HI THIL HI I FIANG CANG HNA USIH, A ZEI HI DAH NA DUH DEUH

Nation State Policy Hi I Fiang Hna Usih. Nation State? State Nation? Pek Or Party Kan Harh Lo: Kawlram ( Union State) PITHAWNGSUH an rak serning hi phunhnih in hmuh peng asi. Kawl miphun nih an hmuhning le Tlangcung miphun nih kan hmuh ve ning cu aa khat lo ruangah kum 70 leng buainak a chuak cang. Kawl miphun nihcun Kawl Siangpahrang Anawratha chan in Kawl le Tlangcungmi hi lungrual tein Kawl Siangpahrang pennak tangah khua kan rak sa t’ihna.

Mirang Pennak a rak lut tikah Kawl le Tlangcungmi cu an kan t’hen i a dang tetein an kan uk. Cun Pinlung biakamnak thawngin aum ciami Kawl pennak kha kan ser than tiah an hmuh.Tlangcung miphun nihcun Kawl Siangpahrang pennak tangah ah kan rak um bal lo. Kanmah le kan ram te kan ngei ve. Pinlung biakamnak ruangah ram pakhat kan sert’i tiin kan hmuh ve. Cucu atu tiang kan buaimi cu asi ko. Myanmar ah Kawl miphun cu an tam ( Majority) i milu 70% ansi.

Kawl miphun nihcun Kawlram hi NATION STATE in hruai an duh. Nation State a sullam cu Democracy in kal, cun Tlangcungmi mitlawm deuh (Manority) duhnak kha asi khawh chung zulh le duhpiak ve i, Baho ukhruainak zong kha t’humh ko nain hrawk dih fawn lomi mitam deuh KAWL MIPHUN nih hruaimi Amyotha Naingngandaw အမျိုးသားနိုင်ငံတော် (Nation State) kha Kawl miphun nihcun an duhmi cu asi.

Kawl kuttang i umter i tlangcungmi duhnak zong kha asi khawh chungin tuahpiak ve khi asi ko. Cucu Ralkap le Kawl duhmi (Nation State of Ba​ma Majority) phun cu asi. Kawl ruahnak ahcun Tlangcungmi ram hi Kawl ram ah an i fonh tiin an ruah, cucu Nation State policy asi.Tlancung miphun kan ruahnak cu aa dang ve. Mitlawm deuh (Minority) asimi tlangcung miphun kan covo le nawlngeihnak humhimnak ding caah ram komh in hmun khat teah ram sermi asi (State Nation of multiple ethnic nationalities with coming together) tiah kan ruah ve.

Myanmar ram hi ifonh i sermi siloin ikomh i hruai t’i kha asi. Kawl sin ah kan ram ka ap hrimhrim hna lo.Kawl nihcun fawi tein Amyotha Naingngandaw an policy (Nation State) hi an hlo lai ka zum lo. Tlangcungmi zong nih kan ram kan nawlngeihnak kha Kawl kuttang ah kan up hna fawn lai lo. Kawl duhning ahcun kan ram le kan nawlngeihnak kha an mah kut ah ap i, an mah nih kan zawn ruah buin pek le bawmh in Uk kha an duh.

Democracy long a duhmi nihcun Kawl duhmi Nation State hi atha ko anti men lai. Asinain Miphun dawtnak thinlung taktak a ngeimi nihcun Democracy longah kan diriam kho lo.Mah caahcun Miphun thinlung ngei in ramkhel i, Kawl ramkhel ruahnak an policy zong hmuh zia thiam hna usih ti ka duh. Kawl nih National day an ngei ve.Chin nih National Day kan ngei ve.

Kachin, Shan le Karen nih National day an ngei ve. Aruang cu Miphun (Nation) kan si caah asi. Cucaahcun Kawl miphun an Party ah siseh, An Soceity ah siseh NATIONAL antimi khi anmah Kawl lawng ahuap ti kha kan theih awk asi. Nangteh na ruahnak ah Union cu I-Fonh maw asi (Nation State)?I-Komh dah? (State Nation) ?Kawl sin ah kutdok in an kan pek chommi ah lungawi (PEK OR) Nation State policy maw na duh deuh. Mah tein khuakhan lairel vemi STATE NATION dah na duh deuh? Jacob R Thang.