A HMAN KHO TAKTAK, MAH LUNGPUT LE SINING HI KAN I FIANG HRIMHRIM AHAU

Chinmi or Laimi Kan I Palh Tuknak Aruang? Ka tlangtaar nan zoh ahcun phundang pi khi alo ngaingai ko lai, Asinain ka tlangtar he pehtlaiin thil sining tlawmpal vun langhter ka duh mi a um. Ka timi bia ka hman tikah kan tinak khi asi lo. Pumpak ruahnak tu khi tutan ah vun langhter le zapi nan sin ah vun langhter ta ka duh bik mi cu a si. Cucu azeidang kongah siloin tutan kan tonmi konghe hin asi.

Tutan ah Chinmi or Laimi vialte hna nih kan buai taktak mi pakhat cu US thimnak kong hi asi. Kan buainak ahramthok vun zoh tikah zapi huap in adirmi le zapi huap in US thimnak kongah abuaimi kan um hrimhrim lo. Kan buainak bik cu pumpak ruahnak cungah hin asi. Pumpak cio kan sining nih alanghtermi cu kan duh mi le kan ttanhmi aidang lai ti khi asawh duh bik. Tthenkhat nih tutan thimnak ah Trump nih pehseh timi kan duh.

Cuve bangin tthenkhat nih Joe Biden nih US rampi hruaiseh timi kan duh ve, Chim lengmang cangmi le kan theihcio bangin minung hi kan pum aidan bak kan ruahnak zong aidang ti asi. Cucu tutan US thimnak ah hin a vun lang ngaingai. Hngakchia upa bochanmi tiang nih Biden athatnak le a chiatnak, Donald Trump a chiahtnak le athatnak, timi hi dirpi cio mi asi ko. Biden atanhmi nih Trump an huat. Trump atanhmi ni Biden an huat.

Cucu vawlei cung phung asi. Asinain hi zawn ah Laimi lungfim kan pa le hna hmurka hi abiapi ngaingai te i, ralrin awk tlak ngaingai thil pakhat a um. Cucu a zeidang ah siloin abu huap timi ah hin asi. Abu huap in thil kan kalpi ahcun thil pakhat khat a chuak kho lengmang, Abik in Laimi zawn hrimhrim ahcun hi bantuk konghi alinsa khun tawnmi asi. Sihmanhsehlaw abu in maw an langhter timi hi zapi nih kan i fian ahau.

Culawng siloin pumpak in maw an ruahnak le an hmuhning timi zong hi thleiden thiam ngaingai ahau. Abu or Pumpak timi kan i fian ahcun Laimi hi tulio bantuk cun kan um lai lo dah timi hi a fiang ngaingai. Tahchunnak ah Kawlram hruaitu ASSK nih miphun dang pakhat kha amah pumpak in a uar ahcun zapi aa kan huap kho lo. Asinain ASSK nih amah pumpak a uar mi kha hramhram in zapi vialte nih nan uar ding asi ati asi ahcun buainak nih azulh lai.

Tutan ah kanpa le mifim tampi tthenkhat nih US thimnak kongah Trump nak in Biden an dirpi, ahmantuk. Hi zawn ah zapi nih kan theih aharhmi cu, pumpak an ruahnak in an dirpi mi asi timi hi kan theih hrimhrim ahau. Pumpak ruahnak nih zapi ahuap kho lo timi hi a cungah ka langhter cang. Pumpak a dirhmun le zapi dirhmun hi a cuaithlai thiam hrimhrim a hau. Tahchunnak ah atanglei bangin thil pakhat vun langhter chih ka duh.

Nan khuaram ah alamkip in hruainak lei ah midingfel taktak pakhat aum hnga, rampi ca le khua caah ruahnak ttha le tthanchonak caah biatak tein rian attuanmi asi pin ah ziknawh eihmuarnak kongah athiang bak mi asi hnga. Cucu khuami le rammi nih kan duh taktak mi le kan thimmi asi ko hnga. Asinain miphun ramdang kongah kan ruahnak le kan hmuhning aikhat tilo. Curuangah khua le ram le miphun caah kan duhmi le rian attuanmi kha kan thlahthlam ding asi hnga maw?

Acunglei langhtermi thawngin kan i fiang ngaingai lai tiah zumhnak ka ngei. Asau lai caah ka bia ah ka vunlut lai. Cucu zeidah asi? tulio Laimi nih kan buai taktak mi US thimnak kong hi asi. Acung ka chimcia bangin Trump attanhtu le Biden attanhtu hi Laimi chungin kan pale hna tampi an i tthen ve. Tthenkhat nih Biden an dirkamh i, tthenkhat nih Trump an dirkamh ve. Ahodah apalh timi hi asi ko.

Biden attanhmi hna nih Trump attanhtu kha nan palh an ti ve hna, Cuve bangin Trump attanhmi hna nih Biden attanhtu kha nan palh an ti ve hna. Hi nih zeidah asawh duh ti ahcun minung cu kan pum aidan bang kan ruahnak le kan hmuhning zong aidang dih timi kha asi. Laimi nih kan i bochan taktak mi kan pa le tthenkhat nih biden cu anmah pumpak tein an dirkamh komi cungah zapi kan phunzai mi hi cu kan palh taktak khi asi.

Bochanmi kan pa le hna nih khah hihi cu zapi kan dihlak in kan dirkamh hna ding asi tiah an ti belte ahcun phundang ngai asi hnga. Sihmanhsehlaw anmah pumpak tein an dirkamhmi an chimmi chungah an rianttuannak tiang kan dohmi hna hi cu kan palh taktak khi asi. Chinmi caah Laimi caah an rianttuannak vialte cungah kan i hrawm kho dih fawn ko ttung, pumpak an ruahnak le an hmurka miphundang khuatlang kongah an langhtermi cungah kannih nih ahram tiang kan coih mi hi cu kan palh bak.

Laimi le Chinmi cu ahohmanh nih kan dawt dih, zeitluk indah athat khawh lai tiin, chawva le thazang chuah in siseh karhlannak tiangin ruahnak achuahtu etc.. um dih asi ko. Cuchungah pumpak an ruahnak, miphundang cungah anmah le pumpak sining an langhtermi cungah kan cohlan lonak te hna i, Chinmi Laimi huap in an cawlcanghnak vialte hnu kan chit dingmi hi cu aphung hrimhrim asilo. Chinmi or Laimi tthatnak dingah cun kan lung aa rual dih timi hi theih kan hau.

Pumpak an dirhmun le zapi huap in an dirhmun hi thleidan thiam cang hna usih. zeiruangah dah hibia hi ka langhter ti ahcun, Laimi kanpa, Chinmi kanpa, chinram le Lairam caah a nunnak pek sian in rian attuanmi Dr Lian Hmun Sakhong nih miphundang cungah aruahnak, amah pumpak ahmuhning alanghter ruangah zei e, cu e kha e atimi tampi an um ruangah ka vun langhtermi asi. Pumpak ruahnak le zapi huap chimmi hi fiang cang hna usih. Tampi tialding aum ko nain mah vial si rih seh, Kalawm, By. Thawng BL

Be the first to comment

Leave a Reply

Your email address will not be published.


*