GOOD NEWS: BU 11 FONH NIH CATHANH AN CHUAH CANG

Pa-Oh bu 11 Fonh nih PNO hi Pa-Oh Miphun vialte a kan huap lo tiin an thanh.Pa-Oh National Organization (PNO) nih ralhrangbu he fonh in tlangcung hriamtlai pawl an doh mi kongah PNO nih Pa-Oh miphun a kan huap lo tiah Pa-Oo miphun bu 11 fonh in cathanh an chuah. PNO hi 2010 ah dirh mi a si i Shan ram thlanglei ah hrambunh mi hriamtlai ramkhel party pakhat a si.

Nai hrawngah ralhrangbu he fonh in hriamtlaibu an doh ti theih a si caah Pa-Oh miphun bu fonh in atu bantuk cathanh an chuah mi a si. Pa-Oh miphun vialte nih Kawlram mipi vialte he tang tiin ralhrangbu kan doh lioah PNO nih ralhrangbu an tanpi a si ahcun Pa-Oh mipi nih kan duh lai lo. PNO cu ramkhel party pakhat lawng a si caah Pa-Oh miphun vialte a kan aiawh kho lo tiah an ti.

Federal ram sernak kongah tlangcung miphun vialte, Karenni mipi le Pa-Oh mipi he kan dirh ti lai. Pa-Oh hruaitu, ramkhel party le Pa-Oh miphun ralkap nih federal le democracy ser nak kong ah hmunkhat tein kal ti dingin kan nawl hna tiin an cathanhnak an tuah. Credit: TCP

May be an image of text

Thawngpang Dang: Caan Karlak Myanmar Cozah National Unity Government (NUG) nih hramhram in nawlngeihnak a la i mipi cungah thatlonak le sualnak phuntling a tuahtu ralhrang khawngsil cu ramkip biaceihzung (International Court of Justice-ICJ) ah biaceih le dantat a si khawh nakhnga kan i zuam cuahmah tiah May 30, zarhpi ni ah cathanh a chuah.

NUG nih cun nuhrin covo phunglam hna kha tling tein zulh i ICJ he aa pehtlaimi hna he naihniam tein riantuan an i tim. Atu hi NUG le ICJ cu riantuanti dingin a herhmi kha pakhat hnu pakhat in an tuah cuahmah lio a si. Rohinya Muslim hna cungah miphun cihmih dingin thahnawnnak a tuah tiin 2019, December thla ah Myanmar cozah cu Gambia ram nih ICJ ah taza a rak cuai.

Kha lioah rampi ruahnak petu Suh Kyi nih Myanmar ram aiawh in thiamchehnak bia a va chim. Cuticun caan karlak tuah dingmi (Provisional Measures) an chiahpiak i cucu Myanmar cozah nih thlaruk ah voikhat report pek ding timi a si.Ralhrang nih nawlngeihnak an lak hlan ah khan NLD cozah nih ICJ ah voihnih report peknak a tuah manh.

Ralhrang nih nawlngeihnak an lak i rampi a buai cuahmah lioah atu bantukin NUG nih ICJ kong a vun chuahpimi hi a si. Ram a buai hlan i ralhrang nih Rohinya miphun cung i an rak tuahmi sualnak vialte le a buai hnu i mipi cung i an tuahmi sualnak le thatlonak vialte hi ICJ nih a zoh sawhsawh lai lo. NUG nih aa zuam lengmangmi hi a hlawhtlin ahcun ralhrang bawi hna cu an dih dongh ning a fak tuk te lai. Credit:TCP

Be the first to comment

Leave a Reply

Your email address will not be published.


*