DR. SASA LE KAWLRALKAP AN I PHOMH CANG, DR SASA ZONG AA SUM KHO TI LO

Kawlrakap le Dr. Sasa an i phomh ko cang ti khawh asi. An biachimmi le tulio thilsining zoh tikah. Kawlralkap nih Dr. Sasa taza an cuai. Dr. Sasa zong nih Kawlralkap faktuk in a tthuat ve hna. Kawlralkap nih Dr. Sasa cu kawlram rampi leirawitu na si tiah taza an cuai ve cang. Dr. Sasa zong nih Kawlralkap hna cu Saddam Hussein le Muanmmar Gaddafi bantuk in nan donghnak caan a phan kho tiah a ti ve. Hi konghe pehtlaiin a tanglei hna hi tulio thawngpang a linsa taktak mi asi.

The Chin Journal: Nihin Myanmar ram ah a cangmi thawngpang pical hna lak ah Laimi zapi nih kan theih awktlak a si tiah kan timi thawngpang pawl a tawinak in kan rak khawmhsuat hna. Myanmar Ralkap nih Dr. Sasa cu Rampi Leirawitu tiah Taza an Cuai. Dr. Sasa nih “Saddam Hussein le Muammar Gaddafi Bantuk in nan Dihdongh Kho” tiah Myanmar Ralbawi Ralrin Pek. Mizoram ah a Zaammi Minung 400 Leng an Si Cang.

Myanmar Ralkap nih Dr. Sasa cu Rampi Leirawitu tiah Taza an Cuai: ralkap (SAC) nih rampi leirawltu tiah March 16 ah taza an cuai, tiah theih a si. Myanmar ralkap thawngzamhnak MWD nih Dr. Sasa taza an cuainak kong cu March 16 zanlei ah thawng a thanh. Dr. Sasa cu ramleng ah a um lio a si i, atulio Myanmar ramchung thilcang pawl UN le vawleipi nih an theih nakhnga rian a ttuan cuahmah lio a si.

Dr. Sasa lawng si loin Myanmar aiawh in UN ah Permanent Representative a simi U Kyaw Moe Tun zong ah rampi leirawitu tiah Myanamr ralkap nih taza an cuai cang. (RFA). Dr. Sasa nih “Saddam Hussein le Muammar Gaddafi Bantuk in nan Dihdongh Kho” tiah Myanmar Ralbawi Ralrin Pek. Myanmar ralkap (SAC) nih atulio an thiltuahmi hi an pehzul peng rih a si ahcun rialdip uktu Saddam Hussein le Muammar Gaddafi bantuk in an caan an dong lai, tiah Dr. Sasa nih Sky News he biaruahnak ah a chim.

Myanmar ralkap nih an thiltuahmi an ngol a herh. Tlaihmi vialte zong an thlah dih hna a herh fawn. Cuti an tuah lo ahcun Saddam Hussein le Muammar Gaddafi lam an zawh lai. Tlaih an si lo hmanh ah rammi kut in an nunnak a liam kho,” tiah Dr. Sasa nih ralrin peknak bia a chim. Iraq rialdip uktu Saddam Hussein cu a nung in an rak tlaih i December 2006 ah US ram ah hri-awhnak in thihdan an rak pek. Libya ram rialdip uktu Gaddafi cu October 2011 ah aa thuhnak lamkam tiluhor ah an rak tlaih i cuka hmun cun an rak thah. (Sky News)

Mizoram ah a Zaammi Minung 400 Leng an Si Cang. Myanmar ralkap nih uknak a chuh hnu in Chin ramkulh in India ram lei ah a zaammi minung 400 leng an si cang, tiah RFA nih a langhter. A zaammi minung 400 leng chung ah a tam u cu palik rian a ttuanmi an si hna i, lamzawhtu pawl meithal in kah ding in ralkap nih order an pekmi hna a zul duhlotu pawl an si. A zaammi hna lak ah hin palik lawng si loin lamzawhnak hruaitu cheukhat le meithat zung rianttuantu pawl zong an i tel hna, tiah theih a si. Credit: The Chin Journal.

Be the first to comment

Leave a Reply

Your email address will not be published.


*