CDM A TUAHMI PALIK NIH RAM CAAH A NUNNAK A PEK EE, RIP

RIP. Kalaymyo Palik pakhat CDM a tuah hnu ah Kalay PDF ah a lutmi Hla Myo Htut cu ralhrang kawlralkap he an i kahdohnak ah a nunnak a liam tiah thanhnak an tuah. Tutan ah a nunnak a liammi Hla Myo Htut hi sianginn a dih hnu ah Palik ah a lutmi a si i, Mungzua in Kalaymyo ah a rak i thialmi a si. Ralhrang nih uknak an lak hnu ah CDM a tuah colh.

CDM a tuah in a himnak hmun Mizoram ah a zam hmasa. Cun amah hi Kalaymyo palik chungin CDM atuah hmasa mi zong a si. Mizoram ah a zaam nain June thla in khan a kir tthan i, Kalay PDF sin ah a lutmi a si. Amah hi hruaitu tha taktak mi pakhat a si, Chairman dirhmun in sianghngakchia a rak hruaitu zong a rak si. Mi dingfel a si caah ralhrang hna nih ningcang loin thil an tuahmi a zohkhawh lo caah an mah doh dingin PDF ah a lut i a tubantukin a nunnak a liam hi a si.

Thawngpang dang: Sii cawk ah a kal mi Pu Hrin Cung le a hawi Thantlang SAC mithat phu nih an velh hna. Chin Ramkulh, Zophei Peng, Khuabung khua in Thantlang khuapi chung ah sii cawk ding in a kalmi Pu Hrin Cung le a hawile hna cu SAC nih an velh hna tiah thawng kan theih. Hi kong he pehtlai in thil um tuning a thei tu pakhat nih, “Khuabung in Thantlang ah sii cawk ding in an kal.

Thantlang khuachung an phanh ah SAC nih phone an chek hna an hmuh. Pu Hrin Cung hi a hawile pahnih he an si. An hawi pakhat hi phone chek ding in an dirter lio ah dir loin a zaam i meithal in an kah. Pu Hrin Cung hi an velh hnu ah an thlah than,” tiah The Hakha Post ah a chim. SAC nih atu bantuk in an tuahto hna hnu an hawipa pakhat konglam an thei kho rih lo. Credit: The Hakha Post.

Be the first to comment

Leave a Reply

Your email address will not be published.


*