CELH DING SILO. RALHRANG NIH AN KHUA AN KHANGH DIH

Ralhrang kawlralkap thiltuah cu lung a fak chin lengmang ko cang. Khua zong an zoh kho tilo an khangh dih i, Khua pakhat cu vutcaam bantuk in an chuah dih. Magwe ramtthen, Pakhuko district pauk peng Kimma timi khua cu ralhrang kawlralkap hna nih nizan june ni 15 ah khan an khangh piak dih hna.

May be an image of outdoors

Kimma timi khua cu vutcaam bantukin aa chuah. Kahdohnak a fak chin lengmang lai. Ralhrang nih mipi cungah a phunphun thihphaihnak, hrocernak le thatlonak an tuah chin lengmang lai. Minung lungthin a ngei lomi ralhrang nih hin mipi fahnak le temtuarnak ding lawng an ruah khawhmi a si. 

May be an image of outdoors, tree and text that says "SHOT ON REDMI 10x AI QUAD CAMERA"

Tutan ah ralhrang kawlralkap hna nih an khangh piak mi hna khua hi inn 250 hrawnghrang an umnak khua a si i, hi khua ah hin  minung in thongkhat hrawnghrang an um tiah thawngzamhnak nih a langhter. Ralhrang kawlralkap thiltuah hi minung lungthin zong an ngei ti lo. Cu hlan ah hibantukin khua dihlak khanghpiak timi hi theih awk a um rih lo. Credit: Khit Thit Media

May be an image of outdoors, tree and text that says "SHOT ON REDMI 10x AI QUAD CAMERA"

Thawngpang dang:Chin ralzam konghe pehtlaiin ralhrang kawlralkap bawi General Zaw Min Htun cu phone an chawnh nain a tlaih piak hna lo. Chin ralzam konghe pehtlaiin a tuhi ralzam pawl umnak hmun cu ralhrang kawlralkap nih an congh dih hna caah bawmhchanhnak zong a tam u cu pek khawh a si lo caah ralzam pawl an lungre a thei ngaingai hna. Hi kongah thawngpang an chimmi cungah General Zaw Min Htun chawnhbiak an timh nain phone a tlaih piak hna lo.

Chinram chung thil sining a cangmi an langhter mi hitihin a si. Mindat ah hin ralzam minung thong 30 hrawng an um i, ralhrang kawlralkap hna nih lam an kham rih tiah a peh chap. Mindat khuapi ah minung thong 60 hrawng an um i, hi chungah kanmah lei hi minung thong 30 kan si. Hi hna bawmhchanhnak dingah hin WunMahtuu le SweAungta lam a um. WunMahtuu lei hi ralhrang kawlralkap nih lam an phih.

Cun SweAungta, lam hmunli a umnak zong an kham dih ruangah hruk eih thil cu chim lo ei le din taktak hmanh kan pe kho hna lo tiah bawmchantu pakhat nih a chim rih. Kan thisa khat hna an tuarnak hi afak hringhran ko. Atu lio hrawng le bang cu Chinram ah ruah a sur ngaingai tawn i, ei le din cu um rih seh umnak hmun hmanh tthatein an ngei lo. Kan dirhmun hi a harsa hringhran ko tiah ralzam chungin pakhat nih a chim.

Mindat khuapi in khua tthenkhat a zaammi hna cu ralhrang kawlralkap nih an dawi hna i, an kah hna, an luhhnawh hna i, hriamnam ngan in an kah rih hna. Nizan in ralzam umnak cu an luhhnawh tthan i khuachung ah a ummi le ramtang ah a ummi hna cu i chawn bia kho loin kan zaam peng ko, Atu le bang cu khoika dah kan zam than lai ti zong kan thei ti lo i, kan vaakvai ko tiah a zaammi chungin pakhat nih a chim rih.

Cun Chinram Kanpalet ah ralhrang kawlralkap le mipi rungvengtu Chinland Defense Force i kahdohnak ah mipi a zaam mi hna hi minung tam ngaingai an si tiah an langhter. Kanpalet ah a tu lawlawse hi cu kahdohnak a um rih lo i, thawngpang a deih lio te a si tiah Chinland Defense Force lei in minung pakhat nih a chim.

Asinain nizan tihni zaan ah khuapi chungah meithal puah thawng le hriamnam ngan a buak tthan tiah an chim. Hi ruangah khuami pakhat zong hliam a tuar pin ah mipi umnak inn pahnih zong akaang dih tiah security pakhat nih RFA thawngzamhnak ah a chim. Khua chung ah cun CDF lei nih kahdohnak tuah hi an duh ko nain ralhrang lei nih zantlai hnu ah tukdohnak an tuah tthan tiah a chim.

Hi ruangah ralzam an tam chin lengmang i khuachung ah a ummi hna zong thinphang le thlalau in an um hna. Khuami thinphang in an um lio ah ralhrang hna nih caanthaa ah an i lak i innkip ti awk ah fir le tlei in an vak i thilri dang zeimawzat zong an lak tiah mit hmutu khuami pakhat nih a chim. Cun ralhrang hna nih inn pakhat ah an lut i, Laptop pahnih desktop an lak rih.

Zan fatin ti awk in khuachung ah meithal puah thawng le hriamnam ngan puahthawng theih peng a si. Cu ruangah khuami hna cu khuachung ah um thiam lo in an um ruangah minung thongkhat renglo hna cu hmunhimnak ah an zam hna tiah khuami pakhat nih RFA thawngzamh nak ah a chim rih.

Khualhringtlang konghe pehtlaiin Chinland Defense Force hruaitu pakhat nih mipi konghe pehtlaiin RFA thawngzamhnak ah thanhnak a tuah. June ni 10 le June 11 ah ralhrang kawlralkap le Thantlang Chinland Defense Force hna cu kahdohnak an tuah. Hi i kahnak ruangah khua pasarih chungin minung thonghra renglo hna cu a himnak hmun ah an zam hna.

Hi konghe pehtlaiin CDF hruaitu pakhat nih RFA thawngzamhnak ah a chimmi cu Khualhringtlaang chungin khua pasarih ah a ummi minung thonghra renglo hna cu a himnak hmun, Thantlang lei ah an zam hna tiah a chim. Ahramthok ahcun ralzam hna hi an Thantlang ah zaam dingin khua 7 hna cu kan chimh hna. Kanmah CDF nih biatak tein kan doh ve hna.

Atu rih ahcun thawngpang a dai deuh ngai cang. Asinain Khualhring Tlaang chung khua karlak ahcun thawngpang a um pah lengmang ko tiah a chim. Hi konghe pehtlaiin Hakha le Matupi kar kahdohnak ruangah khuami minung thongruk renglo hna zong ram tangah an zam hna tiah CDF chungtel pakhat nih a chim chih, Ralzam hna dirhmun a that deuh lo caah caan karlak cu ngol rih zong kan duh ngai ko. Aruang cu ralzam hna zohkhanh hi a biapi deuh tiah a chim chih.

Chinram ah ralzam minung thong 50 renglo an um hna i bawmhchanhnak lam ah ralhrang kawlralkap nih an kham hna. April thla thok in Chinram ah CDF le ralhrang kawlralkap hna cu kahdohnak an tuah. Curuangah umnak hmun zaamtaak in ralzam hi minung thong 50 an um tiah khuami le bawmchaantu hna nih an chim. Ralzam hna bawmhchanhnak ah hin ralhrang kawlralkap hna nih an kham hna i, ralzam umnak tiang an kah hna tiah RFA ah a chim chih.

Cubantuk in Chinram ralzam hna an tuarnak bawmhchanh dingin a buu cawlcanghnak vialte ralhrang kawlralkap nih an luh hnawh hna i, bawhchanhnak zong an kham hna nak a ruang bik chim fiannak tuah ding in General Zaw Min Htun cu phone in pehtlaihnak an tuah ko nain phone a tlaih piak duh hna lo tiah RFA thawngzamhnak nih a langhter.

Be the first to comment

Leave a Reply

Your email address will not be published.


*