tthutdan ka van langhter lai.

Ayeyarwady Region Myone (District) 26 x2 = 52, Bago Region Myone (District) 28 x2=56, Chin State Myone (District) 9 x 2=18, Kachin State Myone (District) 18 x2=36, Kayah State Myone (District) 7 x 2=14, Kayin State Myone (District) 7 x 2=14, Magway Region Myone (District) 25 x2=50, Mandalay Region (including Naypyidaw Union Territory) 36 x 2=72, Mon State Myone (District) 10 x 2=20, Rakhine State Myone (District) 17 x 2=34.

Sagaing Region Myone (District) 37 x 2=74, Shan State Myone (District) 55 x 2=110, Tanintharyi Region Myone (District) 10 x 2=20, Yangon Region Myone (District) 45 x 2=90. A zate ah thutdan 660 a um. A cunglei kan langhter mi total cio nihkhin anmah le State le Region cio ah cozah an ser. Khah tukum thimnak result a tanglei ah kan zoh cang hna lai.

Nizan ahkhan Myanmar, Union Election Commission (UEC) nih tukum November 8,2020 thimnak result an chuah ciammam i NLD nih fak taktak in teinak an hmuh. Tutan thimnak thutdan 1322 chung ah NLD hi tthutdan 1117 ah ai cuh kho. Tthutdan 205 ah ai cuh lo. Cu chung ahcun thutdan 920 bak teinak a hmuh. Thutdan 197 ah a sung. Ai cuh lomi tthutdan he cun thutdan 402 bak a sung tinak a si.

NLD nihhin tutan thimnak ah ai cuhnak hmun hna hi Pyituh Hluttaw (Lower House) ah tthutdan 315 ah ai cuh. Cun Amyotha Hluttaw (Upper House) ah tthutdan 161 ah ai cuh. Cu pin ah State le Regional Parliament ahhin tthutdan 612 ai cuh. Cu hnu ah State Parliament ah Ethnic Minority timi tthutdan 29 ah ai cuh rih. A zate ai cuhnak hmun hi tthutdan 1117 ah ai cuh.

Hi ai cuhnak chungah nizan UEC nih final result an thanhmi ah NLD nihhin Pyituh Hluttaw (Lower House) ah tthutdan 258 ah teinak a hmuh. Tthutdan 57 ah a sung. Cun Amyotha Hluttaw (Upper House) ahhin tthutdan 138 ah teinak a hmuh. Tthutdan 23 ah a sung ve. Cu hnu ah Regional/State parliament ah thutdan 501 ah teinak a hmuh. Thutdan 111 a sung tinak a si. Cun State Parliament ah Ethnic Minority ah thutdan 23 ah teinak a hmuh rih.

Thutdan 6 a sung tthan. Ai cuhnak hmun ah a sunghmi tthutdan dihlak hi 197 (Seats) a si. Ai cuh lomi tthutdan kha 205 a si i a zate in ai cuh lomi le a sunghmi tthutdan he kan fonh tikah tthutdan 402 ah a sung tinak a si. Phundang in chim ahcun tthutdan 1322 ummi chungah tthutdan 402 a sung tinak a kha a si ko. Nain teinak a hmuhmi tthutdan vialte hi van fonh tikah tthutdan 920 bak a si. A tam chiahru.

A zate in icuh sehlaw, hi nakin a tam deuh rih lai tinak a va si. Cu lio ah ralkap he ai bawm, ai neihniam bikah ruahmi Union Solidarity and Development Party (USDP) nih tutan thimnak ahhin tthutdan 1089 ah an i cuh ve. NLD nakin tthutdan 28 in an icuhnak a tlawm deuh. Kawlram cozah pi sernak Union of Parliament ah tthutdan an hmuhmi hi Pyituh Hluttaw (Lower House) ah thutdan 26 an hmuh i, Amyotha Hluttaw (Upper House) ah thutdan 7 lawng an hmuh.

Cozah pi sernak ah an tthutdan ngeihmi hi 33 lawng a si tinak a hung si.. An power a zawr ngaingai cang lai ti khawh a si. Nain Ralkap tthutdan 166 he an i fonh ahcun tthutdan 199 an ngei rih i an tha a tthawng kho ngai rih. NLD nih Pyidaungsu ahkhan tthutdan 396 an ngei. Kan zuh ahcun 197 bakin a hlei in NLD nih an tei rih hna.

State/Region ahhhin USDP nih tthutdan 38 an hmuh ve rih. Asinain, hihi cu ramkulh cozah kan timi kha a si i hi tthutdan 38 hi State/Region 14 chung ah an vai phaw lai i pahnih or pathum cio lawng buaktlak in an tthu kho tinak a si. Cucaah Ramkulh (state/region) cozah ahcun an thazaang a tthawng kho lai lo. Nain State le Region a fatnak, Chin State, Kaya State ahcun Myone (District) kan tlawmtuk caah kan ramkulh (State) ca i kan palai kha an tlawmte ve.

Chin state ah palai 18 lawng kan ngei. An nih hi pahnih va si bia hna sehlaw, ralkap tthutdan 6 (25%) timi kha an ngei cia i an fonh ahcun tthutdan 8 ah an cang lai i an tthawng bang ve kho. Nain khakha cu tahchunhnak sawh si. Chin state ahcun teinak an hmu lo. Cucaah state le region dang ah kha tthutdan kha an vai phaw lai i zeidek an va lawh hnga?

Tulio cozah tlaitu ah President a ttuan lio mi U Min Myint le State Counsellor Daw Aung San Suu Kyi cu Pyituh Hlutaw (Lower House ) member caah thim tlin an si. Vice President Pu Henry Van Thio cu Amyotha Hluttaw (Upper House) member caah thim tlin a si ve. November 8, 2020 ah tuahmi thimnak hi 2008 phunghrampi tangah a voi thumnak thimnak an tuahnak a si.

2008 phunghrampi ah Parliament term thar tangah Session hmasa bik, an ttialning ahcun thimnak tuah ni thok in ni 90 chungah tuah ding ti a si. Note: Palh sualnak um si le careltu nih kan ruat thiam te uh. A theimi le hngalmi tampi lakah a thei lomi pawl caah a tthahnem hnga maw tiin ka van ttialmi a si. Chirhcan: Union Election Commission (UEC), Myanmar, Wikipedia, aljazeera, CNN (edition), Mizzima. Catialtu. Stalin Tha Cung Lian.

Be the first to comment

Leave a Reply

Your email address will not be published.


*