KAN ZULH CIO NAK LAI KAN SAWM HNA BY CHINCHIN PEKTHANG

COVID-19 pulrai a voi hnihnak a tlun lo nakding i ralrin le i runven daithlang lo tein, Vawleicung huap in siseh, Kawlram he ramri ai tlai mi India le Bangladesh ram ah siseh, cun Kawlram chung ah Rakhine ram ah siseh, COVID-19 zawtnak rungrung a ngei tiah hmuhthar mi mizaw an hun karh tthan cang. A zaw mi chungin acheu nak uak, 100 ah 61 tluk hi mithmuhnak ah cun a dam mi an lo ko i, an zawtnak a langh ning ai hngal lo.

Asinain zawtnak an ngei ko i mi zong an chawnh hna caah pulrai a tlun ning ai nolh tthan kho. Cucaah Ngandamnak le Zaangleknak Zung nih an thanh bantuk tein, zawtnak i runven ning zapi nih kan tuah cio kan zulh cio naklai kan in sawm chin ve hna. COVID-19 i runven ning zulh ding 8, Pakhatnak. A si khawh chung inn ah um ding (lengchuah lo ding) Pahnihnak. Mi buutnak hmun a herh lo ah kal hrimhrim lo ding.

Pathumnak. Pakhat le pakhat i hlaat in um ding, a si khawh ahcun pe ruk dan in umkal ding, Palinak. Lengchuah fatin, mi buutnak hmun kal tik poh ah kaa le hnar hup (mask) ningcang tein le pel lo tein i hruk hrimhrim ding, Panganak. Kan kut ah a kai kho mi virus rungrul an thian nakding ah chapiat he second 20 chung a tlawm bik kut i ttawl lengmang ding. Paruknak. Ramdang in a tlung mi cu chawhvahter lo in, amah dang tein (quarantine ah) umter ding; phung lo in a rak tlung mi an um a si le pel lo tein thawng i thanh ding.

Pasarihnak. Zawtnak a ngei mi mizaw he a umkal tti mi, zawtnak a si kho tiah ruah mi taklinh, khuhkhuh, rimrua zeihmanh theih lo in um, thawchuah i harh tibantuk tuar ahcun a nai bik ngandamnak siizung asiloah bawitlang sinah thawngthanh colh ding, Pariatnak. Zawtnak rungrul a ngei tiah hmuh mi he ai pehtlai mi minung kawl khawh nakding rian ah ttha tein i bawmh cio ding. Chirhchan: Ngandamnak le Zaangleknak Zung Thawngthanh le Tlangau (2020 August 19). Credit: ChinChin PekThang

Relchih Aduhmi caah: Dear Chinchin Pekthang (Facebook Page) Admin Team, Thantlang bak in Sayama Chinchin tutan thimnak ah meekuang a dong ve lai ti ka theih le lawmhnak ca kan van kuat ve hna. Sayama Chinchin hi Nargis thlichia hartong mi bawmhnak rian a ttuan lio an sinah volunteer in ka rak kal bal ve i a ziaza, rian a thiam ning le adangdang a fimthiamnak hi a zatawk ka rak hmuh ve.

Cucu kahin von in hrawmh hna ka duh. Pakhatnak ah: aho he poh rian a ttuan kho mi, rianttuantti hawi a upat i mi zawn a ruat mi a si. Kachin, Karen, Kayah, Pa-O, Kawl kakip in miphuntling mino lawngte training a tuahpiak hna, Ayeyarwaddy ramtthen hartong khua kiken khuatebarek vialte a culpi hna. Nargis lio i an rak ttuan mi hi lungthin harsa hnemh le bawmh a rak si.

Thli le ruah lakah a minung he an bawmh mi hna he a zohkhenh ning hna ka hmuh tikah rianttuantti hawi a pum kho mi, mi bu a lumtertu, harnak phunzakip in a rianttuantti hawi thazaang a pe khotu a si a fiang. Pahnihnak ah: a mak ngai mi cu “holh” phun tam tuk a thiam, a holh khawh. Nan zum men lai loh. Va hniksak te u. Hakha, Falam, Mizo holh thum hi nuhrin holh ah a kemh hna. Kawl le Mirang a thiam lai ti cu chim hau lo.

Tedim holh zong a thiamchih in ka cing. Zophei, Lautu le Mara holh zong hi ai harh lai ka ruat lo. Holh ai laak khawh tuk. Hihi education lei scholar nih cun “linguistic intelligence” a sang ngai mi a si an ti lai. Nargis chung a holh khawh pah ve mi ka theih mi ah hin Kachin holh ai tel rih fawn. Holhrel thluak a sang mi hi mibu tthithruainak ah a menmai an si lai lo dah. Pathumnak ah: “ramkhel ramrian ramuknak kong a ruat pengtu” a si. Cucu Nargis thlichia hartong bawmhnak rianttuan lio an sin i ka ttuan chung, a biachim te pawl ka ngaihnak in ka hngalh mi a si.

Um pah kal pah rianttuan pah tepawl i bia an i ruah tawn bia a chim tawn mi tepawl ah Kawlram Laitlang thlennak kong ai tel lo a um bal lo.Atu bantuk in ramkhel ah thimnak ah a luh hi a thisa nih a rak hlam peng mi a si ka ti khawh. Ka ca a sau sual lai. Hi vial si sehlaw. Atu lio cu party ttanh le thangchiat hna a tam le, ka rianttuan mi ruangah ka min tu cu van ka telhpiak duh hlah u.

Ka chim mi vialte hi Nargis thlichia hartong bawmhchanhnak ah Laitlang in a rak ra ve mi Saya Cung Hu, Saya Pa Kulh, Saya Rual Cung tepawl hal hna ulaw an ka “tthohkhan” dih ve ko lai tiah ka ruah. Kai lawm tuk. Ka ca he taarchih dingah hmaanthlak zong Nargis thlichia hartong bawmhnak an rianttuannak tampi Sayama Chinchin sinah a um ko lai. Rak hal te ulaw taarchih te u. Laknak Chinchin Pekthang

Be the first to comment

Leave a Reply

Your email address will not be published.


*