AUNG SAN SUU KYI NIH AHODAH A THIM TE HNA, AMAH KUT AH A UM CANG

NLD party in Cozah thar chung ah Ramthen le Ramkulh caah hruaitu lubik Chief Minister hna cu Daw Aung San Suu Kyi amah pumpak nih a duh mi a thim hna lai tiah NLD party CEC chimphuannak nawlngeitu Monywa Aung Sin nih a chim. Cozah chungtel le Minister dihlak, Chief Minister dihlak hna he pehtlai in Daw Aung San Suu Kyi amah pumpak nih a thim hna lai.

Nihin tiang ah ahodah Chief Minister le Minister an si te lai timi hi kan chim kho rih lo. A caan phak tik poh ah kan theih te ko lai,” tiah Monywa Aung Sin nih The Hakha Post ah a chim. 2020 November 8 i tuah mi thimnak ah NLD party in Hluttaw Palai minung 920 nih teinak an hmuh i, Pyidaungsu Cozah ser khawh nakding ca ah a herh mi Hluttaw Palai minung 396 an hmuh tiah UEC nih a thanh.

2015 kum lio zong ah NLD party nih Pyidaungsu Cozah pi ser khawh nakding ca ah a herh mi Hluttaw Palai leeng in a rak hmuh ca ah Cozah pi a rak ser cang. Cun, cheukhatRamkulh le Ramthen i Chief Minister pawl riantuan ning that lo ruang ah le biachim i palh sual ruang ah Tanintary Ramthen Chief Minister Daw Leh Leh Maw le Kayah Ramkulh Chief Minister U Alphawng Shoe hna cu taza an cuai hna i an rian in an phuahter hna tiah theih a si.

A liamcia kum nga chung Cozah i a tuahser ning an riantuan ning he pehtlai in mizapi nih thazaang kan pe hna lo timi aw aan a chuak pah. Tutan hi cu mizapi awaan ngai in riantuan a si cang lai. Cun, Chief Minister pawl zong hi mizapi ca ah biatak tein le luhlinh in rian a tuan mi thim an si cang lai. Pakhat a um mi cu mizapi nih duh mi le duh lomi an um lai.

Asinain fimthiamnak cu an ngei hrimhrim lai,” tiah NLD CEC Vice Chairman-2 Dr. Zaw Myint Maung nih 2020 November 17 video press conference tuahnak ah a chim. Credit: The Hakha Post.

Be the first to comment

Leave a Reply

Your email address will not be published.


*