RALHRANG PAHRA AN THIH PIN AH TAMTUK HLIAM AN TUAR RIH

Kawlram Mandalay ramthen chung, Mukoh (Mogok) khuapi pawng ah KIA le Kawl ralhrang karlak raldohnak a chuak i Kawl ralhrang lei minung (10) an nunnak a liam tiah DVB nih a tarlangh.Nizaan April 12, zaan ah Mandalay ramthen Mukoh khuapi pawng te ah kahnak a chuah hi asi. Kawl ralhrang lei cu minung 10 an thih lawng si loin hliamtuar mi an tam taktak ti asi.

April 12, zaan in Mandalay ramthen chung a simi Mukoh khuapi pawng te ah kahnak a chuah hi a si i nihin tiang ah i kahnak thawng, meithal puah thawng le Bomb, Miakpi thawng pawl cu khuapi chung a um mi tiang nih an theih hi asi.Kawl ralhrang lei nih an si khawh chung in hriam ngan pawl an hman, an raltuk nak Bomb, Miakpi le hmunhla pi kahnak tiang in an hman len nain KIA lei nih minung 10 an thah hna pin ah ralhrang lei hliamtuar an tam taktak hi asi.

Nihin tiang ah Kawl ralkap nih KIA cu Kachin ram, Alaw Bum Sakhan ah an kah len rih hna, ni 4 chung Alaw Bum Sakhan cu ralkap nih vanlawng in an kah len nain an tei hna lo. KIA lei nih tampi an thah hna pin ah hliamtuar zong ralhrang lei tam ngai dawh an si fawn. Nihin tiang ah KIA cu Pathian nih a um pi hna, Ralkap lei nih an tei kho hrim hna lo, Ralkap lei tu a thi mi le hliamtuar an tam chinchin cang. Mandalay ramthen chung tiang ah an i phomh cu lung a hmui chin lengmang ko.

KIA Thazaang A Tthawng Chin Thluahmah Cang Hi -

Thawngpang Dang:Ralhrang kawlralkap hna nih an sakhan ah Pastor pakhat le Nga zuatnak a zohkhanhtu pakhat an tleih hna. Pinkhungkyi khuapawng Ngapiotaw khualu lei ah a ummi nga zuatnak ah Pastor pakhat le nga zuatnak a zohkhanhtu minung pakhat hna nih ralhrang kawlralkap hna nih April ni 13 zingka suimilam pahra hrawngah an tleih hna i, an sakhan ah an kalpi hna.

Asinain a rauh hlan ah Pastor pa cu an thlah tthan tiah an chim. Ralhrang ralkap pawl hna nih hi hmun le hma an kalnak a ruang bik cu mipi humhhimtu pawl an um le um lo timi theih an duh caah nga zuatnak hmun ah an kal hi asi tiah an chim. Cun ralhrang ralkap pawl hna hi ke in minung 70 hrawng an ra hna. Asinain hohmanh tleih dingmi an hmu lo tiah an chim.

Tutan ah an kalpi mi Pastor zong hi kumkhua in upa cangmi asi i, hi hmun a umnak a ruang bik cu april ni 7 i kahnak ah meithal puah thawngpang a um lengmang caah caan karlak a ummi a si tiah an chim. Nga zuatnak hmun pakhat ah vakahnak meithal pahnih le gus meithal pakhat an hmuh ruangah nga zuatnak azohkhanhtu an tleih hna hi asi. Angeitu taktak cu an um lo ti a si.

Cun ralhrang kawlralkap hna nih pawngkam a ummi hna zong kut an thlak hna lo tiah an langhter chih. Asinain nunau pawl hna cu biahalnak an tuah hna i, nan chim lo asi ahcun fung in kan tuk hna lai tiah an tlerh hna ti asi. Asinain an biahalnak pawl cu pakhat hmanh an thei lo. Minung pakhat ah thongkhat cio an pek hna tiah an langhter.

Ralhrang kawlralkap hna nih tangka an pekmi hna hi a dihlak in thong 16 mi asi. Nunau pawl cu hman zong an thlak hna. An tleihmi pastor cu zanlei suimilam pakhat ah an thlah tthan i, khohsuai thuk nga le datsi cawknak ah tiah tangka zong thonghra an pek. An tleihmi pakhat nga zuatnak azohkhanhtu cu an thlah le thlah lo theih asi rih lo. Credit: CT

Be the first to comment

Leave a Reply

Your email address will not be published.


*