Arthluak Bantuk A Neimi Laimi Lak Zongah Kan Um

Arthluak bantuk a neimi Laimi lak zongah kan um ve, cu bantuk mi cu Bible nih sal ttha lo, sal santlai lo a ti hna Kum 1990 lio hrawng ah Thantlang High School No.2 i taangruk ka rak kai lio ahhin kan hawipa pakhat nih a rak chim tawnmi cu “na thluak cu arthluak bak asi ko” tihi si. Kan hawipa cu a muisam cu tlawmpal te ka suai khawh nan a min cu ka philh cang.

Kan hawi le lakah biachimdan a thiam lem lomi, ruahnak tlawm deuhmi, santlai lo deuhmi le a fim lo deuh i a hmuhmi hna kha na thluak cu arthluak bak asi ko a ti tawn hna.Hihin kan vawlei zongah minung a si ko nan arthluak bantuk a neimi minung tampi hmuh khawh an si. Arthluak bantuk a neimi minung cu khua le ram, miphun ca le Khrihfa bu ca zongah santlaihnak le tthathnemnak an nei lai lo i ruahnak thar zong an chuahpi kho lai lo.

Zeithil poh cang hmanh sehlaw a ttha lei bantuk lawng tein an hmuh lai i an chim lai. Thilchia le thilttha lo thleidan dan zong an thiam lai lo. An thluak hrim nih a phan lai lo mah tuah cu. Mi nih ca an ttialmi le cauk, thil an tuahmi le thil a cangmi le bia an chimmi pawl cung zongah zeizawn hi dah a ttha i zeizawn hi dah a ttha lo i zei bantuk ruahnak ttha dah kan chuahpi lai i kan tuah lai timi zong an ruat kho lai lo. Aruang cu an fim lo ruang le arthluak bantuk an i neih caah a si ko.

Mi mithmuhnak ah mittha ngai an lo lai nan mittha an lawhnak zongcu san an tlaih ruangah, le an fim lo ruang ah le arthluak bantuk an i neih ruangah a si ko lai. Cu bantuk minung cu Khrihfa ttha zong an si kho fawn lai lo. Bible nih sal ttha lo, sal santlai lo a timi phun an si. Thil ttha lo, thil dik lo, sualnak ti bantuk zong an soisel ngam lai lo i an do ngam fawn lai lo. Zeipoh khi a ttha lei bantuk lawng tein an cohlan lai i an hmuh lai, an chim lai.

Kan Bible kan zoh tik ah Bawi Zisuh le Profet vialte nih cun sualnak, thil ttha lo, thil dik lo, zatlang nun din lonak le cawnpiaknak hman lo vialte hehchet tiah an dohngam, an soisel ngam i an nunnak tiang an pek ngam. Dai tein an um lo i arthluak bantuk a neimi bantuk in a ttha lei lawng tein an hmu dih lo.Mi zeipoh nih uarmi, duhmi le pommi cu thil dik lo, thil hman lo le sualnak a hmu kho i mah cu hlohnak/hrawhnak dingah ralttha ngai in a chim ngamtu, a ttial ngamtu, a soisel ngamtu an si ko.

Mah an i zuamnak vialte in cun ruahnak thar le ttha zong an chuahpi lai i mi zapi caah tthatnak le hlawknak a chuahpi ding lawng an i zuam lai/an kawl lai/an tuaktan lai. Cu bantuk cu mifim le miza, nu salttha le pasal ttha lawng nih an tuah ko lai. Arthluak bantuk a neimi minung nih cun ka fim ngai rua tiphun in le mittha ngai ka si rua tiphun in zeithil poh a cangmi cungah a tthalei bantuk lawng tein a chimter lai. Mahcu san a tlaih lo ca le a ruahnak le a thluak nih a phak lo ca le arthluak bantuk a neih caah a si ko.

Atutan thil kan tonmi kong zongah arthluak bantuk a neimi minung hmuh khawh an si ko.Arthluak bantuk a neimi minung cu Pathian zongnih hman awk ah a duh hna lo. An ralchia lai, ruahnak thar an chuahpi kho lai lo, sualnak le din lonak zong an do ngam lai lo i zeipoh hi a ttha lei bantuk lawng tein an chim ko lai/an kalpi ko lai. Zatlang nun i din lonak sersiam le remh zong an i zuam lai lo.

Pathian nih a duhmi minung phun cu din lonak le sualnak a do ngamtu, a ttial ngamtu, a chim ngamtu Bawi Zisuh le prophet vialte, le mifim pasal ttha le nusal ttha phun hi an si ko. Arthluak bantuk a neimi Laimi cheukhat kan um ve. Na arthluak bantuk hlonh na duh ahcun Bible nih a ti bang Pathian sinah fimnak le hngalh khawhnak hal ko. An pek hrimhrim tiah ka chim ngam.

Crd: Van Tum

Be the first to comment

Leave a Reply

Your email address will not be published.


*