MIPI RUNGVENGTU PDF MINUNG 12 RALHRANG NIH AN THAH DIH HNA EE

Ralhrang kawlralkap hna nih PDF an tlaihmi minung 12 hna cu an thah dih hna. Hi konghe pehtlaiin Kani PDF hruaitu lutlai nih a chimmi cu kahdohnak afak ngaingai. Kan kal cuahmah lioah ralhrang kawlralkap nih RPG bomb in aa kan kah i, bomb hi voi sarih voi riat hrawng an puah. Cubantuk in thil asi tikah kan himnak dingah kan zaam hna.

Tthenkhat cu an zaam manh hna lo i, an tlaih hna. Ahnu ah kahdohnak hmun kan va zoh tikah cun khur pakhat chungah ruak pathum tibantukin an rak phum hna. Tthenkhat cu meithal kahnak hma a um i, tthenkhat cu an tlaih hnu ah meithal in an Lu ah an kahmi hna an tam. Tthenkhat cu a nung an tlaih hna i, an vuak thah hna. An tlaih mi vialte hna cu an thah dih hna.

Minung pakua ruak an phum hna i, minung pathum tu cu an thahnak hmun lila ah an chiahta hna. Ralhrang kawlralkap hna nih an tlaih hnu ah an thahmi hna hi minung 12 an si tiah a chim. Kani PDF le ralhrang kawlralkap hna July 26 ah khan an i kap. Hi i kahnak ah Kani PDF lei hi an ralrin lo lio caan a si i, ruahlopi in RPG bomb in an kah hna caah a tubantukin a zam manh lomi an tlaih hnu ah an thahmi hna hi an si.

Thawngpang dang: Russia raltuknak vanlong Sukhoi Company nih an serchuahmi Su-30SME, Jet Fighter le tintan tuahnak ah hmanmi Jet Fighter hna cu nizan ti awk ah khan ralhrang kawlralkap hna sin a kuat cang tiah ralkap le nawlngeitu hna nih an chim tiin ASIA NEWS nih a langhter. Aliamcia thla ah khan ralhrang kawlralkap hna le Russia hna cu thil i cawk zuarhnak kongah hnatlaknak an rak tuah.

Kawlram hi North East Asia ahcun RUssia he Air Force Exhibition lei zongah pehtlaihnak a ngeimi an si tiah Russia president nih a chim ve. Tuluk vun chang ah Russia hi kawlram ah hriamnam a kua tambik ram an si i, Kawlram Air Force hna nih an hmanmi Russia serchuahmi Mig-29 jet fighter le training tuahnak ah an hmanmi jet-130 jet fighter hna zong caansaupi an hman cangmi asi.

Tutan ah ralhrang kawlralkap hna caah Russia nih an kuatmi Sukhoi Su-30SME raltuknak vanlong Jet Fighter hi zeitik caan paoh ah cunglei in tanglei ah bomb a thla khomi a si tiah an chim. Ralhrang kawlralkap sin ah hriamnam hohmanh nih zuarh hna lo dingin tiah an rak ti nain Russia le Tuluk nih cun ralhrang kawlralkap sin ah an kuat ko ti asi.

Be the first to comment

Leave a Reply

Your email address will not be published.


*