PARTY TTANHTUK A THAT LONING HI RAK ZOH TUAH UH AN LO BAK

Rampi thimnak Ni le Caan kan neih cuahmah buainak a chuak thluahmah cang. Cun rampi thimnak party ttanh ruangah i sikvelh siseh, pakhat khat social media facebook tiangah i chuah le i hnawh asi. Cuchung ah innlo hrawh tibantuk tete zong theih awk a um pah lengmang. Tutan thil acangmi hi cu alinsa ngaingai khi asi.

Party ttanh le dirkamh ruangah kanmah Chinmi tthenkhat zong biafakfak in a timi zong kan tlawm ti lo. Party ttanh ruang buainak konghe pehtlaiin tutan ah thil a cangmi cu Magwe ramtthen Myaing peng Kanni khua ah a cangmi asi. NLD a dirpitu le NLD hruaitu chungah aitelmi U Myint Naing inn cu minung 70 renglo nih an hrawhpiak dih.

Hithil hi nizan ah khan a cangmi asi. A innlo an hrawhpiak pin ah a motor zong an hrawhpiak chih. Tutan ah hrawhpiak a tongmi U Mying Naing hi NLD hruaitu le attanh taktak mi asi i, NLD khuachung an chuah caan zongah motor aa thawh lengmang mi asi i, hruaitu lutlai zong asi. Innchung a um zongah NLD hla lawngte thang taktak in ai chuah tawn ti asi.

Pawngkam a ummi khuachung mi USDP a dirkamhmi pawl hna nih an zoh khawh ti lo caah hibantuk in an tuahnak hi asi tiah an chim.A hramthok ahcun Nay Win timi tlangval hi U Myint Naing tthuat dingah a choi hmasa i, amah lawng nih a va tthuat tiah an chim. Cu tlawmpal ah minung 70 renglo hna cu an rak ra i, thing le lung he a inn cu an thuat tiah an chim.

Hi konghe pehtlaiin U Myint Naing nih police phone a chawnh hna i, police pawl nih chungkhar hna cu hmunhim nak ah an hruai hna tiah an chim. Thilsual a tuahtu hna chungah minung 34 hna cu phungning loin cawlcangh nak phungin sualphawt an si i, midang pawl zong an tawlrel cuahmah lio asi tiah theih asi. Chirhchan.VPAA

Be the first to comment

Leave a Reply

Your email address will not be published.


*