DR VAN HMUN LIAN: MIPHUN PARTY DAWT LE DIRPI A HOH NAK

Miphun Party Dawt le Dirpi hohnak:Politics kong ah ka hmuh khawh tawk cung in kan van langter lai. Khuapakhat ca le Hakha – Than tlang peng ca men in ruahding a silo. Chinmiphun dihlak ca huap in ka langhter lai.Politics tiluan cu can umtu ning hoih in ai thleng kho lengmang mi a si. Kanan (maths) bantuk in hihi a dikpeng tiah chim khawhmi a silo.

Tulio Kawlram umtu ning ahhin a fekmi demorcracy uknak a herh.Cucu an chim cio. An chim ning bel ai dang. Kawl miphun nih an herhmi democracy le tlangcung mi nih an herhmi demorcracy ai dang. Ai can lo. Cucu hmuh thiam a hau.Ram pumpi caah NLD a thawn a herh. ASSK hrim hi cu soisel men ding a silo. Amah belte amah ruang ah NLD ah i phum dih ding cu a si lo.

Tlangcung mi nih an au lengmang mi federal kong ahhin a fiangmi policy nei kho in phuang kho hnasehlaw iphum phu a si hnga. An chim duhlo mi hi a poi. Amah a um tilo tik a phan te lai. Cutik ah tih a nung tuk. Cu caah tlangcung mi caah a him lomi ah a cang.Tlangcung mi kong bak ahcun NLD le USDP hi an i khatbak ko. NLD a that hleinak nan hmu lailo.

Democracy caah NLD a thadeuh bak fawn.Phunghram remhnak ahhin tlangcung mi aw a than a hau. An aw a thannak ding ah party nih teinak a hmuh a herh. Kawl party chung umbu in miphun kong chimnak lam a pit.Development timi hi cu zei cozah chung paoh ah a um ko lai. Central party si ruang ah zeipi ai chap lailo.

A tu ah Vice President nih a tuahmi hi VP a sinak budget a ngeihmi chung in tuah mi a si. Hite hi kan van thatnak a si le kan i lawm cio. Nain hi bawmhnak ruang ah miphun politics ai mersan awk a silo.Zeitik ahdah central party ah kan um lai? Hihi a biapi. Central party or ruling party chung um a poilo can a um ve. Cucu federal phung a feh hnu lawng ah a si awk a si.

Mizoram cu an federal phung kong ah hal than ding a um tilo. A fek cang. Cu caah central party he an i peh zong ah a poi nak a umlo. India cozah le MNF nih minthut in hnatlaknak an neih hnu lawng ah an federal phung a fek.Kawlram cu federal ca aupi cuahmah a herh rih hih! Miphun aw a herh. Cucu thawnter a herh.

Muphun party an derthawm tuk le zeihmanh an si lailo tiah hnon ding a silo. A thawn tertu thazaang si a hau.Ngaktah pakhat asilo ah hngakchia te kha san a tlaih rihlo ruang ah hnuchit phun a lo. A upat tik le san a tlaih tik ah ka bawmh te lai ti tluk a si.Kha hngakchia kha santlai ding in a cawmkeng tu ding cu chungkhat le khuami tuanvo an ngei. Miphun party hi ngaktah he ai lo.

Federal phung a fehtikah miphun party ah kan um te lai ti ruahnak cu khua ruah ning ai linglet mi a si.Tulio miphun party an i then lengluang mi hi cu kan van a chia tuk. Ngaih a chia, thin a hung. Cucu kan der chin lengmang nak cu a si. Cucu sersiam i thawnter kha miphun nih zuam a herh. A har, a can a rau kho. Thok colhlo ah cun a rau chin lai. Hngah ding a silo. Miphun caah hin a herhnak ahcun sifah ngam zong a herh. Sungh ngam zong a herh.

Can tawi ca i kan herhmi a um, can sau ca i kan herhmi a um. Bawmhnak tiah kan mit a thit tawnmi hi can tawi ca an si. Federal kong hi can sau ca a si.Miphun party nih federal a chuahpi lailo an ti. A mah lawng nih a chuahpi kho fam lailo. Phunghram remhnak ah miphun dang cio le party ngan he i bawmhnak caah a biapi tuk.

Cu caah miphun party nih mah state chung i teinak a hmuh hmanh ah central party he ihawikomh thiamthiam a hau. Dotu sipeng ding a si hleilo. An chung ah iphum dihding a silo bantuk in.A fawizaang deuhmi kan i thim ahcun kan sung tuan lai. A harmi kan i thim ahcun a lam a bingbo lai na in hmailei caah a thadeuh lai. Credit Dr. Van Hmun Lian

Be the first to comment

Leave a Reply

Your email address will not be published.


*