THAWNGPANG FIANG, SINGAPORE A PHANMI UN MOTOR KONG

Thawngpang fiang theih asi cang. Singapore ah a rak phanmi UN motor kongah thawngpang fiang thanhnak an tuah cang. Singapore a rak phanmi UN motor hna cu Kawlram caah siloin Bangladesh ah kuat dingmi asi tiah an langhter. UN motor cu nizan April ni 18 ah khan Singapore an rak phan hna. Hi UN motor hna cu kawlram caah asi lai tiah minung tampi zumh a si.

No photo description available.

Sihmanhsehlaw mah UN Motor hna cu Singapore in Bangladesh ah kuat mi asi tiah an langhter. Mah UN motor hmailei ah an banh catar zongah fiang tein an langhter. Hi motor hna cu Chitagong ah kalpi dingmi asi. Bangladesh ah hin UN peacekeeper timi ralkap pawl tampi an umnak hmun le hma zong asi.Hi konghe pehtlaiin kawlram mipi tampi ruahnak a rak um.

No photo description available.

Tulio kawlram buainak ruangah mah motor Singapore a rak phanmi UN motor pawl hi kawlram kuat ding mi asi lai tiah kawlram mipi tampi hna nih an zumh. Tthenkhat nih kawlram caah asi lai lo atimi zong an um ve. Asinain thawngpang fiang atu ahcun theih asi cang. Kawlram caah siloin Bangladesh ah kuat dingmi a si tiah an langhter cang.

No photo description available.

Theih APhu Taktak Mi Relchih: NUG Ah Aho Pawl Dah An I Tel?(Lai ca a rel mi kan unau hna caah). National Unity Government (NUG) cu NLD ti cawh lo CRPH nih an sermi National Unity Consultative Council (NUCC) nih an van chuahpi cozah a si. CRPH cu NLD ti cawhlo kan ti nain NUCC tu cu party dang le phu dang zong an i tel ko rua- min cazin an langhter lo caah theih dih khawh a si rih lo.NUG nih a huapmi a hun kau ngai.Miphun an i cawh; Shan le Arakan dahlo cu an tling ti khawh a si. Kum upa kum no an i cawh, biaknak an i cawh, nu an hun tam. Politician, activist le scholar an i cawh rih.

Atu tiang theih tawk ah party dang le party a si lomi phu dang an um pah len. Tlangcung party ngan deuh a simi SNLD, ANP, KSPP, CNLD tbk pawl belte an i tel rih lo.A miphun hoih in zoh ahcun Kachin, Karen, Karenni, Chin, Ta’ang, Mon le Kayan hna an i tel. Kawl a si lomi 51% an si. Nu 27% an i tel.NUG Cabinet cu ministry (11) in an ser. President, Vice President, Prime Minister, State counsellor pin ah Minister pa (10) an khinh hna. Deputy Minister (12) an khinh hna. Mizei pawl dah an si kan hun zoh lai.President Win Myint le State Counsellor Aung San Suu Kyi cu anmah rianthing te ah an chiah than hna.Vice President tu cu minthar an hun thim. Kachin miphun Duwa Lashi La a si. Anih hi upadi lei thiammi a si.

Kachin National Consultative Council (KNCC) ah chairman a tuan liomi zong a si. Kachin ramkhel lei ahcun minlang a si. [Note – KNCC hi KPICT he cawh sual lo ding. KNCC cu 2012 ah rak dirh cangmi a si. Kachin Political Interim Coordination Team (KPICT) hi NUCC bantuk phun khi Kachin ramkulh level ah ser mi a si. KIPCT cu Naite ah dirhmi Iterim Chin National Consulative Council (ICNCC) he khin ai lo. Prime Minister ah a hlan i Amyotha Hluttaw speaker hlun Pu Mahn Win Khaing Than kha an hun khinh. Anih hi Karen miphun a si.State Coulsellor telh Rampi huap in Top Seat pa (5) bak an hun ser i a hun hnok ngai.Federal Democracy Charter ning ahcun President khi head of state a si lai i, Prime Minister khi head of government a si lai.

Charter ning ah Vice President (2) um ding a si nain atu tiang an thim rih lo. Aung San Suu Kyi thutnak State Counsellor khi protocol ning in cun number pahnihnak ah an hun chiah. Hi nih thil a hun laklawhter ngai. 2008 Phunghram an hrawh ko cang ah, ziah president an pek lawlaw ko lo? timi ruahnak zong a chuak. Cabinet member lak ah minung pa (10) hi 2020 thimnak ai cuh i teinak a hmutu an si.U Win Myint, Aung San Suu Kyi, Mahn Win Khan Than, Daw Zin Mar Aung, U Lwin Ko latt, U Yee Mon, U Tin Tun Naing, Dr. Win Myat, Naw Susana Hla Hla Soe, Dr. Swe Pong hna an si. Foreign Minister Daw Zinmar Aung hi Rangoon i Yankin township in thimnak a rak i cuh i teinak a hmumi a si.

CRPH ah a biapi bikmi hruaitu a si. Foreign Ministry hi Aung San Suu Kyi nih a rak tlaihchihmi a si i, ASSK an hreen caah Daw Zin Mar Aung hi Acting Foreign Minister ah CRPH nih an rak thim. Atu cu Foreign Minister tling a hun si cang tinak a si. NUG nih a biapi cem ah a chiah dingmi hi International Community theihpinak lakding a si lai caah Daw Zinmar Aung rian hi a biapi bikmi a si, ti khawh a si. A bawmtu (Deputy Foreign Minister) ah Moe Zaw Oo a si lai. Anih hi NLD cozah term khatnak ahkhan remdaihnak lamtluan caah Aung San Suu Kyi nih a sermi Peace Commission chungtel a si.

Remdaihnak lamtluan i tlangcung hriamtlai he biaruahnak ah khan a chunglei ah ai tel pengmi a si.Defense Minister rian pekmi U Yee Mon hi NLD in kum 2015 thimnak he, 2020 thimnak he a voi hnih ning in ai cuh i teinak a cotu a si. Kum 1988 Uprising ah khan a rak i tel caah Medical University in an rak phuahmi a si. A bawmtu (Deputy Defense Minister) ah Nai Kao Rot le Daw Khin Ma Ma Myo an si lai. Nai Kao Rot cu Mon hriamtlai MNSP chungtel hlun a si. Kum 2008 ah khan ai din nain ruahnak petu in ai tel rihmi a si.

Daw Khin Ma Ma Myo hi security lei ah cawnnak thate a ngei i thiamsang a si.UK ram ah security he ai pehtlaimi cawnnak International Studies, Stategist Studies, Political Research tbk khi M.A in a dihmi a si. Tlangcung hriamtlai phu komh NCA-S EAO zong nih khin Security Sector ah advisor an an hman balmi a si. Roman Catholic biaknak a zummi a si. Education lei ah Deputy Minister a tlaimi Daw Ja Htoi Pan khi KIO/KIA i fimcawnnak department a hruaitu a si. Anih hi anthropologist a si i, KIA chung ah si seh Kachin mipi sin ah si seh upat hmaizah ngaimi Rev. Maran Ja Gun i a fanu a si.

KIO/KIA Education Department nih an ngeihmi sianginn pawl ah khin biatak tein tuanvo ngeitu lutlai a si. National Resource and Environmental Conservation Minister Dr. Too Khaung zong khi Kachin ramkhel lei ahcun theihhngalh ngaimi a si. A bawmtu (Deputy) ah chairman Kayan National Party (KNP) in mino te Khun Bedu a si. Anih [Khun Bedu] hi Political Activist a si. A cawlcanghnak ruang ah kum 7 chung thong a tla bal i, President Thein Sein nih thongtla luattermi ah khan a rak i tel ve. Federal Union Affairs Minister ah an hun thimmi Dr. Lian Hmung Sakhong hi CNF ah Vice Chairman a tuan lio a si. NCA minthu ciami phu (10) komh (NCA-S EAO) zong ah khin lutlai lei ah ai tel pengmi a si. NCA hnatlaknak tang in sermi Union Peace Dialogue Joint Committee (UPDJC) zong ah Vice President rian a tlai.

Anih hi cozah rian a cohlan cang caah CNF a aiawh kho ti lo maw? EAO lei teh a aiawh kho ti lai maw? timi biahalnak a hun chuak. Dr. Lian Hmung Sakhong a bawmtu (Deputy Minister) ding ah an hun thimmi Ta’ang National Party (TNP) in U Maing Win Htoo le, U Chit Tun an si lai.Dr. Sa Sa rianthar an hun pekmi cu International Cooperation Minister a si. A rianthing UN Special Envoy he khan a hmunhma cu ai hlat lo. Foreign Ministry nih policy a chiahmi tang ah riantuan deuh ding khi a si ve ko. Hi Ministry hi NLD cozah term khatnak ah khan an ser chommi a si i, U Kyaw Tin nih a rak tlaih. Kha lio i, Deputy Minister cu UN ah Ambassador a tuan balmi kan miphun Pu Hau Do Suan kha a rak si.

Atu Dr. Sa Sa a bawmtu ding belte hi ca ka tial tiang ah an thim rih lo. Home Affairs and Immigration Ministry ah Deputy rian khinhmi Khu Hte Bu khi Karenni National Progressive Party (KNPP) CEC chungtel a si ve.KNPP cu Karenni (Kayah) miphun aiawh hriamtlai an si. Dr. Lian Hmung Sakhong dih in hriamtlai top leader deuh tiah ruahmi ah amah hi a si ve tinak a si. Humanitarian Support and Natural Disaster Management Ministry caah Deputy ah hun thimmi Naw Htoo Phaw khi Karen Women Union chungtel a si ve.Atutan ah kum no bik tiah hun theih ngai cangmi nungak Ei Thinzar Maung khi Women, Youth and Child Affairs Ministry ah Deputy Minister ah an khinh.

Kum 26 lawng a si rih. Shanni miphun a si. လူ့ဘောင်သစ် ဒီမိုကရေစီ timi party in kum 2020 thimnak ah khan ai cuh i, a sungmi a si. Ei Thinzar cu Sandah piahnak ah hruaitu hmasa bik pawl a rak si. Kawl ralkap nih Pohmah 505 (a) in Warrant an hun chuah ko bu zong ah Rangoon in a cawlcang chih pengmi a si. Mizapi zong nih hun uar ngaimi a si i, atutan Kawlram buainak ah raltha bik pa (5) thimnak selaw ai tel kho ding phun a si. Source. Irrawaddy, Myanmar Now. Credit: June Ni Lian Sang

 

Be the first to comment

Leave a Reply

Your email address will not be published.


*