RALHRANG KAWLRALKAP RUANGAH TUCHUN THOK IN HMUH KHAWH ASI LAI LO

Kawlralkap nih tharum in uknak an lak dih hnu ni 45 a rau hnu March 17 cu Myanmar ram ah chuah le phawt zamh asi mi Private Newspaper pawl cu chuah khawh asi ti lo. Private Newspaper vialte lak ah San Daw Chain Daily Newspaper lawng hi Kawl ralkap nih uknak an lak thok in March 17 tiang pehzulh tein an chuah zungzal nain March 17 thok in Newspaper chuah kan ngol cang lai tiah thawngthanhnak an tuah cang.

San Daw Chain Newspaper in minlang lo pakhat nih “Martial Law nawl an chuah ruang ah zaan caan ca nam le timhtuah ding a relrem ti lo, thawng la tu pawl zong thawng an lak tik ah harsatnak le humhimnak lei ṭih a nung ruang ah atu bantuk in kan ngol mi asi” tiah a chim. Atu bantuk in Private Newspapers pawl chuak lo in ngol mi hi mipi caah thawngpang theih kho lo asi leng ah sungh zatlaknak taktak asi. Cun thawngpang an theih mi thawng in ralkap uknak duhlonak langhter ding ah mipi an i funtom chin ruang zong ah asi.

Hi bang thil i SAC nih thawngla tu pawl a zenh tluahmah hna” tiah kha hlan Media Council chungtel a rak si mi U Myint Kyaw nih ati. News pawl an ṭial nak thawng in mipi pawl an tha a tho, duhlonak langhter mi zong tha pek nak a tam chin, news pawl thawng in pakhat le khat kar ah pehtonh kho a fawi cubantuk ruang ah Media pawl hi an zenh, Internet zong hi mah ruang ah an phih mi asi lai tiah ka zumh” tiah U Myint Kyaw nih chun a chim chap.

US imposes tougher sanctions against top Myanmar military officials | The  Myanmar Times

Newspaper pawl chuak kho ti lo in an ngol mi hi thawng theihnak lei khua ci mui asi. SAC nih ningcang lo le phung buar in tuah ser nak pawl vialte mipi zapi nih theih kho lo ding in tiah tuah mi asi” tiin U Sithu Aung Myint nih cun a chim. “1988 bantuk in ramchung thil sining vialte khumzual dih in duhlonak langhter tu mipi pawl siseh a dangdang cawlcangh nak pawl cu hremnak le harsatnak phun kip pek in tuah an timh mi asi.

Media pawl an um ah cun an duh ning in ruru hrang hrang thil pawl an tuah ngam lai lo, media pawl an um lo lawng ah an tuah duh mi duh poh in an tuah kho lai” tiah a chim chap. Kawl Ralkap nih uknak an lak ni thok in nihin tiang ah thawngla tu 39 tlaih an tong cang. Zeimawzat cu an thlah ṭhan hna nain a cheu cu ram daihnak rawk ding in nan tuah tiin Penal Code Section 505 A in tlaih an tong. Myanmar ram ah zapi nih theih mi newspaper pawl hi San Daw Chain, 7 Day Daily News, The Voice, Eleven le Myanmar Times hi an si.

Ramchung hrambunh News Channel asi mi Mizzima, DVB, 7 Days, Myanmar Now le Khit Thit Media pawl zong thawng zamhnak nawl phih an si tiah SAC nih March 8 ah khan thawngthanhnak a tuah. Nawl phih mi pawl nih lamdang kawl in News phungdang nan chuah lai lo tiah an ti hna. Sihmanhsehlaw cu News Channel pawl cu Online Media phun in an rian cu an pehzulh rih ko. Myanmar ram ah President U Thein Sein cozah chan 2013 kum ah Private Newspaper pawl chuah hi rak thok asi kha hlan ah cun 1962 Revolutionary Council chan hnu a hmasa bik zalon tein Private Newspaper pawl rak chuah mi zong asi.Ref: RFA (CCNC)

Be the first to comment

Leave a Reply

Your email address will not be published.


*