TUCHUN CU RAMPI HUAP THIL AN TUAHMI CU ATURU KO

TUCHUN cu buainak chuak lo hram sehlaw atthatuk hnga. Lamzawhnak konghe pehtlaiin thanhnak an tuah cang. 2 lawngte panga 22222 hmangin lamzawhnak tuah dingin thanhnak an tuah i atu hi an zawhcuahmah lio asi. Ralkap nih uknak an lak hnu ah lamzawhtu hna cu ralkap le palik hna nih hriamnam hmangin kham an timh hna nain mipi pawl deih hrimhrim an i tim tilo, lamzawhnak cu zuallei a panh chin lengmang cang. Ralkap nih uknak an lakmi an ngol hlanlo mipi um sawh an i tim lo.

Tuzing February ni 22 ah 2 lawngte panga hmangin rampi huap in lamzawhnak tuah asiĀ  caah cozah rianttuantu vialte hna zong i tel dingin nawlngeitu or tawlreltu hna nih thanhnak an tuah. Hi konghe pehtlaiin 88 buainak rak timi 8.8.1988 ah rampi buainak arak chuak i, 8 pali buainak tiah kawh auh arak si. Hi thok in kawlram nican le thla le kum number aa khatmi pali asiah panga asi aa ton caan ahcun mipi nih philhlonak bantukin an chiah.

Lam zawhtu hna nih tutan ah timhlamhnak an ngeihmi rampi huap peaceful protest an tuah cuahmah lio ah ralkap cozah nih thanhnak an tuah ve. Ralkap cozah nih an timi cu penson lahkhah pek caan aneih cang caah nizan ah ralrinnak an pek hna i, tuzing hi zeidah a cang te lai timi theih asi rih lo. Naihrawng ah hriamnam hmangin lamzawhtu hna cungah thil an tuah cang.

Asinain hriamnam an hmanmi hi tutiang rih ahcun a zualhmatuk cu asi lo. Sihmanhsehlaw hi konghe pehtlaiin ramkheel lei minung thongtla pawl abawmchantu hna nih an chimmi cu ralkap nih uknak an lak hnu in tuchun nitiang ah minung 523 an tleih cang hna i, lamzawhtu chungin minung pathum an nunnak aliam cang tiah an langhter ve.

Theihcio bangin CDM ah aitel mi abik in tawlreltu hna cu ralkap nih an tleih thluahmah cang hna i, nizan zongah Kawlram minta minthang Lumin zong a innka an bauh hnu ah an tleih tiah an langhter.Tutan ah 2 lawngte pa hmangin lamzawhnak Ni tuah an timhnak aruang bik cu a cunglei langhter cang bangin 22.2.2021 asi i, hi ni le caan ah 2 lawngte panga a um.

Abiapi taktak mi: CDM Dirkamhtu Hna Cathanh: Zungkai Hlah, Zung Zongah Kal Hlah. Nannih Cozah zungrianttuantu hna… Zei cozah paoh kai sehlaw kannih cu zungrianttuantu pei kan si ko cu, nan ti maw? Asi ahcun, cozah a silomi nih zung rian ttuan in fial hna sehlaw ta, nan tuan thiam lai maw? Zeiruang ah dah Ralkap nih zung rian ttuan an i fialmi hna cu nan tuan kun? Cozah cu mizapi ta asi. Ralkap nih hramhram in an kan chuh.Cucaah mizapi cu mithli tla in kan tap i kan aihram cuahmah.

Hriamnam hmang in hramhram uknak kan duh lo, kan cohlang lo tiah kan au cuahmah. Cu bantuk lio caan ah ralkap rian fialmi tuan cu cozah riantuan siloin cozah asi lomi rian ttuan tu a si ko lo maw? Cozah cu ralkap ta asi lo, mizapi ta asi. Cucaah cozah rianttuan na si taktak ahcun zung ah kai ti hlah. Cozah a leirawitu na si ve sual lai. Atu lio cu cozah lo nih meithal he cozah zung an luhhnawh lio asi. Mifir kua ah a cang rih. Cuka ahcun maw na thut ve rih ko lai? A ngeitu taktak mizapi nih kan chuh khawh dengmang cang hna.

Kan chuh khawh hna tikah, cu bantuk mifir hna he a tangtimi cu tazacuai le thongthlak an si ko lai. Nan Cozah ngeitu mizapi hna.. Kan rian an kan tuanpiak paoh ahcun azaa nan ti maw? Asi ahcun nan cawtum firtu pa nih na lei kan thuanpiak lai, in ti sehlaw nihlawh phalh in na tuanter thiam ko lai maw? Zeiruang ahdah ralkap nih zung ah ra ulaw, Bank ah ra ulaw, nan pension rak thoh u, nan thlahlawh rak thoh u, cu kan in tuahpiak hna lai, kha kan in tuahpiak hna lai, an in ti hna ah kal cu nan i timh kun? Naisai, Kal nemmam hlah.

Kanmah ta an firmi chung cun maw a pelpawi te cu kan vai i lak ve lai i, kanmah ta an firmi cun maw kan rian cu kan tuanter hna lai? Nemmam na pension le na hlawh na thoh rih lomi cu a karh he naa khon asi ko. Nang le kei cu miraltha kan si. Angeitu taktak mizapi lei ah a tang ngammi kan si. Dinnak kan tanh, Thildik kan tanh, Sal kan si lo. Mifir kan si lo, Misualmi hna khuakhannak ah aa tel lomi, mifir hna hranchaw aa hrawm duh lomi, damiah hna he rum nakin dinnak hesifah a ngamh mi kan si. Cucaah Civil Disobedience Movement (CDM) ah zaa ah zaa in kan lut hna lai. Mizapi kan si ah, zungrianttuantu hna kan si ah, zeitindah kan saltannak Babylon tiva kam ah Pathian thangthatnak hla cu kan sak khawh lai. Dated Hakha, February 21

Be the first to comment

Leave a Reply

Your email address will not be published.


*