TUNI AH KAWLRALKAP NIH THANHNAK AN TUAH MI A POI KO CANG

Kawlralkap nih thanhnak an tuah tthan cang. Kawlram buainak kongah kanmah duhning tein kan kal ko lai tiah thawnglatu hna sin ah an chim. Kawlralkap cu nawlngeihnak an lak hnu ah a voihnihnak mipi sin ah thawngthanhnak an tuah. Thawnglatu hna cu tuchun ah kawlralkap nih an auh hna pin ah an duhmi paoh halnak an tuahmi cungah lehnak an tuah hna.

Tuchun thawngthanhnak ah kawlralkap bawi Za Min Htun nih a timi cu a hramthok ah khua kan khan bantukin kan i timhtuah ning bantukin kan kal ko lai. Vote hman lo zohfelnak kan tuah lai i, cu hnu ah a herhmi pawl cu kan tuah dih asi ahcun thimnak kan tuah tthan lai. Cu thimnak ah teitu a simi sin ah nawlngeihnak kan chanh ko hna lai tiah a chim.

Culawng siloin ram innpa a simi hna nih duhsaknak siseh ttuanpi an i timhnak hi kan upat tuk ko hna nain khua kan khan cia bangin kan kal ko lai tiah a langhter chih. Hi konghe pehtlaiin a chim tthan rih mi cu Aung San Suu Kyi cu a liamcia kum 2017 ah khan Yangon ramtthen Chief Minister Pyo Min Thein nih cuai 7 a ritmi sui le US Dollar ting 6 a pek timi zong kan theih. Suu Kyi zong hi kongah dottletnak kan tuah rih lai tiah a chim chih tiah BBC thawngzamhnak nih alanghter.

Thawngpang Dang.Ralkap Tlaihmi Van Ceu Thawng le Peter Thlah Ding in CNF/A nih Hal.CNF/A hruaitu cheukhat le Myanmar ralkap Northern Command ralbawi cu March 10 zanlei sml. 4:00 ah Hakha khua ah ton biaruahnak an ngei hna i tlaih a tongmi CCPR rianttuantu Salai Peter Thian Bawm Sang le Van Ceu Thawng kan thlah tthan hrim hna lai, tiah ralkap lei nih an chim.

March 10 tonnak ah “Ralkap nih tlaihmi vialte thlah dih ding le lamzawhtu pawl hnahnawhnak pek lo ding” in CNF/A lei nih an hal hna. Ralkap lei zong nih CDM a tuahmi palik pawl ap ding in CNF/A an hal nain CDM a tuahmi palik kan sin ah an um lo, tiah CNF/A nih an leh hna. March 8 zanlei ah Salai Peter Thian Bawm Sang cu Thantlang phak lai Laipawnglung ah ralkap nih an tlaih.

March 9 ah ralkap nih Hakha CCPR zung an luh hnawh i Van Ceu Thawng an tlaih ve. March 10 ralkap he tonnak a kalmi CNF/A vice-chairman (3) Dr. Sui Khar nih, “Kan i ton tawnnak hmun ah ton biaruahnak kan ngei. Tlaih a tongmi pawl thlah ding in bia kan i ruah. An tlaihmi hna hi ralkap lei nih bia an hal hna lai i, CDM cawlcanghnak ah an i tel lo tiah an hmuh cun an thlah tthan ko hna lai. Taksa lei fahnak pek loin him tein kan chiah ko hna an ti. An thlah hna le thlah hna lo thil sining kan zoh lai i a herh ning in kan cawlcaang ko lai,” tiah a chim.(Chin World). The Chin Journal

Be the first to comment

Leave a Reply

Your email address will not be published.


*