EU NIH FIANG KO IN A LANGHTER CANG, TULUK LE RUSSIA

Chinmirror: Kawlram ah ralkap nih uknak a lakmi kong he pehtlaih in vawlei cung ram dihlak nih lungrual te in kan tantinak cu Taluk le Russia nih an kham (block) tiah EU foreign policy chief Josep Borrell nih Zarhpini ah a chim. Kawlram chung Democracy an um than khawh ahcun EU nih chawlehthalnak bawmhnak kan pek deuh lai tiah a chim chih.

Hriamnam zuarnak phihkharnak bantuk le ralkap council cungah UNSC nih dantatnak tuah aa timhmi pawl Taluk le Russia nih an khammi hi khuaruahhar ding a si lo (No Surprise)” tiah EU Chief Josep Borrell nih a Blog cahmai ah a tial tiah VOA nih a tarlangh hi a si. Ramri le ramkhel sining izuam cawknak (Geopolitical competition) ah Kawlram kong ceihtinak le hnatlaknak tuahti ding a har lai nain,

Ceih ding le tuah ding kanmah rian a si ve fawn tiah Borrel nih EU chungtel ram 27 aiawh in a chim hi a si. February 1 ni, ralkap uknak la hnu ah ralkap uknak duhlonak langhtertu hna cu ralkap nih nihin tiang hriamnam hmang in an kah hna caah ngakchia 46 telh in sualnak ngeilo mipi 700 leng an thi cang tiah AAPP cazin khomhsuahmi ning in theih a si.

Cu a thimi cazin chungah kan hnu cawn ningani ninikhat ah Pago khuapi ah minung 82 a thimi hna an itel i, cu ralkap tuahsernak cu, “Mi thahnak hmun” bantuk a si tiah AAPP nih cun min a pek beh. Kawl ralkap nih hriamnam hmang in mipi pawl an kah thahmi cu vawleipi nih thin domh in an cuanh cuahmah ko tiah Josep Borrell nih a chim ve.

Taluk le Russia cu Kawl ralkap he pehtlaihnak tha a ngeimi an si i, Kawl ralkap sinah hriamnam tambik zuartu ram zong an si hna. Daw Aung San Suu Kyi thlahpiak ding in EU Security Council nih kan hnu zarh ah nawlnak a tuah bantukin uknak latu ralkap council in tuanvo ngeitu hna zong dantat phitkharnak tuah ding in an timh cuahmah lio tiah theih asi.

EU nih hin Kawlram chungah sipuazi rian tam a ngei lo nain Democracy ram a si tikah chawlehthalnak le investment tam deuh piin kan karhter lai tiah Borrel nih a chim. 2019 kum lio ah Taluk nih Kawlram chung chawlehthalnak investment a tuahmi American Dollar 19 billion he tahchunh ahcun EU nih foreign direct investment a tuahmi Dollar 700 million a rak si. Ref: VOA

Relchih:Tedim ah pension a la cang mi pastor nuva hna cu an fapa aiawh ah an tlaih hna. Tedim khua ah CDM a lut mi, cozah riantuan Pu Do Sian Pau cu April 11, zaan suimilaam 11:00 hrawng ah ralkap nih tlaih ding in a inn ah an fuh nain inn ah a rak um lo ca ah an tlai kho lo. Pu Do Sian Pau an tlaih khawh lo ca ah kum 70 a si cang mi hringtu a pa le a nu Rev. Khup Khen Pau le a nupi an tlaih hna tiah tualchung media hna sin in kan theih.

Rev. Khup Khen Pau cu Cope Memorial Baptist Church ah Pastor a rak tuan i pension a la cang mi a si tiah kan theih.Cu leng ah, Myoma sang ah a um mi boarding sianginn ngeitu Saya Cin Bawi zong tlaih ding in an fuh nain a um lo ca ah amah ai ah a nupi an kalpi ti zong kan theihchih. Credit: The Hakha Post.

Be the first to comment

Leave a Reply

Your email address will not be published.


*