KHAH THAWNGPANG TTHA TAKTAK A CHUAK CANG HIH, ASUNGLAWITUK

Moderna: Covid vaccine nih 95% Khamkhawhnak Thazaang a Langhter Cang. Covid-19 khamtu vaccine thar an sermi hi 95% tiang hmual a ngei cang, tiah US company Moderna i data hmasa nih a langhter. Pfizer sin in a phichuak bantuk in Moderna sinin hmuhmi a phichuak hi lung a hmui ngaingai i, vaccine an ser cio mi nih tutan pulrai donghnak a tuah khawh cang lai, tiah ruahchannak a thawnter chinchin cang.

Company pahnih nih vaccine an ser veve mi kongah lunghmuih awk tlak ngaingai in hneksaknak an tuah cikcek. “Nihin ni cu ni sunglawi a si” tiin Moderna nih a chim. A ra laimi zarh tlawmpal chungah a takin hmannak nawl an ngeih khawhnak dingah namhnehpiaknak kan hal lai, tiin timhlamhnak zong an ngei cang. Asinain, data hmasabik an hmuhmi a rih caah hin, a phi pek khawh rih lo mi biahalnak tampi a um ko rih. Zeitluk tha dah a si?

US i zaanghleicawi pawl hi minung 30,000 an si i, hnarcheu cu zarh li dan in voihnih tiang hneksaknak vaccine an chunh cang hna. A taangmi cu test sawhsawh nak an chunh chung hna. A ningcang zoh duh ah. Covid-19 symptoms thanter an duh caah minung 95 cungah hneksaknak an tuahmi hmasa. Cu tan ah cun minung 5 cung lawngah Covid zawtnak he ai pehtlaiin vaccine an hman i, a taangmi minung 90 cu a deu in an thlop chung hna.

Kan hmanmi vaccine nih hin 94.5% tiang a kham khawh cang, tiah company nih an chim. Hneksaknak an tuah mi chungah minung 11 hi Covid in a zaw zualhma ngaimi an si. Asinain, vaccine chunhmi hna cungah cun pakhat hmanh a tlung lo, tiah data nih a langhter. Buatlak in zoh ah cun vaccine a hmual hi lunghmui ngai a si ko cang, nihin ni cu ni sunglawi a si ko e,” tiin Moderna ah chief of medical officer Tal Zaks nih BBC News ah a chim.

Zeidah kan theihlo mi a um? Kan hneksakmi hna zaanghleicawi pawl an sining fiangtein theih khawhnak dingah caan saupi zoh rih kan hau. Cucaah, tutan vaccine kan chunhmi hna hi zeican dah a daih lai, timi hi kan thei kho rih lo.Cun Covid in a thi tambikmi kum upa pawl cungah zeitlukin dah hmual a ngeih lai, timi kongah data pakhat hmanh a um kho rih fawn lo.

Asinain, tutan vaccine nih hin kum kongah a thazaang a sungh te lai hi data nih a langhter mi a um hraw lo,” tiah Mr Zaks nih BBC ah a chim. Cun, tutan vaccine nih hin Covid in zualhma lo dingin mi pawl a khampiak hna, asiloah midang chonh kho lo dingin maw a tuah hna, ti zong hi theih a si rih lo. Zeitindah vaccine hi hmanh a si, timi hi a cunglei biahalnak vialte nih lai a rel ding khi a si. A safe (him) maw?

A him le him lo kongah lungretheih dingmi kong data nih a langhtermi a um ruam lo. Asinain paracetamol hmanh hi 100% in a him thlu ve ruam lo. A cheukhat an hneksakmi hna cu lung a mit na, lu a fak na, taksa a fak na an si hna, tiah theih a si. “Riantuan khawhnak thazaang ai ngeihmi vaccine pakhat, cun zawtchonh khawhlo dingin thazaang a pe khotu vaccine pakhat nih cun cu bantuk fahnak, lungmi, hei ti bantuk cu a chuahpi te lai, ti cu i ruah cia a si ko,” tiah Imperial College London in Prof. Peter Openshaw nih a chim.

Pfizer vaccine he tah zeitindah tahchunh a si lai? An karhlan daan hi ai khat ngai. Immune system thawnter dingin cii in sermi virus phunkhat cu minung tak chungah an companyan chunh veve hna. A hmasabik an data veve nih an langhtermi zong tutiang ah cun ai khat ngai, Pfizer vaccine nih 90% tiang khamnak thazaang ai ngeih, Moderna vaccine nih cun 95% hualham tiangin khamnak thazaang ai ngeih.

Asinain, hneksaknak cu pehzulh in an tuah veve ko rih i, a donghnak hi % an chuahpi te dingmi hi a thleng kho mi a si ko rih. Moderna vaccine hi saupi i chiah khawh dawhdang a si, zeicahtiah thla 6 chung tiang hi minus 20C ah thatein chiah khawh a si i, a thami fridge chungah cun thla 1 hrawng tiang cu i chiah chung khawh a si.Pfizer vaccine belte hi cu hlei in a kikmi ah chiah a hau, minus 75C hrawng tiang a kikmi ah. Asinain, ni 5 chung hi fridge chungah chiah khawh a si ve.

Russia nih an sermi Sputnik V vaccine zong hi 92% tiang a hmual a tha cang, tiah a hmasabik data an chuahmi nih a langhter, tiah theih a si. Vaccine cu zeitikah dah ka tinco khawh te ne lai? Vawleicung khuazei zawn na um, timi le zeitluk upa dah na si, timi nih lai a rel te lai. Riikhiaktu (regulators) nih zohfelpiak dingin a ra lai mi zarh tlawmpal chungah sohluah kan tiin chom ko lai. US ah hin 20 million hrawng cu kan chuah khawh te theu lai,” tiin Moderna nih a chim.

Hmai kum in khin cun vawlei pumpi ah hman awk tha dingin a tlawmbik 1 billion hrawng cu chuahkhawh kan i zuam lai i, kan sermi vaccine hi ramdang zong nih an kan cohlanpiak nakhnga kan nawl hna lai, tiah Moderna nih a chim. UK nih nihin tiang i vaccine an i cah ciami hi phun 6 a si cang i, Moderna vaccine hi 6 lakah ai tel rih lo caah, cah ve le vah ve lo ding kong an ceihkhaan lio pi a si.

Vaccine chunh hmasabik dingmi ah kum upa pawl si te dingin, UK cozah nih timhlamhnak an ngei. Zeitian dah vaccine hi rian a tuan ning a si. Moderna nih hin RNA vaccine a ser. coronavirus hrik a cii phunkhat(genetic code) kha minung takchungah siriin in a chunh. Cu nih cun protein dah hi cak ngaiin a cawlcanghter, asinain virus dihlak ningin cun a cawlcanghter lem lo. An ronhmi cii in sermi virus nih cun ral do kho dingin immune system hi training a pek lai, ti a si.

Coronavirus doh awkah kan takpum cu antibodies serchuah kho dingin training a pek lai, cun T-cells tiin theihmi immune sytem a dang phunkhat zong cu training a vun pek rih lai. Zeibantuk dah a caak (reaction) a tuahmi an si? Moderna sinin thawngpang kan theihmi cu lung a hmui ko. A ra lai mi thla tlawmpal te chungah vaccine tha taktak kan i ngeih khawh cang lai, tiin thazaang a kan petu thawngtha taktak a si,” tiah Imperial College London in Prof. Peter Openshaw nih a chim.

Tutan thawngthanhmi nakin a tlam a tlingdeuhmi hluhchuah kan herh rih, asinain, tutan thawngpang nih milung cu a kan thawhter ngai i a tha hringhran ko,” tiah a chim. Kan hnungzarh i Pfizer nih thawng an thanhmi bantuk tein, hmual a ngei taktakmi a phichuak he a tu bantukin vaccine pakhat serchuah a si mi kong kan theihmi hi thawngtha taktak a si,” tiin University of Oxford in Prof. Trudie Lang nih a chim.

Hihi cu hneksaknak a laifang hrawng lawng a si ko rih, zeicahtiah, vaccine kan hneksakmi zaanghleicawi pawl ah virus nih a tlunhmi (cases) an um ngai rih i, aho hi dah a taktak a si mi vaccine chunh a si i, aho hi dah vaccine lem chunh a si, timi fawizaang taktak in hliah khawhnak lam an chuahpi khawh rih a hau,” tiin a chim. Credit: Chelsea Bawi.

Be the first to comment

Leave a Reply

Your email address will not be published.


*