BREAKING NEWS: RALHRANG KAWLRALKAP NIH THANHNAK AN TUAH HOI CANG

Apoi ti lengin chim ding dang a um ti lo. Kawlralkap nih mipi an kahthah cuahmah lio, ram mipi vialte hmunkip kaa kip in ngeihchiatnak le lungfahnak in kan um cuahmah lio ah Kawlralkap nih thawngpang chia taktak thanhnak an tuah tthan cang. Kawlralkap ralhrang hna nih thawngthanhnak an tuah ningin an kalpi taktak asi ahcun ramchung buainak zapi nih theih khawh asi tthan ti lai lo.

Min Aung Hlaing hruaimi kawlralkap ralhrang hna nih thaizing March ni hleiriat thok in kawlram chung WIFI kan phih cang lai tiah thanhnak an tuah tthan cang. Hi konghe pehtlaiin Internet Company ah rianttuan hna nih thanhnak an tuahmi cu a ralaimi thaizing March ni 18 thok in kawlralkap ralhrang hna nih WIFI kan thah lai tiah thanhnak an tuah tiin an chim.

Ralhrang kawlralkap hna nih hin WIFI cu zeitik tiangah kan phih or kan thah lai timi an langhter chih lo caah zeitik tiangah wifi an kham phih lai timi theih asi rih lo. Sihmanhsehlaw an zumh ning ahcun March thla chung hi cu an phih ttheu lai tiah an zumhnak an langhter. Hi konghe pehtlaiin March ni 15 in internet line an phih mi zong zeitik tiangah an phih lai timi zong theih asi lo.

Hi konghe pehtlaiin thawngpang thar a um le um lo, timi dottletnak or theih a duhmi hna kan um sual ahcun thawngzamhnak, kawlram thawngzamhnak ngan a simi Mizzima le DVB etc… ah hal khawh le dottlet khawh asi. Mizzima thawngzamhnak chawnh a duhmi nih 09-265568229 ah chawnh le hal khawh asi i, DVB chawnh a duhmi nih 09-797576333 ah chawnh khawh an si. I, Atang hmanthlak ah tling tein zoh khawh asi.

No photo description available.

Lung Afak Ko Ee: Kawlralkap nih sualnak ngeilo tuchun Kalaymyo ah an kah thah mi Laipa Salai Cung Lian Ceu nih a thih lai te, a hnu bik hringtu apa sin ah bia a chimmi cu celh ding asi lo. Lung a fak hringhran ko, a zeiti in dawmhchanh awk nih le attha ttung lo. Ruah lengmang tikah thinlung nih a celh hrimhrim lo. Athih lai te ah a fahnak kong cu hringtu apa sin ah a chim.

Tuchun Kalaymyo lamzawhnak ah kawlralkap le palek nih zeisualnak ngeilo kan laipa Salai Cung Lian Ceu nih meithal in an kah hnu ah a nunnak aliam. Salai Cung Lian Ceu hi sualnak pakhat hmanh angeimi asi lo. Motor cycle aa cit lio ah Kawlralkap hna nih an kah thah mi asi. Tutan ah a nunnak aliamnak hi a nau nu chanh ding le kham dingin akalnak ah hin a si.

Salai Cung Lian Ceu nih a nunnak thaw a dih lai te ah hringtu a pa sin ah a chimmi cu kapa aw ka paw a fak tuk ee tiah a chim. Salai Cung Lian Ceu hi an chungkhar ah upa bik a si i, a dawttuk mi a nau zawn a ruahtuk nak in atubantuk in kawlralkap ralhrang hna nih kahnak in a nunnak aliam hi a si. Salai Cung Lian Ceu ruak cu Thaizing suimilam pahra ah an vui lai.

Zeihmanh sualnak angeilo mi kan thisa khat a simi a nunnak a liam hi cu tuar a har hringhran ko. Kan naupa ruak vui ni le caan ah kanmah kan umnak hmun cio in siseh a hmun le hma a ummi hna nih kan si khawh chungin tuarpinak langhter cio hna usih. Ram le miphun caah a nunnak aliammi pasalttha Salai Cung Lian Ceu nih akaltakmi a chungkhar hna cah thlacamnak in bawm cio hna usih. Credit: ZCE

Be the first to comment

Leave a Reply

Your email address will not be published.


*