CHINRAM TLANGPAR LE KHUAPI KIP AH PURA AN SAK DIH

KAWL le CHIN, TAHṬHIM CI A SI LO: Kum 50 lai Ralkap uknak ruangah ram pumpi ih um Tlangmi le Kawl kan zaten farah le rethei in kan um phah thluh ti cu el theih a si lo. ASINAN,Tlangmi lawng si lo Kawl mipi khal an tuar ve tin Kawl le Tlangmi tahṭhim in hnemawk ci cu a si lo.

ZIANGRUANGAH? Taksa lamah Kawl cu rethei ve zet si hman hai sehla, a miphun zawngin miphun DAM an si thotho. Ziangvek in an dam? An ca/calai, nunphung, biaknak le miphun a dam. Tlangmi telin ram mipi zaten phunhrek in phunsang tlawng tiang an Kawlca kan zir thluh kan thiam thluh ruangah an Ca le Calai (written word and literature) a cak, natnak fate hman a nei lo, a DAM.

Hmanseh, Kannih Tlangmi Ca le Calai (written word and literature) cu Cozah tlawng phunhrek hmanah kan zir thei lo ruangah a ngawr, a na, a thi zik, a DAM LO. 2, An NUNPHUNG in Tlangmi zate tiang in tuam neh thluh.Thimnakah, An nunphung lakih pakhat KUMTHAR (TACIAN) timi cu Nithla siarnak (calendar) ah cati sen thawn an hminsin ih ni hra sung lai ram pumpi in zung le tlawng a pit thluh, an tidai tawih awknak ah Chin mipi tiangin kan rak tel, kan khursung kan cai.

An nunphung lakih pakhat HNAMTHUAM lungzi le taihpung khal Tlangmi tiangin upat zetin kan hruhpi. An nunphung vekih ROCO dan cu ram pumpin kan thlunpi. An nunphung vekih LEIRAM hrang tuahmi Dan cu Tlangram tiangin in thlun ter. Kawl NUNPHUNG in Tlangmi zate tiang in tuam neh thluh ruangah a Nung in a DAM CAK TUK.

Hmanseh, Chin nunphung lakih pakhat KUMTHAR ah Rampi Zung le Tlawng pit phah thluh thei dingin Nithla siar (calendar) ah hminsin in a um ban ve lo, kumthar hmanpitu Kawl khal an um ve lo. Chin nunphung lakih pakhat HNAMTHUAM in Kawl hnamthuam tlukin sunsak le cawisan a co ban ve lo.

Chin nunphung vekin ROCO dan a takin a nung thei nawn lo.Chin nunphung vekih LEIRAM humhalh dan cu cimral le pahbal in a um vivo. Curuangah, Chin NUNPHUNG cu ngawr, a na, a DAM LO. 3- Kawl BIAKNAK cu a cak, a Nung, a DAM. Ram pumpi an biaknak darhzai dingah Vuanci zungpi (Religious Ministry) ret a siih Rampi paisa an tul zat an hmang rero men. Chinram tlangzim le khawpi kipah an Purang a khat thlang.

HMANSEH Biakinn saknak ding hmanah sakhawram (religious land) kan ngah thei lo. Tlangzim ih kan phun cia mi thinglamtah hman an bal ih a aiah Purang an toh men. Chin 85%+ ih BIAKNAK (Christianity) cu a ngawr, a na, a DAM LO. 4-Kawl cu an miphun a DAM. Ram pumpi Uktu an si ruangah canvo sangbik an nei. A miphun in an DAM.

Tlangmi in kan pupa Ram hman ah thuneihnak sangbik kan nei ve lo, uktu canvo nei ban lo miphun dam lo kan si. Kawl cu Ralkap, Cozah le Zung tinkim ah a lu bik le thuneitu an tuan. Tlangmi in hivek canvo kan nei ve lo. Tlangmi le zumtu kan sinak men ruangah Ralkap le Zung ah sinak sang le Bawi bik tuan thei loin kan um.

5-Kawl cu an ram a DAM. An phairawn rak Duh tawk loin Shanram si ringring khaw nuam hminthang Maymyo le Lunghlu suahnak Mokok siseh, ChinRam siseh an nawr ih an laksak bet ruangah, an ram a DAM men si loin ramdang dawlh thei ko a CAK. Kan Tlangram (Chinram) cu kil ih kipin sah thlak, nawrzim vivo a siih a na, a dam Lo. KAWL le CHIN hi TAHṬHIM CI KAN SI LO