APOITUK EE, KAWLRAM DIRHMUN THINPHANG TUK SI CANG

Ara Lai Mi Zarhhnih Ah Myanmar Mipi Lethnih Covid An I Chawn Kho Tiah British Nih Ralrinpek nak a chim Myanmar ram cu ara laimi zarhhnih chungah Myanmar minung nuai 56 sin in Covid zawtnak a kharh kho tiah British UN palai nih July 29 ah ralrin peknak a chim. Myanmar ram cu February thla ah a cangmi ramkhel thlennawnnak in Myanmar ralkap in tuanvo ngeitu hna cungah American,British telh in ram dang cheukhat nih phihkharnak an tuah hna.

Hi bantuk ram thlennawn nak ruangah Myanmar ram ngandamnak le ngandamnak riantuan hna a hnorsuan hna,tlaihkhihmi hna he zong a pehtlai fawn tiah British Palai Barbara Woodward nih Myanmar kong he pehtlai in Myanmar kong ceihmai nak ah a chim hi a si. Myanmar ram cu Virus i chawnhnak a rantuk caah ruahdamh ning ahcun a ra laimi zarhhnih ah rammi hnarcheu Virus an i chawn kho tiah a chim. Myanmar ram cu nai te ah China ser sii nuai hnih an ngah ko nain atu tiangah rammi 3.2% lawng an i chun kho tiah Reuters nih a langhter.

Thawngpang dang. Thlanglei Laitlang Doh nakding ah SAC nih Nihin ah Voi 2 Tiang Thazaang a Chap.CDF-Kanpetlet le CDF-Mindat ttang tti in SAC ralhrang he i kahdohnak a fah chin bantuk in nihin July 30 ah SAC nih ralkap thazaang chapnak voi 2 tiang a tuah chap. Nihin zinglei sml. 11:00 hrawng ah Saw khua lei in SAC ralhrang motor 4 le helicopter in Kyauhtuh SAC ralhrang hmunkhuarnak ah thazaang chapnak an tuah cang.

Kyauhtuh hi Mindat he meng 18 hrawng a hlatnak ah a ummi a si i, Thlanglei Laitlang raldohnak ca ah SAC nih abiapi bik hmunkhuarnak ah a hmanmi a si. Kyauhtuh ah ralkap vanlawng bual a um i cuka in cun Mindat lei ah ralhriam ngan miakpi (Artillery) in an kah khawh fawn.Nihin chun sml. 12:00 hrawng ah a dang Helicopter pakhat Kyauhtuh vanlawng bual ah a ttum tthan.

Nizaan July 29 ah Mindat le Kanpetlet karlak ah kahdohnak fak ngaiin a chuak i, SAC ralhrang lei in a thimi le hliam a pumi an tam caah hnu ah an kir tthan, tiah CDF-Mindat ttuanvo ngeitu hna nih an chim.Cu lawng si loin July 29 zaanlei sml. 6:00 hrawng zong ah Mindat le Matupi karlak ah kahdohnak a um tthan.Mindat le Kanpetlet peng chung kahdohnak ruang ah ralzaam zong an karh chinchin.I kahdohnak pehzul in a um ruang ah le nikhua a chiat ruang ah kap hnih kahdohnak ah hliam a pumi le a thimi cazin fiang in an fehter kho lo. Credit: The Chin Journal

Be the first to comment

Leave a Reply

Your email address will not be published.


*